តើ ឌី សូនីតា ធ្លាប់ឈ្នះពានអ្វីខ្លះក្រៅពីពាន I Am A Singer Cambodia?

តារា​ចម្រៀង និង​សម្ដែង​កូន​មួយ​អ្នកនាង ឌី សូនីតា ទីបំផុត​បាន​សម្រេច​នូវ​បំណង​ធំ​របស់​ខ្លួន​ថ្មី​មួយ​ទៀត ខណៈ​នាង​ក៏បាន​ពោល​ពាក្យ​ទាំង​ទឹកភ្នែក​ថា សុបិន​ខ្ញុំ​ក្លាយ​ទៅ​ជា​ការ​ពិត​ហើយ។

បំណង​ធំ​របស់​តារា​ស្រី ឌី សូនីតា ពេលនេះ គឺ​នាង​ក្លាយ​ជា​ម្ចាស់​ពាន​លំដាប់​ពិភពលោក​ក្នុង​កម្មវិធី​ប្រកួត​ចម្រៀង​តារា​អាជីព I Am A Singer រដូវ​កាល​ទី ៣ ដែល​ទើប​ឈាន​ចូល​ដល់​វគ្គ​ផ្ដាច់ព្រ័ត្រ​កាលពី​យប់​ថ្ងៃ​ទី ១៩ ខែ​វិច្ឆិកា ឆ្នាំ ២០២២។ ក្នុង​នោះ​គេ​សង្កេត​ឃើញ​មាន​ការ​អបអរសាទរ​ជាច្រើន​ពី​សំណាក់​អ្នក​គាំទ្រ និង​មិត្តភ័ក្ដិ​សិល្បករ​-សិល្ប​ការិនី​ចំពោះ​អ្នកនាង ឌី សូនីតា ផង​ដែរ ក្រោយ​តស៊ូ​អស់​ជា​ច្រើន​ឆ្នាំ។

ដោយឡែក​ចាប់អារម្មណ៍​ទៅ​មើល​អតីតកាល​របស់​តារា​ចម្រៀង ឌី សូនីតា ដែល​ទើប​ចូល​ប្រឡូក​ក្នុង​វិស័យ​សិល្បៈ​ដំបូង​ប្រាកដ​ណាស់​គឺ​មាន​អ្នកគាំទ្រ​មួយ​ចំនួន​ក៏​នៅចាំ និង​ខ្លះ​ទៀត​មិនបាន​ដឹង​ទេ​ថា តើ ឌី សូនីតា ធ្លាប់​ឈ្នះ​ពាន​អ្វី​ទៀត​ក្រៅពី​ទទួល​ពាន I Am A Singer Cambodia កាលពី​ថ្មីៗ​នេះ​?។

បើ​តាម​ប្រភព​ព័ត៌មាន​បាន​ឲ្យ​ដឹង​ថា មុន​ពេល​ដណ្ដើម​បាន​ពានរង្វាន់ I Am A Singer Cambodia រដូវ​កាល​ទី ៣ នៅ​ក្នុង​ឆ្នាំ ២០២២ នេះ គឺ​តារា​ស្រី​អ្នកនាង ឌី សូនីតា កន្លងមក ធ្លាប់​ទទួល​បាន​ពាន Superstar ម្ដង​រួច​មក​ហើយ នា​អំឡុង​ឆ្នាំ ២០១៦ ក្នុង​កម្មវិធី “តារា​ឯក​គ្រប់​ទម្រង់ APSARA AWAR D 2016 ” រដូវ​កាល​ទី ៣ របស់​ស្ថានីយ​ទូរទស្សន៍​អប្សរា។

សូម​ជម្រាប​ដែរ​ថា តារា​ស្រី ឌី សូនីតា កន្លងមក ត្រូវ​បាន​គេ​មើល​ឃើញ​ថា សម្រាប់​អាជីព​សិល្បៈ​របស់​នាង​ហាក់​មានការ​ជោគជ័យ​ច្រើន។ លើស​ពី​នេះ ឌី សូនីតា បច្ចុប្បន្ន បាន​ក្លាយ​ជា​អ្នក​ម្ដាយ​មួយ​រូប បន្ទាប់​ពី​សាង​សម្ពន្ធភាព​ស្នេហា​ជាមួយ​តារា​ប្រុស ចន អេឡិចហ្សូរ៉ា យូរ​ឆ្នាំ​មក​នោះ។ ប៉ុន្តែ​មួយ​រយៈ​ចុង​ក្រោយ​នេះ ស្រាប់តែ​លេចឮ​ដំណឹង​រង្គោះរង្គើ​ស្នេហា​មួយ​នេះ៕

អត្ថបទ ៖ ចាន់រ៉ា