សម្ដេចតេជោ ហ៊ុន សែន ៖ រដូវដេញថ្លៃបានមកដល់ហើយ ពីពេលនេះរហូតដល់ថ្ងៃទី ២៣ ខែកក្កដា ឆ្នាំ ២០២៣

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ខណៈដែលការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ជិតឈានចូលនោះ គឺរដូវកាលដេញថ្លៃរបស់គណបក្សនយោបាយនានា បានចាប់ផ្ដើមហើយ។

នៅក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្ស-និស្សិតវិទ្យាស្ថានខ្មែរជំនាន់ថ្មី នាព្រឹកថ្ងៃទី ៦ ខែមីនានេះ សម្តេចតេជោ ហ៊ុន សែន បានថ្លែងថា រាជរដ្ឋាភិបាល ដែលដឹកនាំគណបក្សប្រជាជនកម្ពុជា បានអនុវត្តគោលនយោបាយជាក់ស្ដែងរួចហើយ នៅក្នុងការជួយដោះស្រាយបញ្ហានានាប្រជាពល​រដ្ឋ ហើយប្រជាព​លរដ្ឋក៏ទទួលបានផលរួចមកហើយដែរ និងពង្រីកនូវការទទួលបានផលបន្ថែមទៀត។

សម្ដេចតេជោ ហ៊ុន សែន លើកឡើងថា រដូវកាលដេញថ្លៃរបស់គណបក្សនយោបាយនានា បានមកដល់ហើយ ខណៈការបោះឆ្នោតជ្រើសតាំងតំណាងរាស្រ្ដ នឹងត្រូវធ្វើឡើងនៅថ្ងៃទី ២៣ ខែកក្កដា ឆ្នាំ ២០​២៣នេះ។

សម្ដេចតេជោ ហ៊ុន សែន បានថ្លែងបែបនេះថា «ពិតហើយ រដូវដេញថ្លៃបានមកដល់ហើយ ពីពេលនេះរហូតទៅដល់ថ្ងៃ ២៣ ខែកក្កដា ឆ្នាំ ២០២៣ គឺជារដូវដេញថ្លៃៗ ច្បាស់ជាមាន បក្សមួយនេះ គេថា ម្នាក់ត្រូវបានប៉ុនណេះរៀល បក្សនោះគេថា ម្នាក់បានប៉ុនណេះរៀល»៕