សម្ដេចតេជោ ហ៊ុន សែន ៖ វិស័យកសិកម្មកម្ពុជា បានចូលរួមចំណែកយ៉ាងសកម្ម ក្នុងការបន្ធូរបន្ថយនូវស្ថានភាពតានតឹងផ្នែកសេដ្ឋកិច្ច

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា វិស័យកសិកម្មកម្ពុជា បានចូលរួមចំណែកយ៉ាងសកម្ម ក្នុងការបន្ធូរបន្ថយនូវស្ថានភាពតានតឹងផ្នែកសេដ្ឋកិច្ច។

ការលើកឡើងនេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីក្នុងពិធីបិទសន្និបាតបូក​សរុប​​​ការងារឆ្នាំចាស់ និងលើកទិសដៅការងារឆ្នាំថ្មីរបស់ក្រសួងកសិកម្ម រុក្ខាប្រមាញ់ និងនេសាទ នៅល្ងាចថ្ងៃទី ២៤ ខែមីនា ឆ្នាំ ២០២៣នេះ។

សម្ដេចតេជោ ហ៊ុន សែន បានវាយតម្លៃខ្ពស់ចំពោះសមិទ្ធផលការងារដែលមន្ត្រីរាជការ និងថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ សម្រេចបាននាពេលកន្លងមក ដូចដែលលោករដ្ឋមន្ត្រី ឌិត ទីណា បានរាយការណ៍។

សម្ដេចតេជោ ហ៊ុន សែន​ បានថ្លែងថា ទោះបីជាពិភពលោក បានជួបប្រទះនូវវិបត្តិនៃការឆ្លងរាលដាលជំងឺកូវីដ-១៩ និងឥទ្ធិពលអវិជ្ជមាននៃភាពតានតឹងផ្នែកភូមិសាស្រ្ដនយោបាយ ដែលបណ្ដាលមកពីសង្រ្គាមរុស្ស៊ី-អ៊ុយក្រែនក៏ដោយ តែភាពរឹងមាំនៃកសិកម្មកម្ពុជា បានចូលរួមចំណែកយ៉ាងសកម្ម ក្នុងការបន្ធូរបន្ថយនូវស្ថានភាពតានតឹងផ្នែកសេដ្ឋកិច្ច ជាពិសេសបញ្ចៀសបានទាំងស្រុងវិបត្តិស្បៀងអាហារ និងអតិផរណានៃតម្លៃស្បៀង៕