ក្រសួងវប្បធម៌ ត្រៀមរៀបចំសិក្ខាសាលា លើកកម្ពស់សុខភាព ក្នុងយុគសម័យឌីជីថល

ក្រសួងវប្បធម៌ និងវិចិត្រសិល្បៈ ប្រជុំត្រួតពិនិត្យការងារត្រៀមរៀបចំសិក្ខាសាលាស្តីពី “សុខភាពជាចម្បង ដើម្បីរក្សាសន្តិភាព និងអភិវឌ្ឍន៍វប្បធម៌ក្នុងយុគសម័យឌីជីថល”។ នេះតាមការផ្ដល់ព័ត៌មានដោយ ក្រុមការងារយេនឌ័រ ក្រសួងវប្បធម៌ និងវិចិត្រសិល្បៈ នៅរសៀលនេះ។

នៅទីស្តីការក្រសួងវប្បធម៌ និងវិចិត្រសិល្បៈ នារសៀល​ ថ្ងៃទី២២ ខែមីនា ឆ្នាំ២០២៣ លោកស្រី ឡងឌី សាន់ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈ បានដឹកនាំកិច្ចប្រជុំត្រួតពិនិត្យការងារ ត្រៀមរៀបចំសិក្ខាសាលាស្តីពី “សុខភាពជាចម្បង ដើម្បីរក្សាសន្តិភាព និងអភិវឌ្ឍន៍វប្បធម៌ ក្នុងយុគសម័យឌីជីថល”។

គោលបំណងកិច្ចប្រជុំ គឺដើម្បីជំរុញ និងលេីកទឹកចិត្តដល់មន្រ្តីក្នុងការឈ្វេងយល់អំពីរបៀបថែទាំសុខភាព ទាំងសុខភាពផ្លូវកាយ​ និងផ្លូវចិត្ត រួមចំណែកកាត់បន្ថយ​ហានិភ័យនានា ដោយបង្កើននូវទំនុកចិត្តដល់មន្រ្តី ក៏ដូចជារៀបចំឱ្យមន្រ្តីក្លាយជាធនធានដែលមានសុខភាពល្អ និងធានាបាននូវការអនុវត្តការងារឱ្យមានប្រសិទ្ធភាព និងតម្លាភាព។

ឆ្លៀតក្នុងឱកាសនោះ លោកស្រី រដ្ឋលេខាធិការ បានលើកទឹកចិត្តដល់មន្រ្តីក្រោមឱវាទទាំងអស់ឱ្យរួមគ្នាបំពេញការងារ និងសង្ឃឹមថា ការរៀបចំសិក្ខាសាលានេះនឹងដំណើរបានរលូន ប្រកបដោយភាពជោគជ័យ៕