សម្ដេចតេជោ ហ៊ុន សែន អនុញ្ញាតឲ្យកីឡាការិនី​ ខាន់ ចេសា ឡើងលើវេទិកាដើម្បីសំណេះសំណាល និងសួរសុខទុក្ខ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតឲ្យកីឡាការិនីជឺ​ជិត​ស៊ូ​ ខាន់ ចេសា ឡើង​លើវេទិកាដើម្បីសំណេះសំណាល និងសួរសុខទុក្ខ បន្ទាប់កីឡាការិនីរូបនេះ ទើបមកដល់ប្រទេសកម្ពុជា​ នៅថ្ងៃនេះ។

ការអនុញ្ញាតនេះ គ្រាដែលសម្តេចតេជោ ហ៊ុន សែន នៅល្ងាចថ្ងៃទី ១ ខែឧសភា ឆ្នាំ ២០២៣នេះ បានអញ្ជើញ ជួបសំណេះសំណាលជាមួយគណៈប្រតិភូកីឡារបស់កម្ពុជា មុននឹងពួកគេចូលរួមប្រកួតកីឡាស៊ីហ្គេមលើកទី ៣២ ដែលរៀបចំឡើងនៅកម្ពុជា។

បន្ទាប់ពីកីឡាការិនីជឺ​ជិត​ស៊ូ​ ខាន់ ចេសា ឡើងដល់វេទិកា សម្ដេចតេជោ ហ៊ុន​ សែន បានសាកសួរអំពីការធ្វើដំណើរមកពីសហរដ្ឋអាមេរិក ថាតើចំណាយពេលអស់ប៉ុន្មានម៉ោង?​ កីឡាការិនី ខាន់ ចេសា បានជម្រាបជូនសម្ដេចតេជោ ហ៊ុន សែន ថា ខ្លួនចំណាយពេលធ្វើដំណើរប្រមាណជា ២០ម៉ោង។

បន្ថែមពីលើនេះ សម្ដេចតេជោ ហ៊ុន សែន ក៏បានថ្លែងអំណរគុណដល់ក្រុមគ្រួសារ ជាពិសេសជីដូន និងឪពុករបស់កីឡាការិនី ខាន់ ចេសា ដែលបានអនុញ្ញាតឲ្យចៅ និងកូន មកប្រកួតក្នុងព្រឹត្តិការណ៍ស៊ីហ្គេមតំណាងឲ្យកម្ពុជា។

សូមជម្រាបថា កាលពីព្រឹកថ្ងៃទី ១ ខែឧសភា ឆ្នាំ ២០២៣នេះ លោក ស សុខា រដ្ឋលេខាធិការក្រសួងអប់រំ យុវជន និងកីឡា បានអញ្ជើញទៅទទួលស្វាគមន៍ការមកដល់របស់កីឡាការិនី ខាន់ ចេសា និងក្រុមគ្រួសារ នៅអាកាសយានដ្ឋានអន្តរជាតិភ្នំពេញ ដើម្បីចូលរួមការប្រកួតក្នុងព្រឹត្តិការណ៍កីឡាស៊ីហ្គេមលើកទី ៣២ និងអាស៊ានប៉ារ៉ាហ្គេម លើកទី ១២៕