៦ឆ្នាំ មូលនិធិពិសេស មេគង្គ-ឡានឆាង គាំទ្រហិរញ្ញវត្ថុដល់កម្ពុជា ជិត ៩០ គម្រោង

រយៈពេល ៦ ឆ្នាំកន្លងមកនេះ គម្រោងរបស់កម្ពុជាជិត៩០ ទទួលបានការគាំទ្រជាហិរញ្ញវត្ថុពីមូលនិធិពិសេសសម្រាប់​គម្រោងកិច្ចសហ​ប្រតិ​បត្តិ​ការ ​​​​មេគង្គ-ឡានឆាង។ នេះបើតាមការថ្លែងឱ្យដឹងរបស់ប្រមុខការទូតកម្ពុជា ក្នុងពិធីចុះ​ហត្ថ​​​លេខារួមគ្នា​លើកិច្ចព្រមព្រៀង ស្ដីពី​​ មូលនិធិពិសេស មេគង្គ-ឡានឆាង​ ឆ្នាំ២០២៣ នៅថ្ងៃទី១៤ ខែមិថុនានេះ។

លោក ប្រាក់ សុខុន ប្រមុខការទូតកម្ពុជា បានបញ្ជាក់ថា ជោគជ័យនៃគម្រោងទាំងនេះបានឆ្លុះបញ្ចាំងអំពីសារៈសំខាន់នៃភាពជាអ្នកជិតខាងល្អ មិត្តភាព សមភាព និងការគោរពគ្នាទៅវិញទៅមក។ លោកបន្តថា គោលការណ៍ទាំងនេះ នឹងបន្តជាមូលដ្ឋានដ៏សំខាន់នៅក្នុងកិច្ចសហប្រតិបត្តិការ នាពេលបច្ចុប្បន្ន និងទៅអនាគតរបស់ប្រទេសជាសមាជិក។

បើតាមលោកប្រមុខការទូតកម្ពុជា សម្រាប់នៅឆ្នាំ២០២៣នេះ កម្ពុជាទទួលបានការគាំទ្រជាហិរញ្ញវត្ថុពីមូលនិធិពិសេសនេះ ជាទឹកប្រាក់ជិត ២ លានដុល្លារអាមេរិក លើគម្រោងចំនួន ៩។ លោក ប្រាក់ សុខុន បញ្ជាក់ថា បើទោះបីជាគម្រោងទាំងនេះ មានទំហំតូចជាងគម្រោងស្ថិតនៅក្រោមគំនិតផ្តួចផ្តើមខ្សែក្រវ៉ាត់ និងផ្លូវយ៉ាងណាក៏ដោយ ​តែគម្រោងទាំងនេះ គឺជាសក្ខីភាពនៃការប្តេជ្ញាចិត្តឥតងាករេរបស់សាធារណរដ្ឋប្រជាមានិតចិនចំពោះការអភិវឌ្ឍនៅក្នុងអនុតំបន់ទន្លេមេគង្គ។

លោក ប្រាក់ សុខុន បានថ្លែងរំលឹកថា កាលពី ៧ឆ្នាំមុន​ នៅពេលថ្នាក់ដឹកនាំនៃប្រទេសជាសមាជិកបានប្រកាសអនុវត្តមូលនិធិ​ពិសេសសម្រាប់​គម្រោងកិច្ច​សហប្រតិបត្តិការ ​មេគង្គ-ឡានឆាង បានបង្ហាញក្ដីសង្ឃឹម និងការរំពឹងទុកខ្ពស់ ដោយសារនេះជាក្របខណ្ឌកិច្ច​សហប្រតិបត្តិការតំបន់មេគង្គដំបូងបង្អស់ ដែលបង្កើតឱ្យមានមូលនិធិពិសេស ដើម្បីផ្តល់ហិរញ្ញប្បទានដល់គម្រោងកិច្ចសហប្រតិបត្តិការ ដែលផ្តល់លទ្ធផលក្នុងរយៈពេលខ្លីចំពោះការអភិវឌ្ឍ។

លោក ប្រាក់ សុខុន មានប្រសាសន៍បន្ថែមថា នៅថ្ងៃនេះ មូលនិធិពិសេសនេះបានសម្រេចតាមការប្តេជ្ញារបស់ប្រទេសជាសមាជិកក្នុងការផ្តល់អាទិភាពដល់ការអភិវឌ្ឍរួម តាមរយៈការបង្កើតបាននូវលទ្ធផលជាក់ស្តែងក្នុងរយៈពេលខ្លី និងដាក់ចេញជាគំនិតផ្តួចផ្តើមសម្រាប់សកម្មភាពអភិវឌ្ឍន៍ប្រកបដោយបរិវត្តកម្ម។ លោក ថ្លែងថា មូលនិធិនេះ ក៏បានពង្រីកច្រើនទៀតលើវិស័យសំខាន់ៗមួយចំនួនរួមមាន៖ ការលុបបំបាត់ភាពក្រីក្រ ​​សុខាភិបាល អប់រំ ប្រព័ន្ធផ្សព្វផ្សាយ ទេសចរណ៍ ព័ត៌មាន និងបច្ចេកវិទ្យា ការផ្លាស់ប្តូរវប្បធម៌ និងសាសនា កសិកម្ម បរិស្ថាន និងការផ្តល់អំណាចដល់ស្ត្រី។

តាងនាមរាជរដ្ឋាភិបាល លោក ប្រាក់ សុខុន បានអះអាងសាជាថ្មីនូវការប្តេជ្ញាចិត្តរបស់កម្ពុជា ក្នុងកិច្ចសហប្រតិបត្តិការយ៉ាងជិតស្និទ្ធនៅគ្រប់កម្រិត និងទិដ្ឋភាពទាំងអស់ ដើម្បីសម្រេចឱ្យបានចក្ខុវិស័យរបស់ថ្នាក់ដឹកនាំនៃក្របខណ្ឌកិច្ចសហប្រតិបត្តិការនេះ ក្នុងការកសាងសហគមន៍វាសនារួម​នៃ​សន្តិភាព  វិបុលភាព​ និង​ការអភិវឌ្ឍប្រកបដោយ​ចីរភាព​ក្នុងបណ្តាប្រទេសសមាជិក មេគង្គ-ឡានឆាង៕​

អត្ថបទ៖ ធឿន វ៉ាន់សុង / រូបភាព៖ ក្រសួងការបរទេសកម្ពុជា