ចុងសប្តាហ៍ទី២នៃខែមិថុនា កម្ពុជាមានភ្ញៀវទេសចរជាតិ និងអន្តរជាតិជាង៧ម៉ឺននាក់

នៅចុងសប្តាហ៍ទី២នៃខែមិថុនាឆ្នាំ២៩២១នេះ កម្ពុជាមានភ្ញៀវទេសចរជាតិ និងអន្តរជាតិជាង ៧ម៉ឺននាក់ មានការថយចុះប្រមាណ ៩.៥៩% ធៀបនឹងសប្តាហ៍កន្លងមក។ ប៉ុន្តែបើធៀបនឹងរយៈពេលដូចគ្នានៃខែមិថុនា ឆ្នាំ២០២០ គឺថយចុះប្រមាណ ៥០.៦៩%។

លោក  ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា ការថយចុះនៃចំនួនភ្ញៀវទេសចរ ដោយសារការកើនឡើងនៃជំងឺកូវីដ-១៩ នៅតាមតំបន់ខ្លះៗនៃរាជធានីខេត្តមួយចំនួន ធៀបនឹងក្នុងសប្តាហ៍កន្លងមក ។

លោក រដ្ឋមន្ត្រីបាន បន្តថា គោលដៅទេសចរណ៍សំខាន់ៗប្រចាំសប្តាហ៍ទី២ គឺរាជធានីភ្នំពេញឈរនោះលំដាប់លេខរៀងទី១ដោយទទួលបានភ្ញៀវទេសចរ ជាង១ម៉ឺន៤ពាន់នាក់ បន្ទាប់មកគឺខេត្តកំពង់ស្ពឺទទួលបានជាង១ម៉ឺននាក់ ខេត្តកំពត ទទួលបានជាង៧ពាន់នាក់ ខេត្តព្រះសីហនុទទួលបានជាង ៧ពាន់ នាក់ ខេត្តបាត់ដំបង ទទួលបានជាង ៦ពាន់នាក់ ខេត្តកណ្តាលទទួលបានជាង៤ពាន់នាក់។

លោករដ្ឋមន្ត្រីបន្ថែមថា ដោយឡែកសម្រាប់តំបន់ទេសចរណ៍អេកូទេសចរណ៍ និងទេសចរណ៍ធម្មជាតិ ដូចជាគីរីរម្យ ភ្នំខ្នងផ្សារ ភ្នំឱរ៉ាល់ និងគោលដៅទេសចរណ៍ខេត្តតំបន់ឆ្នេរ នៅតែជាគោលដៅដែលមានភាពទាក់ទាញ និងទ្រទ្រង់ចលនាទេសចរណ៍ផ្ទៃក្នុង។

លោករដ្ឋមន្ត្រី បានបញ្ជាក់ថា បច្ចុប្បន្ននេះ គណៈបញ្ជាការឯកភាពរាជធានីខេត្ត បានបង្កើនការក្រើនរំលឹកដល់ភ្ញៀវទេសចរ និងពង្រឹងការអនុវត្តវិធានសុវត្ថិភាព នៅគ្រប់គោលដៅទេសចរណ៍ និងមូលដ្ឋានអាជីវកម្ម ពិសេសការអនុវត្តវិធានការ «៣ កុំ» និង «៣ ការពារ»៕

សំអឿន