សម្ដេចតេជោ ៖ ចាប់ពីនេះទៅ វិស័យអប់រំ​ និងវិស័យសុខាភិបាល គឺជាវិស័យដែលទទួលបានអាទិភាពខ្ពស់ជាងគេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងឲ្យដឹងថា គម្រោងថវិកាជាតិ សម្រាប់ប្រើប្រាស់ក្នុងឆ្នាំ ២០២៣នេះ គឺផ្តោតសំខាន់ទៅលើការបម្រើឲ្យមនុស្ស ហើយចាប់ពីឆ្នាំនេះតទៅវិស័យអប់រំ និងវិស័យសុខាភិបាល គឺវិស័យដែលទទួលអាទិភាពខ្ពស់ជាងគេ សម្រាប់ការជ្រើសរើសមន្ត្រីបម្រើការងារ។

សម្ដេចតេជោ ហ៊ុន សែន បានក្នុងពេលពិនិត្យមើលវឌ្ឍនភាពនៃការសាងសង់ «មន្ទីរពេទ្យជាតិតេជោសន្ដិភាព» និងសំណេះសំណាលជាមួយកម្មករសំណង់ នៅក្នុងការដ្ឋានមន្ទីរពេទ្យនេះប្រមាណ ១,២០០ នាក់ នៅព្រឹកថ្ងៃទី ១៩ ខែមករានេះថា ចាប់ពីឆ្នាំ ២០២៣តទៅ វិស័យអប់រំ និងវិស័យសុខាភិបាល នឹងត្រូវក្លាយជាវិស័យអាទិភាពជាងគេ ហើយក្រសួងផ្សេងទៀត ត្រូវកាត់បន្ថយការជ្រើសរើសមន្ត្រីចូលបម្រើការងារ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ចាប់ពីនេះទៅ វិស័យអប់រំ​ និងវិស័យសុខាភិបាល គឺជាវិស័យដែលទទួលបានអាទិភាពខ្ពស់ជាងគេ ក្រសួងនានា គឺកាត់បន្ថយជ្រើសរើសបុគ្គលិក ជួនកាលចូលនិវត្តន៍ ៥នាក់ ឲ្យរើសមកវិញតែ ២ ឬ ៣នាក់ទេ ប៉ុន្តែសម្រាប់គ្រូពេទ្យរបស់យើងឆ្នាំកន្លងទៅ ខ្ញុំឲ្យ ៣,០០០ៗ»៕