អូស្រ្តាលី រកឃើញ វីរុសកូវីដបំប្លែងខ្លួន Delta ទម្រង់ថ្មី

ប្រទេសអូស្រ្តាលី បានរកឃើញករណីចំនួនប្រាំបី នៃវីរុសកូវីដបំប្លែងខ្លួន Delta ទម្រង់ថ្មី ដែលកំពុងចរាចរណ៍នៅរដ្ឋ New South Wales ខណៈអាជ្ញាធរកំពុងព្យាយាមស្វែងរកប្រភព។

ប្រធានមន្រ្តីសុខាភិបាលលោកស្រីវេជ្ជបណ្ឌិត Kerry Chant បានអះអាងបែបនេះ ខណៈពេលផ្តល់ព័ត៌មានថ្មីៗអំពីស្ថានភាពជំងឺកូវីដ-១៩របស់រដ្ឋ New South Wales នៅវេលាម៉ោង ១១ព្រឹកថ្ងៃសុក្រ។

លោកស្រីបានឲ្យដឹងថា “យើងមានកម្មវិធី ឆ្លើយតបទៅនឹងជំងឺរាតត្បាត។ ការស៊ើបអង្កេតទាំងនោះ បានរកឃើញ វីរុសកូវីដបំប្លែងខ្លួន Delta ដែលមានហ្សែនខុសពីវីរុសកូវីដបំប្លែងខ្លួន ដែលកំពុងចរាចរណ៍ក្នុងទីក្រុង ស៊ីដនី នាពេលបច្ចុប្បន្ន”។

បច្ចុប្បន្ន មានករណីវីរុសបំប្លែងខ្លួនទម្រង់ថ្មីនេះចំនួន ៨ ករណីដែលត្រូវបានកំណត់អត្តសញ្ញាណ ដោយក្នុងនោះ មានមនុស្ស ៧ នាក់មកពីគ្រួសារតែមួយ និងករណីបន្ថែមមួយផ្សេងទៀត។

ទោះបីជាយ៉ាងណាក៏ដោយ លោកស្រីវេជ្ជបណ្ឌិត Chant លើកឡើងថា “គ្មានភស្តុតាងណាមួយបញ្ជាក់ថា វីរុសបំប្លែងខ្លួនប្រភេទថ្មីនេះ មានសមត្ថភាពឆ្លងកាន់តែខ្លាំង ធន់នឹងវ៉ាក់សាំង ឬធ្វើឲ្យមនុស្សធ្លាក់ខ្លួនឈឺធ្ងន់ធ្ងរនោះទេ”៕

ប្រែសម្រួល៖ Vann Vann

ប្រភព៖ News.com.au

ចុចអាន៖ ចាក់ Pfizer ២ដូស មានប្រសិទ្ធភាពខ្ពស់ ការពារ Delta បាន ៦ខែ