លោក ជា វណ្ណារិទ្ធ បន្តដឹកនាំមូលនិធិ «ដឹងគុណ» ផ្គត់ផ្គង់សំណាញ់ការពារដ្រូន ដល់វីរកងទ័ព ក្នុងពេលត្រូវការបន្ទាន់

អំឡុងពេលស្ថានការណ៍តាមព្រំដែនតម្រូវឱ្យមានការប្រុងប្រយ័ត្នខ្ពស់ និងស្របពេលពង្រឹងការការពារឱ្យកាន់តែរឹងមាំ ពិធីករល្បីឈ្មោះ ជា វណ្ណារិទ្ធ បានបន្តគៀរគរសប្បុរសចូលរួមគាំទ្រវីរកងទ័ពកម្ពុជា តាមរយៈមូលនិធិ «ដឹងគុណ» ដើម្បីឆ្លើយតបទៅនឹងតម្រូវការសម្ភារៈសំខាន់ៗនៅជួរមុខ។

តាមការបង្ហើបឱ្យដឹង កងកម្លាំងនៅតំបន់ជួរមុខកំពុងរៀបចំធ្វើលេនដ្ឋាន និងពង្រឹងប្រព័ន្ធការពារ។ ហេតុនេះ មានតម្រូវការបន្ទាន់លើ សំណាញ់ការពារដ្រូន ដែលជាឧបករណ៍មានតួនាទីសំខាន់ក្នុងការកាត់បន្ថយហានិភ័យពីបច្ចេកវិទ្យា​”ដ្រូន” ។ លោកថា សំណាញ់មួយដុំមានតម្លៃ ៨០ដុល្លារ ហើយកងទ័ពជួរមុខទាក់ទងសុំលោកចំនួន ៧ដុំ ។

ដោយមិនរង់ចាំយូរ លោក និងក្រុមការងារ បានសម្រេចយកប្រាក់ពីមូលនិធិដែលបានបម្រុងទុក ដើម្បីបំពេញតម្រូវការបន្ទាន់នេះ។ តាមរយៈសារពីទំព័រហ្វេសប៊ុក លោកបានបញ្ជាក់ថា “ពួកយើងទាំងពីរ សម្រេចដកលុយមូលនិធិដែលមានបម្រុង ជូនតាមតម្រូវការចាំបាច់របស់បងប្អូនជួរមុខ សង្ឃឹមបងប្អូននៅតែបន្តចូលរួមតាមសទ្ធា និងបេះដូង”។

ជាមួយគ្នានេះ ជា វណ្ណារិទ្ធ ក៏បានលើកឡើងថា មិនថាជំនួយមានតម្លៃតិច ឬច្រើន ការចូលរួមពីប្រជាពលរដ្ឋគ្រប់រូប គឺជាកម្លាំងចិត្តដ៏ធំសម្រាប់វីរកងទ័ព ដែលកំពុងឈរជើងការពារអធិបតេយ្យភាព និងរក្សាសន្តិភាពជាតិ។ ការចូលរួមបែបនេះ ក៏បង្ហាញពីស្មារតីសាមគ្គីភាព និងការយកចិត្តទុកដាក់របស់សង្គមខ្មែរ ទៅលើសុវត្ថិភាពជាតិផងដែរ។

រហូតមកដល់ពេលបច្ចុប្បន្ន មូលនិធិ «ដឹងគុណ» ដែលមានលោក ជា វណ្ណារិទ្ធ និងពិធីការិនី កែវ ចាន់និមល នៅបន្តសកម្មភាពរួមចំណែកគាំទ្រជាបន្តបន្ទាប់ ដើម្បីគាំទ្រការរក្សាសុវត្ថិភាពអ្នកជួរមុខ ខណៈលោកក៏ស្នើសុំការយោគយល់ពីសាធារណជនផងដែរ ចំពោះការមិនអាចបង្ហាញលម្អិតអំពីអត្តសញ្ញាណ និងទីតាំងជាក់លាក់ ក្នុងបំណងការពារសុវត្ថិភាពវីរកងទ័ពជួរមុខ៕