កូវីដផ្តាច់ជីវិតជនជាតិអាមេរិក លើស៨០ម៉ឺននាក់ ជាចំនួនខ្ពស់បំផុតលើលោក (មានវីដេអូ)

ជនជាតិអាមេរិកជាង ៨០០,០០០ នាក់ឥឡូវនេះ បានស្លាប់ដោយសារជំងឺកូវីដ១៩ ដែលជាចំនួនអ្នកស្លាប់ខ្ពស់បំផុតពីជំងឺរាតត្បាតសកល។

រឿងនេះកើតឡើងចំពេលដែលសហរដ្ឋអាមេរិក មានអ្នកឆ្លងកូវីដឈានដល់៥០លានករណី កាលពីថ្ងៃចន្ទ។

ការស្លាប់ភាគច្រើន ត្រូវបានកត់ត្រាក្នុងចំណោមអ្នកដែលមិនបានចាក់វ៉ាក់សាំង និងមនុស្សចាស់ ហើយក្នុងឆ្នាំ២០២១នេះ ជនជាតិអាមេរិកបានស្លាប់ច្រើនជាងក្នុងឆ្នាំ២០២០ទៅទៀត។

សហរដ្ឋ​អាមេរិក ​កំពុងជួបប្រទះរលកនៃការ​ស្លាប់​ជា​ថ្មី​ម្តង​ទៀត ​ក្នុង​អត្រា​គួរឲ្យ​ព្រួយ​បារម្ភ។ ការស្លាប់មនុស្ស១០០,០០០នាក់ បានកើតឡើងក្នុងរយៈពេល១១សប្តាហ៍ចុងក្រោយ ដែលជាល្បឿនដ៏លឿន។

វាមានរយៈពេលជាង៦៥០ថ្ងៃ ចាប់តាំងពីអ្នកជំងឺជនជាតិអាមេរិកដំបូងបង្អស់ បានស្លាប់ដោយសារកូវីដ នៅក្នុងទីក្រុង Seattle នៃរដ្ឋ Washington។

ចំនួនសរុប៨០០,០០០នាក់ គឺលើសពីចំនួនប្រជាជននៃទីក្រុងនានាដូចជា Boston ឬ Washington DC ទៅទៀត។ ចំនួននេះក៏មានន័យផងដែរថា អាមេរិកមានប្រជាជនស្លាប់អំឡុងជំងឺរាតត្បាត ច្រើនជាងក្នុងសង្គ្រាមលោកលើកទី២ ដល់ទៅទ្វេដងឯណោះ។

ចំនួន​អ្នក​ស្លាប់​នៅ​សហរដ្ឋ​អាមេរិក គឺលើស​ពី​ប្រទេស​ផ្សេង​ទៀត ឆ្ងាយណាស់។ ប្រទេសមានអ្នកស្លាប់ដោយសារកូវីដខ្ពស់បំផុតលំដាប់ទី២គឺប្រេស៊ីល ដែលមានអ្នកស្លាប់ជាង៦១៦,០០០នាក់ និងទី៣គឺឥណ្ឌា មានអ្នកស្លាប់ជាង៤៧៥,០០០នាក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ទីបំផុត អាមេរិក រកឃើញករណីដំបូង នៃវីរុសបំប្លែងខ្លួន Omicron