ព្រះឆាយាលក្ខណ៍​​កុមារភាពដ៏កម្រ នៃព្រះរាជបុត្រ ២ ព្រះអង្គ ប្រសូត និង​សោយ​ទិវង្គត ក្នុងខែតែមួយ

ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច បានបង្ហោះលើបណ្ដាញសង្គមថ្ងៃនេះថា ថ្ងៃទី២៨ ខែវិចិ្ឆកា ឆ្នាំ២០២២ នេះជាថ្ងៃរំលឹក ខួប១ព្រះវស្សា នៃការយាងសោយព្រះទិវង្គត សម្តេចក្រុមព្រះ នរោត្តម រណឬទ្ធិ ព្រះប្រធានក្រុមឧត្តមប្រឹក្សាផ្ទាល់ព្រះមហាក្សត្រ។ សូមថ្វាយព្រះមហាកុសលថ្វាយ ដួងព្រះវិញ្ញាណក្ខន្ធ សម្តេចក្រុមព្រះ នរោត្តម រណឬទ្ធិ សូមបានយាងទៅសោយក្នុងឋានព្រះបរមសុខកុំបីឃ្លៀងឃ្លាតឡើយ។

ព្រះអង្គម្ចាស់ នរោត្តម ចក្រាវុធ ធ្លាប់បង្ហោះ ព្រះឆាយាលក្ខណ៍កាលពីកុមារភាព ​​ដ៏កម្រ  នៃសម្តេចរាជបុត្រីព្រះរៀម នរោត្តម បុប្ផាទេវី និងសម្តេចក្រុមព្រះ នរោត្តម រណឫទ្ធិ ដែលជាព្រះរាជបុត្រាបុត្រី នៃព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងអ្នកម្នាង ផាត់ កាញ៉ុល នាដការី នៃរបាំព្រះរាជទ្រព្យ។

ព្រះរាជបុត្រទាំង២ ព្រះអង្គ​ ប្រសូត និង​សោយ​ព្រះទិវង្គត ក្នុងខែដូចគ្នា។

សម្តេច​រាជបុត្រី​ព្រះរៀម​ ​នរោត្តម​ ​បុប្ផា​ទេវី​ ​អតីតឧត្តម​ប្រឹក្សា​ផ្ទាល់​ព្រះមហាក្សត្រ​ ​និង​ជាស​មា​ជិ​កា​ក្រុមប្រឹក្សា​ធម្មនុញ្ញ ព្រះប្រសូតនៅថ្ងៃទី ០៨ ខែមករា ឆ្នាំ ១៩៤៣ និងបាន​យាង​សោយ​ទីវង្គតក្នុង​ព្រះជន្មាយុ ​៧៦ ​ព្រះវស្សា​ នៅ​មន្ទីរពេទ្យ​នៅ​ទីក្រុង​បាងកក​ប្រទេស​ថៃ ​នៅវេលា​ម៉ោង ​១២ កន្លះ​ថ្ងៃ​ត្រង់ នៅ​ថ្ងៃចន្ទ​ទី ​១៨ ​វិច្ឆិកា ឆ្នាំ ២០១៩ ដោយ​រោគា​ពាធ។

ចំណែក ម្តេចក្រុមព្រះ នរោត្តម រណឫទ្ធិ អតីតនាយករដ្ឋមន្រ្តី អតីតព្រះប្រធានរដ្ឋសភាជាតិ និងជាព្រះប្រធានឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ព្រះប្រសូតនៅថ្ងៃទី ០២ ខែមករា ឆ្នាំ ១៩៤៤ និងបានយាងសោយព្រះទិវង្គត នៅសាធារណរដ្ឋបារាំង វេលាម៉ោង ៣:៤០នាទី ម៉ោងនៅទីក្រុងភ្នំពេញ ថ្ងៃទី២៨ ខែវិច្ឆិកា ឆ្នាំ២០២១ ដោយព្រះជរាពាធ ក្នុងព្រះជន្ម ៧៧ ព្រះវស្សា៕