ពីពេលនេះទៅ អ្នកនាង សឿ សុធារ៉ា មានជម្រកសមរម្យ ជ្រកកោនជាមួយកូនៗហើយ

តារាសម្ដែង អ្នកនាង សឿ សុធារ៉ា ថ្លែងអំណរគុណដល់ថ្នាក់ដឹកនាំដែលបានផ្ដល់ទីសម្រកសមរម្យមួយ ដល់នាង និងកូនៗបានរស់នៅអាស្រ័យ កសាងជីវិតថ្មី ខណៈបច្ចុប្បន្ន អ្នកនាងបានលក់ផ្ទះសងបំណុលគេអស់ និងស្នាក់នៅ បម្រើនៅវត្ត ទីកន្លែងធ្វើបុណ្យ និងតម្កល់អដ្ឋិធាតុម្ដាយនាង។

អ្នកនាង សឿង សុធារ៉ា នៅថ្ងៃទី១២ ខែធ្នូ ឆ្ន២០២២នេះ បានបង្ហោះសារលើបណ្ដាញសង្គមហ្វេសប៊ុករបស់ខ្លួនថា៖ “នាងខ្ញុំសឿ សុធារ៉ា ព្រមទាំងកូនៗ សូមលើកដៃសំពះដឹងគុណដល់ ឯកឧត្តមរដ្ឋមន្រ្តី ក្រសួងពត៌មាន ខៀវ កញ្ញារិទ្ធ និងលោកជំទាវ “លោកពុក លោកម៉ែ” ដែលបានផ្តល់ជម្រកឱ្យនាងខ្ញុំ និងកូនៗ បានរស់រានមានជីវិតសារជាថ្មីឡើងវិញ ដែលមានតំលៃ ២០ ០០០$”។

អ្នកនាង សឿ សុធារ៉ា បានតាំងចិត្តថា ដើម្បីជាការនឹករលឹកដឹងគុណដល់លោកទាំងពីរ នាងខ្ញុំ និងកូនៗនឹងខិតខំបម្រើដល់សិល្បៈជាថ្មីឡើងវិញទាំងម្តាយ ទាំងកូនឱ្យអស់ពីកម្លាំងកាយចិត្ត ហើយក៏ដើម្បីបម្រើដល់អារម្មណ៍បងប្អូនទាំងអស់គ្នាក្នុងវិស័យសិល្បៈនេះឱ្យជាប់លាប់ មិនឱ្យលោកទាំងពីរខកបំណងឡើយ។ អ្នកនាង សឿ សុធារ៉ា និងកូន សូមជូនពរលោកទាំងពីរឱ្យមានសុខភាពរឹងមាំ មានសុភមង្គល ដើម្បីគង់ជាម្លប់នៃសិល្បៈគ្រប់វិស័យទាំងអស់។

គួរបញ្ជាក់ថា អ្នកនាង សឿ សុធារ៉ា ជួបវិបត្តិហិរញ្ញវត្ថុផ្ទាល់ខ្លួន ដោយសារធ្វើជាមេតុងទីន ហើយកូនតុងទីន រត់ចោល ដែលធ្វើឱ្យអ្នកនាងខ្ចីគេបន្ត មិនបានសង ក៏កើនការប្រាក់ រហូតលក់ផ្ទះសងគេ ប៉ុន្តែម្ចាស់ផ្ទះថ្មី បានអនុញ្ញាតឱ្យនាង និងកូនៗស្នាក់នៅបណ្ដោះអាសន្នសិន។ បន្ទាប់ពីម្ដាយរបស់អ្នកនាងបានចែកឋានកាលពីចុងខែតុលា កន្លងទៅនេះ នាងក៏សម្រេចស្នាក់នៅវត្ត វិហារត្រាញ់ ទីដែលធ្វើបុណ្យ និងតម្កល់អដ្ឋិធាតុម្ដាយនាង រហូតដល់បុណ្យ ១០០ ថ្ងៃ។ អ្នកនាងក៏បានទទួលជំនួយនានាពីមិត្តអ្នកសិល្បៈ និងមហាជន។ ស្របពេលមានការ Live និងសម្ភាសនានា អ្នកនាងបាន​ទម្លាយអាថ៌កំបាំងផ្ទាល់ខ្លួនថា ខ្លួនមានបញ្ហាផ្លូវចិត្ត ជាង ៤-៥ ឆ្នាំហើយ ដែលមហាជនក៏ធ្លាប់បានឃើញ ការបង្ហោះសារចម្លែកៗលើហ្វេសប៊ុករបស់នាង៕