ទេសចរបរទេសទៅលេង វៀតណាម ក៏មិនចាំបាច់ធ្វើចត្តាឡីស័កដែរ បើមានគ្រប់លក្ខខណ្ឌទាំងនេះ (មានវីដេអូ)

ភ្ញៀវទេសចរបរទេសដែលបានចាក់វ៉ាក់សាំងការពារជំងឺកូវីដ ១៩ ពេញដូសទៅទស្សនាប្រទេសវៀតណាម នឹងមិនតម្រូវឲ្យធ្វើចត្តាឡីស័កនោះទេចាប់ពីខែវិច្ឆិកាតទៅ ។ នេះ​បើយោង​តាម​ច្បាប់​ថ្មី​ ក្នុង​សេចក្តី​ណែនាំ​ចុង​ក្រោយ​របស់​ក្រសួង​វប្បធម៌ កីឡា និង​ទេសចរណ៍ ដែល​បាន​ដាក់​ជូន​នាយក​រដ្ឋមន្ត្រី​ដើម្បី​អនុម័ត ។

នៅក្រោមច្បាប់នេះ ភ្ញៀវទេសចរបរទេសនឹងទទួលការពិនិត្យសុខភាពនៅច្រកចូលអាកាសយានដ្ឋានអន្តរជាតិ រួមទាំងការធ្វើតេស្តរកកូវីដ ហើយពួកគេអាចរីករាយនឹងដំណើរកម្សាន្តរបស់ពួកគេដោយសេរី ប្រសិនបើទទួលបានលទ្ធផលតេស្តអវិជ្ជមាន ក៏ដូចជាមិនចាំបាច់ធ្វើចត្តាឡីស័កជាដើម ។

ក្នុងដំណាក់កាលដែលមានរយៈពេលពីខែវិច្ឆិកាដល់ដំណាច់ឆ្នាំនេះ ភ្ញៀវទេសចរនឹងតម្រូវឲ្យមកពីកញ្ចប់ដំណើរទេសចរណ៍របស់ក្រុមហ៊ុនទេសចរណ៍ និងតាមរយៈជើងហោះហើរឯកជន ឬជើងហោះហើរពាណិជ្ជកម្មអន្តរជាតិ ។ អ្នកធ្វើដំណើរនឹងត្រូវបានទាមទារឲ្យមានភស្តុតាងនៃការធ្វើតេស្តអវិជ្ជមានកូវីដពីម៉ាស៊ីន RT-PCR ក្នុងរយៈពេល ៧២ ម៉ោង មុនពេលចេញដំណើរ ។

ស្របពេលជាមួយគ្នានេះ ពួកគេក៏នឹងត្រូវបង្ហាញវិញ្ញាបនបត្រចាក់វ៉ាក់សាំងកូវីដពេញដូស ដែលទទួលស្គាល់ដោយអាជ្ញាធរវៀតណាម និងរយៈពេលយ៉ាងហោចណាស់ ១៤ ថ្ងៃ ក្រោយការចាក់លើកទី ២ និងមិនលើសពី ១២ ខែមុនពេលពួកគេចូលវៀតណាម ឬវិញ្ញាបនបត្របញ្ជាក់ការជាសះស្បើយពីកូវីដ ក្នុងរយៈពេល ៦ ខែមុនកាលបរិច្ឆេទចូលរបស់ពួកគេ ។

បន្ថែមពីនេះ អ្នកទស្សនាក៏នឹងតម្រូវឲ្យមានការធានារ៉ាប់រងការធ្វើដំណើរ ជាមួយនឹងការតម្កល់លុយប្រមាណ ៥០,០០០ ដុល្លារអាមេរិក និងដំឡើងកម្មវិធី IGOVN ដែលត្រូវបានបង្កើតឡើងដោយក្រសួងសន្តិសុខសាធារណៈរបស់ប្រទេសវៀតណាម នៅលើស្មាតហ្វូនរបស់ពួកគេសម្រាប់ប្រើប្រាស់ ក្នុងអំឡុងពេលធ្វើដំណើររបស់ពួកគេ ។

ក្នុងអំឡុងពេល ៧ ថ្ងៃដំបូង បន្ទាប់ពីការមកដល់របស់ពួកគេ ភ្ញៀវទេសចរនឹងត្រូវបានអនុញ្ញាតឲ្យរីករាយនឹងដំណើរកម្សាន្តរបស់ពួកគេនៅក្នុងមូលដ្ឋាន ហើយគួរតែកំណត់ការទំនាក់ទំនងជិតស្និទ្ធជាមួយអ្នកធ្វើដំណើរមកពីក្រុមផ្សេងទៀត ។

ចំណែកនៅថ្ងៃទី ៧ នៃដំណើរទេសចរណ៍របស់ពួកគេ អ្នកទេសចរនឹងធ្វើតេស្តរកកូវីដដោយខ្លួនឯង ក្រោមការណែនាំ និងការត្រួតពិនិត្យពីបុគ្គលិកពេទ្យក្នុងតំបន់ ហើយពួកគេអាចធ្វើដំណើរជាកញ្ចប់ទៅកាន់តំបន់ផ្សេងទៀត ប្រសិនបើពួកគេទទួលបានលទ្ធផលតេស្តអវិជ្ជមាន ។

ជាចុងក្រោយ ភ្ញៀវដែលមានបំណងទៅសួរសុខទុក្ខសាច់ញាតិនៅកន្លែងផ្សេង ក្រៅពីការកំណត់សម្រាប់ទទួលភ្ញៀវទេសចរណ៍អន្តរជាតិ ត្រូវចុះឈ្មោះជាលាយលក្ខណ៍អក្សរជាមួយអ្នករៀបចំដំណើរកម្សាន្តរបស់ពួកគេ ដែលនឹងតាមដានសុខភាពរបស់ពួកគេជាមួយអាជ្ញាធរមូលដ្ឋានពាក់ព័ន្ធ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ វៀតណាម នឹងសាងសង់ផ្លូវដែកថ្មីចំនួន ៩ នៅឆ្នាំ ២០៣០ មួយខ្សែដល់ច្រកព្រំដែន កម្ពុជា (មានវីដេអូ)