សម្ដេចតេជោ ហ៊ុន សែន ប្រកាសដាក់សិស្ស-និស្សិតជាក្រុមអាទិភាព ដែលត្រូវទទួលវ៉ាក់សាំងកូវីដ-១៩ បន្ត

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសដាក់សិស្ស-និស្សិត ជាក្រុមអាទិភាព ដែលត្រូវទទួលបានការចាក់វ៉ាក់សាំងបង្ការជំងឺកូវីដ-១៩ បន្ត ដើម្បីធានានូវសុវត្ថិភាពរបស់ពួកគេ។

ការប្រកាស របស់សម្ដេចតេជោនាយករដ្ឋមន្ត្រី បានធ្វើឡើងក្នុងពិធីជួបសំណេះសំណាល ព្រមទាំងផ្តល់រង្វាន់លើកទឹកចិត្តដល់សិស្សប្រលងជាប់និទ្ទេស A ក្នុងការប្រលងសញ្ញាបត្រមធ្យមសិក្សាទុតិយភូមិ ក្នុងឆ្នាំសិក្សា២០២០-២០២១ សរុប ១,៧៥៣នាក់ នាព្រឹកថ្ងៃទី ៣ ខែឧសភានេះ។ សម្ដេចតេជោ ហ៊ុន សែន បានថ្លែងយ៉ាងដូច្នេះ «ដាក់សិស្សានុ-សិស្ស និស្សិតទាំងអស់ នៅទូទាំងប្រទេស ទៅជាក្រុមអាទិភាព នៃការទទួលវ៉ាក់សាំងបន្ត»។

សម្ដេចតេជោ ហ៊ុន សែន បានថ្លែងបន្តថា កាលពីពេលកន្លងទៅនេះ រាជរដ្ឋាភិបាលបានប្រកាសផ្ដល់អាទិភាពផ្ដល់វ៉ាក់សាំងបង្ការជំងឺកូវីដ-១៩ ជូនមន្ត្រីរាជការ គ្រូបង្រៀន និងកងកម្លាំងប្រដាប់អាវុធ ដែលជាក្រុមជួរមុខ​តែប៉ុណ្ណោះ។ ប៉ុន្តែឥឡូវនេះ ដើម្បីធានាសុវត្ថិភាពសិស្សានុ-សិស្ស កុមារា-កុមារីនោះ ត្រូវដាក់ពួកគេនៅក្នុងក្រុមអាទិភាព ដែលត្រូវទទួលបានការចាក់វ៉ាក់សាំងបន្តទៀត៕

អត្ថបទ៖ ឃួន សុភ័ក្រ