Taylor Swift ផ្តល់ប្រាក់រង្វាន់រាប់លានដុល្លារ ដល់អ្នកដែលធ្វើការក្នុងការប្រគំតន្ត្រីរបស់នាង

ការប្រគំតន្ត្រីរបស់ Taylor Swift ត្រូវបានព្យាករណ៍ថា “នឹងក្លាយជាការប្រគំតន្ត្រីដ៏ធំបំផុតក្នុងប្រវត្តិសាស្ត្រ រកចំណូលបានលើសពី ១ ពាន់លានដុល្លារអាមេរិក” ទើបនាងមិនញញើតនឹងផ្ដល់រង្វាន់ខ្លះសម្រាប់អ្នករួមការងារទេ ។

កាលពីថ្ងៃអង្គារ ទី១ ខែសីហា សារព័ត៌មាន TMZ បានរាយការណ៍ថា Taylor Swift ផ្តល់រង្វាន់ដល់​អ្នក​ដឹក​ជញ្ជូនប្រហែល ៥០ នាក់ ក្នុងម្នាក់ ១០ ម៉ឺនដុល្លារ ព្រោះពួកគេបានបំពេញការងារដឹកជញ្ជូនសម្ភារៈប្រគំតន្ត្រីដោយជោគជ័យ ។

ប្រភពមួយផ្សេងទៀតបានប្រាប់ទស្សនាវដ្តី People ថា Taylor ក៏ឲ្យប្រាក់រង្វាន់ដល់អ្នករួមការងារផ្សេងៗដែរ រួមមានអ្នករាំ អ្នកហាត់សម អ្នកបច្ចេកទេសសំឡេង និងអ្នកចាត់ចែងម្ហូបអាហារ ដែលសរុបជាទឹកប្រាក់ជាង ៥៥ លានដុល្លារអាមេរិកឯណោះ ។

គួររំលឹកថា ការប្រគំតន្ត្រី Swift’s The Eras Tour នឹងធ្វើឡើងនៅពហុកីឡដ្ឋានជាតិប្រទេសសិង្ហបុរី ចាប់ពីថ្ងៃទី០១ ដល់ថ្ងៃទី០៤ ខែមីនា និងពីថ្ងៃទី០៧ ដល់ថ្ងៃទី០៩ ខែមីនា ឆ្នាំ ២០២៤ ។ ក្នុងនោះមានអ្នកគាំទ្រចូលរួមប្រហែល ៣០០,០០០ នាក់ ខណៈឯសំបុត្រវិញ មានតម្លៃចន្លោះពី ៨៨ ដុល្លារ ទៅ ១,២២៨ ដុល្លារ ប៉ុន្តែលក់អស់គ្មានសល់ ៕

ប្រែសម្រួល៖ វារី

ប្រភព៖ CNA

ចុចអាន៖ អ្នកគាំទ្រ Taylor Swift ចាញ់បោកគេអស់ជាង ៤៥០០០ ដុល្លារ ដើម្បីទិញសំបុត្រទៅប្រគំតន្ត្រី