អគ្គិភ័យឆេះសាខាធនាគារមួយអស់ទាំងស្រុងនៅស្រុកជាំក្សាន្ដ

សាខាធនាគារមួយ ត្រូវបានអគ្គិភ័យឆាបឆេះអស់ទាំងស្រុង ដោយសារតែឆ្លងចរន្ដអគ្គិសនី តែមិនបណ្ដាលឲ្យមានអ្នករងរបួសនោះទេ។

យោងតាមរបាយការណ៍របស់នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានឲ្យដឹងថា ករណីអគ្គិភ័យនេះ បានកើតឡើងកាលពីថ្ងៃទី១០ ខែឧសភា ឆ្នាំ២០២២ នៅចំណុចភូមិជាំក្សាន្ត ឃុំជាំក្សាន្ត ស្រុកជាំក្សាន្ត ខេត្ត​ព្រះ​វិហារ ធ្វើឲ្យខូចខាតផ្ទះមួយខ្នងដែលម្ចាស់ជួលឲ្យធនាគារ អ៊ូរី ។

របាយការណ៍បានបញ្ជាក់ថា ម្ចាស់ផ្ទះឈ្មោះ​ គុន​ សាលឿន​ ​ភេ​ទ​ប្រុស​ អាយុ៤៦ឆ្នាំ មុខរបរលក់ដូរ ។ ចំណែកអ្នកគ្រប់គ្រង​ធនាគារ​មានឈ្មោះ​ សុខណា​ សំណាងឧត្តម ភេទ​ប្រុស​ អាយុ​២​៨​ឆ្នាំ​ ។

ក្នុងករណីនេះ សមត្ថកិច្ចបញ្ជាក់ថា ខូចខាតផ្ទះចំនួន០១ខ្នងអស់ទាំងស្រុងមានទំហ៊ុំ ៦×១៨​ មែត្រ​ ប្រភេទសំណង់ថ្មក្រោមឈើលើជញ្ជាំងបាំងក្តារដំបូលប្រក់ក្បឿង​ ដោយកម្លាំងសមត្ថកិច្ចបានចេញរថយន្តពន្លត់​ អគ្គិភ័យរបស់អធិការ​ដ្ឋាន​ចំនួន០១គ្រឿង ប្រើ​ប្រាស់​ទឹកពន្លត់អស់ចំនួន០៣រថយន្ត​ ទើបគ្រប់គ្រងអណ្ដាលភ្លើងបាន។

ទោះយ៉ាងណា ក្នុងរបាយការណ៍មិនបានបញ្ជាក់ពីការខូចខាតសម្ភារៈនៅក្នុងធនាគារនោះទេ ដោយគ្រាន់តែបញ្ជាក់ពីមូលហេតុ គឺបណ្ដាលមកពីឆ្លងចរន្ដអគ្គិសនីនៅជាន់ខាងលើ៕

អត្ថបទ៖ សុខុម