មិនខ្វល់ឆ្លងកូវីដ-១៩ កន្លែងលេង និងភ្នាល់បាល់ទះនៅស្រុកស្វាយជ្រំ នៅតែផ្តុំគ្នាពី១០០ទៅ២០០នាក់

ខេត្តស្វាយរៀង៖ ប្រជាពលរដ្ឋដែលរស់នៅភូមិធ្លក ឃុំក្រោលគោ ស្រុកស្វាយជ្រំ បានរិះគន់ចំៗ​ប្រាប់អ្នកសារព័ត៌មានឱ្យដឹងកាលពីថ្ងៃទី២៧ ខែមិថុនា ឆ្នាំ២០២១ ថា មានបើកល្បែង​ភ្នាល់​លេងបាល់ ហើយចាក់បាល់ទះមួយកន្លែង ដំណើរការយ៉ាងរលូន ដោយបើកឱ្យមនុស្សចូល​លេង​ជារៀងរាល់សប្ដាហ៍ ដោយក្នុងមួយសប្ដាហ៍បើកចំនួន០២ថ្ងៃគឺថ្ងៃសៅរ៍ និងថ្ងៃអាទិត្យ មានមនុស្សចូលចាក់បាល់យ៉ាងច្រើនកុះករ ដែលមានសមាសភាពមកពីតំបន់ផ្សេងគ្នា​ដោយ​មិន​ខ្វល់ ឬខ្លាចឆ្លងមេរោគកូវីដ-១៩ ទាល់តែសោះ។​​

ប្រភពបានបន្តថា ទីតាំងដែលលេងបាលទះ និងឱ្យមនុស្សចូលដាក់ប្រាក់ភ្នាល់គ្នាដោយសេរី​នេះ​គឺ ​ហាងកាហ្វេ “Bee Bee Cafe & ការហ្វេដូងក្រអូប” ស្ថិតនៅភូមិធ្លក ឃុំក្រោលគោ ស្រុកស្វាយជ្រំ។

បើតាមអ្នកចូលភ្នាល់បាល់ម្នាក់បានបង្ហើបឱ្យដឹងថា ក្នុងទីតាំងខាងលើ មានមនុស្សចូលចាក់​បាល់​ក្នុង​មួយថ្ងៃៗ ប្រមាណ​ជាជាង ១០០នាក់ ទៅ២០០នាក់ ដោយប្រើប្រាស់រថយន្តសេរីទំនើបៗ និងម៉ូតូជាច្រើនគ្រឿង។ ហើយចំពោះទឹកប្រាក់ដែលចាក់បាល់ភ្នាល់គ្នានោះ គឺចន្លោះពីរ ៥០ម៉ឺនរៀល ទៅដល់ជាង២លានរៀលឯណោះ។

ពាក់ព័ន្ធទៅក្នុងករណីនេះផងដែរ ស្ត្រីជាម្ចាស់ទីតាំងបានឱ្យដឹងថា កន្លែងគាត់ពិតជាបានបើកឱ្យលេងបាល់មែនពីព្រោះថាតាំងពីពេលចាប់ដំណើរការសាងសង់ទីលានរួចមកពុំទាន់បានឱ្យចាប់ដំណើរការជាលក្ខណៈទ្រង់ទ្រាយធំនៅឡើយទេ ហើយបើមិនឱ្យ​លេង​ទេ​ គឺពុំមានថវិកាបង់ឱ្យអង្គការនោះដែរ។

ទាក់ទិនករណីកន្លែងបើកល្បែងចាក់បាល់ខាងលើ លោក ភោគ វណ្ណថន មេឃុំក្រោលគោ បានប្រាប់តាមទូរសព្ទថា ម្ចាស់ទីតាំងឈ្មោះ ណុច ភេទស្រី (តែមិនដឹងត្រកូលអីទេ) បើកល្បែង​ភ្នាល់ចាក់បាល់ ក្រោម ហាងកាហ្វេ ស្លាកយីហោ “Bee Bee Cafe & កាហ្វេដូងក្រអូប” ហើយនៅខែមុន លោកបានចុះទៅបិទម្ដងរួចហើយ។ ដោយបិទទីតាំងខាងលិច បើកទីតាំងខាងកើត៕

អត្ថបទ៖ ភក្ដី