ជើង​ខ្លាំង​លំដាប់​ពិភពលោក​ពីររូប​ធ្លាប់​ផ្តួល Yodsanklai ប៉ះគ្នា​ថ្ងៃ​សុក្រ​នេះ

ថ្ងៃ​សុក្រ​ទី​២៥ ខែ ធ្នូ ខាងមុខនេះ ព្រឹត្តិការណ៍​ប្រកួត ONE: COLLISION COURSE II ចេញពី​ប្រទេស​សិង្ហ​បុរី​សុទ្ធតែ​តារា​ប្រដាល់​គុន​ចម្រុះ និង​មួយ​ថៃ​លំដាប់​ពិភពលោក​១២​រូប​ដែល​នឹង​ផ្តល់​ចំណី​ចក្ខុ​ពិសេស​ប្លែក​ដល់​អ្នកគាំទ្រ​ទូទាំង​ពិភពលោក​។

ជើង​ខ្លាំង​មកពី​ប្រទេស​រុស្ស៊ី​ដែលមាន​ចំណាត់ថ្នាក់​លេខ​២​ក្នុង​តារាង​អត្ត​ព​លិ​ក Jamal “Kherow” Yusupov ត្រូវ​ជួប​ជើង​ខ្លាំង​ចំណាត់ថ្នាក់​លេខ​៤ Samy “AK47” Sana ក្នុងនាម​ជា​គូ​ឯក​ប្រចាំ​ព្រឹត្តិការណ៍ ONE: COLLISION COURSE II ដែល​នឹង​ចាក់ផ្សាយ​ចេញពី​ប្រទេស​សិង្ហ​បុរី​។​

ជើង​ខ្លាំង Yusupov ទើបតែ​បង្ហាញមុខ​ប្រកួត​នៅ​ឆាក​អន្តរជាតិ ONE កាលពី​ខែវិច្ឆិកា ឆ្នាំ​២០១៩​កន្លងទៅ ប៉ុន្តែ​បានធ្វើ​ឲ្យ​មានការ​ចាប់អារម្មណ៍​យ៉ាងខ្លាំង​ទាំង​អ្នកគាំទ្រ និង​កីឡាករ​ដូចគ្នា​។ បុរស​ជំនាញ​ឆ្វេង​មកពី​រុស្សី​ត្រូវបាន​ផ្គូផ្គង​ដោយ​កំណត់​ទម្ងន់ catch weight ឲ្យ​ប្រកួត​ជាមួយ​ខ្លា​ចាស់​ថៃ “The Boxing Computer” Yodsanklai IWE Fairtex ត្រឹម​រយៈពេល​១០​ថ្ងៃ​ប៉ុណ្ណោះ ប៉ុន្តែ​រូបគេ​បាន​ក្លាយជា​កីឡាករ​តែ​ម្នាក់​គត់​ដែល​បាន​ផ្ដួល “​អ្នក​ប្រដាល់​កុំ​ព្យួ​ទ័​រ​” ឲ្យ​សន្លប់​លើកដំបូង​ក្នុង​អាជីព​ប្រដាល់​ជាង​មួយ​ទសវត្ស​មកនេះ​។

ក្រោយមក Yusupov ត្រូវបាន​រៀបចំ​ឲ្យ​ប្រកួត​ដណ្តើម​ខ្សែក្រវាត់​មួយ​ថៃ​ពិភពលោក ONE Featherweight ពី​ម្ចាស់​ជើងឯក Petchmorakot Petchyindee Academy ក្នុង​ខែកុម្ភៈ ប៉ុន្តែ​រូបគេ​ត្រូវ​បង្ខំចិត្ត​ដកខ្លួន​ចេញពី​ការប្រកួត​ដោយសារ​បញ្ហា​របួស​។

ក្រោយ​ព្យាបាល​របួស​ជាច្រើន​ខែ ឥឡូវនេះ​រូបគេ​បានជា​សះស្បើយ​ពេញលេញ និង​ដល់ពេល​ឡើង​សមរភូមិ​ប្រយុទ្ធ​ជាមួយនឹង​កម្លាំងចិត្ត​ដ៏​មុតមាំ​ដើម្បី​ទម្លាយ​ផ្លូវ​ឆ្ពោះទៅរក​ការប្រកួត​ដណ្តើម​ខ្សែក្រវាត់​ពិភពលោក​ជាថ្មី​។

​ចំណែក​ដៃគូ​គឺ​កីឡាករ Sana ពិតជា​មិនធម្មតា​ឡើយ​។ រូបគេ​ជា​ម្ចាស់​ជើងឯក​មួយ​ថៃ និង​ឃី​ក​បុក​សី​ង​ពិភពលោក ប៉ុន្តែ​នៅ​មិនទាន់បាន​កាន់​ខ្សែក្រវាត់​ពិភពលោក​របស់​ស្ថាប័ន ONE នៅឡើយ​ទេ​។
​តារា​មួយ​ថៃ​មកពី​ប៉ារីស​ក៏​ជា​កីឡាករ​ដែល​បាន​យកឈ្នះ​ជើង​ខ្លាំង​ថៃ Yodsanklai នៅ​វគ្គ​៨​ក្រុម​ចុងក្រោយ​នៃ​ការប្រកួត​ដណ្តើម​ខ្សែក្រវាត់​ឃី​ក​បុក​សី​ង​ពិភពលោក ONE Featherweight Kickboxing World Grand Prix​។ បន្ទាប់មក រូបគេ​បាន​យកឈ្នះ “Genghis Khan” Dzhabar Askerov ដោយ​ពិន្ទុ​នៅ​វគ្គ​ពាក់កណ្ដាល​ផ្ដាច់ព្រ័ត្រ និង​បាន​ឡើងទៅ​កាន់​វគ្គ​ផ្ដាច់ព្រ័ត្រ​។

នៅ​វគ្គ​ផ្តាច់ព្រ័ត្រ​កាលពី​ខែតុលា នាទី​ក្រុង​តូ​ក្យូ​ប្រទេស​ជប៉ុន Sana បាន​ចាញ់​ពិន្ទុ​ជើង​ខ្លាំង Giorgio “The Doctor” Petrosyan ដើម្បី​ទទួលបាន​ត្រឹម​ជើងឯក​រង​។

មកទល់ពេលនេះ មាន​រយៈពេល​ជាង​មួយឆ្នាំ​ហើយ​ចាប់តាំងពី​ចាញ់​នៅ​វគ្គ​ផ្ដាច់ព្រ័ត្រ​ខាងលើ​។ ឥឡូវនេះ​តារា​សញ្ជាតិ​បារាំង​បានរៀបចំ​ខ្លួន​រួចហើយ​ដើម្បី​ត្រលប់​មកវិញ​។ ការប្រកួត​នេះ​ពិតជា​សំខាន់​ណាស់​សម្រាប់ Sana ពីព្រោះ​ដើម្បី​ឆ្ពោះទៅ​ប្រកួត​ដណ្តើម​ខ្សែក្រវាត់​ពិភពលោក​ពី​ជើងឯក Petchmorakot​។

ក្រៅពី​គូ​ឯក​គួរ​ឲ្យ​ចាប់អារម្មណ៍ គូ​ឯក​រង​ប្រចាំ​ព្រឹត្តិការណ៍​ក៏​មិន​អាចធ្វើ​ឲ្យ​អ្នកទស្សនា​ខកចិត្ត​ឡើយ ខណៈ អតីត​ជើងឯក​ពិភពលោក ONE Flyweight World Champion គឺ​កីឡាករ Kairat “The Kazakh” Akhmetov​។

Akhmetov ដែលមាន​ចំណាត់ថ្នាក់​លេខ​ក្នុង​ចម្រុះ​ទម្ងន់ flyweight កំពុងកាន់​កំណត់ត្រា​ឈ្នះ​ពីរលើក​ជាប់​គ្នា​ចុងក្រោយ​។ ចុងក្រោយ​បំផុត Akhmetov ផ្ដួល​គូប្រជែង​លំដាប់​ទី​៥ កីឡាករ Reece “Lightning” McLaren ក្នុង​កម្មវិធី ONE Flyweight World Grand Prix នាវ​គ្គ​៨​នាក់​ចុងក្រោយ​កាល​ខែ មីនា ឆ្នាំ ២០១៩ មុនពេល​រងរបួស​។

កីឡាករ​រហស្សនាម “The Kazakh” កំពុងធ្វើដំណើរ​ត្រលប់​មកវិញ និង ដាក់​គោលដៅ​កាន់​ខ្សែក្រវាត់​ជាថ្មី​។ ចំណែក “Ottogi” Dae Hwan Kim អតីត​គូប្រជែង​ខ្សែក្រវាត់​ពិភពលោក​កំពុង​បង្កើន​ភាពរឹងមាំ​នៅក្នុង​ទម្ងន់ flyweight​។ តារា​កូរ៉េខាងត្បូង បានរៀបចំ​ផែនការ​ដើម្បី​ផ្ដួល​អតីត​ម្ចាស់​ខ្សែក្រវាត់​គួរ​ឲ្យ​ភ្ញាក់ផ្អើល​។ សូម​តាមដាន​គូប្រកួត​លម្អិត​នៅ​ព្រឹត្តិការណ៍ ONE: COLLISION COURSE II ខាងក្រោម។
​គូប្រកួត​ទាំងអស់​នៅ​ព្រឹត្តិការណ៍ ONE: COLLISION COURSE II
•​ ​កីឡាករ Jamal Yusupov ប្រកួត​ជា Samy Sana
•​ ​កីឡាករ Kairat Akhmetov ប្រកួត​ជាមួយ Dae Hwan Kim
•​ ​កីឡាករ Momotaro ប្រកួត​ជាមួយ Walter Goncalves
•​ ​កីឡាករ Amir Khan ប្រកួត​ជាមួយ Dae Sung Park
•​ ​កីឡាករ Raimond Magomedaliev ប្រកួត​ជាមួយ Edson Marques
•​ ​កីឡាករ Senzo Ikeda ប្រកួត​ជាមួយ Liang Hui