គ្រោះថ្នាក់ចរាចរណ៍បង្កជាអគ្គិភ័យឆេះរថយន្ដមួយគ្រឿងខ្ទេចទាំងស្រុង

រថយន្ដម៉ាក Toyota Prius មួយគ្រឿងត្រូវបានអគ្គិភ័យឆាបឆេះអស់ទាំងស្រុង ខណៈម្ចាស់បើកទៅបុកខឿនផ្លូវនៅចំណុចស្បានអាកាសស្ទឹងមានជ័យ។

ករណីគ្រោះថ្នាក់ចរាចរណ៍បង្កជាអគ្គិភ័យនេះ បានកើតឡើងកាលពីវេលាម៉ោង១២និង៣០នាទីរំលងអាធ្រាត ឈានចូលថ្ងៃទី០៩​ ខែមេសា ឆ្នាំ២០២២ តាមបណ្តោយផ្លូវព្រះមុន្នីរ៉េត នៅចំណុចស្ពានអាកាសស្ទឹងមានជ័យ​ ក្នុងសង្កាត់ស្ទឹងមានជ័យទី១​ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតមានអគ្គិភ័យឆាបឆេះរថយន្តខាងលើ គឺមានបុរសម្នាក់បើករថយន្តម៉ាក Toyota Prius មួយគ្រឿង ពណ៌ស ពាក់ផ្លាកលេខភ្នំពេញ 2BJ-0755 ធ្វើដំណើរតាមបណ្ដោយផ្លូវព្រះមុន្នីរ៉េត ទិសដៅពីកើតមកលិច ឆ្លងកាត់ខាងក្រោមស្ពានអាកាសស្ទឹងមានជ័យ ខណៈមកដល់ចំណុចកើតហេតុក៏ជ្រុលចង្កូតទៅបុកខឿនផ្លូវពេញទំហឹង បណ្ដាលឲ្យរថយន្តបែកកង់ និងផ្ទុះពោង កល់លើខឿនផ្លូវទៅមុខលេងរួច ។ ភ្លាមនោះស្រាប់តែមានផ្សែងហុយចេញពីប្រអប់ក្បាលរថយន្តជាខ្លាំងទើបតៃកុងរថយន្តស្រវេស្រវារកទឹក និងបំពង់ពន្លត់អគ្គិភ័យបាញ់ពន្លត់ តែដោយសារទីតាំងកើតហេតុពិបាករកអ្វីដែលយកមកពន្លត់ភ្លើងបានទើបអគ្គិភ័យបានឆាបឆេះរាលដាលកាន់តែខ្លាំងឡើងៗ រហូតស្ទើរអស់ទាំងស្រុងទើបមានរថយន្តបង្ការពន្លត់អគ្គិភ័យ១គ្រឿងចុះមកដល់ទីតាំងកើតហេតុ បាញ់ពន្លត់រថយន្តខាងលើឲ្យវារលត់ទៅវិញជាស្ថាពរ៕

អត្ថបទ៖ សុខា