ស្វែងយល់ពីអត្ថប្រយោជន៍នៃការប្រើប្រាស់បច្ចេកវិទ្យា 3D Printing

3D Printing គឺជាបច្ចេកវិទ្យាផលិតកម្ម (Manufacturing Technology) មួយដែលត្រូវបានបង្កើតឡើង​ក្នុងទសវត្សរ៍ឆ្នាំ១៩៨០។ ចាប់តាំងពីពេលនោះមក បច្ចេកវិទ្យានេះបានវិវត្តន៍ខ្លួនពីឧបករណ៍ បង្កើតគំរូរហ័ស (Rapid Prototyping Tool) ទៅជាបច្ចេកវិទ្យាផលិតកម្មពេញលេញ ដែលត្រូវបានប្រើប្រាស់ក្នុងដំណើរការផលិតកម្ម។ តើការប្រើប្រាសបច្ចេកវិទ្យាប្រភេទនេះ មានគុណប្រយោជន៍អ្វីខ្លះ?

មជ្ឃមណ្ឌុលកម្ពុជា ៤.០ បានបង្ហាញឱ្យដឹងអំពីគុណសម្បត្ដិមួយចំនួននៃបច្ចេកកវិទ្យា 3D Printing នេះរួមមាន៖

១. គុណសម្បត្តិប្រកួតប្រជែង (Competitive Advantage)៖ បច្ចេកវិទ្យា 3D Printing ផ្តល់នូវសមត្ថភាព ក្នុងការកាត់បន្ថយពេលវេលាសម្រាប់ការធ្វើគំរូ ដែលមានអត្ថប្រយោជន៍សម្រាប់អាជីវកម្មក្នុងការពង្រឹង គុណភាព​ផលិតផល​ឱ្យកាន់តែប្រសើរ ហើយធ្វើការកែលម្អក្នុងរយៈពេលខ្លី។ បច្ចេកវិទ្យានេះ អនុញ្ញាតដោយហេតុថា វាអាចបង្កើតឱ្យអាជីវកម្មធ្វើការចែកចាយផលិតផលចូលទីផ្សារមុនដៃគូប្រកួតប្រជែងគំរូបានញឹកញាប់ និងមាន​ភាពរហ័ស ព្រមទាំងធ្វើឱ្យផលិតផលមានភាពល្អឥតខ្ចោះទៀតផង។

២. ល្បឿន (Speed)៖ មុនពេលការមកដល់នៃបច្ចេកវិទ្យា 3D Printing អាជីវកម្មប្រើប្រាស់ពេលជាច្រើន សប្ដាហ៍ដើម្បីអាចបញ្ចេញនូវផលិតផលរបស់ខ្លួន ហើយរាល់ការកែតម្រូវចាំបាច់ត្រូវរៀបចំឡើងវិញ​នូវដំណើរការ​ជាសារថ្មី និងចំណាយពេលយូរដើម្បីអាចបញ្ចេញជាផលិតផលសម្រេច។ យ៉ាងណាមិញ បច្ចេកវិទ្យា 3D Printing បានអនុញ្ញាតឱ្យម្ចាស់អាជីវកម្មការធ្វើការរចនាផលិត និងធ្វើការសាកល្បង ដោយពុំចំណាយពេលច្រើនឡើយ។

៣. កាត់បន្ថយការចំណាយ (Cost Reduction)៖ ការបោះពុម្ព 3D ចំណាយទាបជាងការបោះពុម្ពបែប បុរាណទៅលើការផលិត ដោយហេតុថាវិធីសាស្រ្តគំរូបែបបុរាណ ដូចជា ការប្រើប្រាស់ម៉ាស៊ីន CNC ដែលតម្រូវ​ឱ្យមានម៉ាស៊ីនដែលមានតម្លៃថ្លៃ, ថ្លៃពលកម្មខ្ពស់ និងតម្រូវឱ្យមានអ្នកបច្ចេកទេសក្នុងការគ្រប់គ្រង។ ការប្រើប្រាស់​បច្ចេកវិទ្យា 3D Printing កាត់បន្ថយចំណាយថ្លៃដើមព្រមទាំងថ្លៃក្នុងដំណើរការផលិតកម្ម ដូចជា ម៉ាស៊ីន និងពលកម្ម ហើយប្រើប្រាស់វត្ថុធាតុដើមតិចផងដែរ។

៤. គុណភាព និងភាពស៊ីសង្វាក់គ្នា (Quality and Consistency)៖ បច្ចេកវិទ្យា 3D Printing អាចពង្រឹង នូវគុណភាព និងភាពស៊ីសង្វាក់គ្នា ជាក់ស្ដែងបច្ចេកវិទ្យានេះត្រូវបានប្រើប្រាស់ក្នុងការតាមដានខ្សែច្រវាក់ ផលិតកម្មទាំងក្នុងអំឡុងពេលនៃការផ្គុំផលិតផល, តាមដានជំហានបន្តបន្តាប់ និងការលើកកម្ពស់ការ រចនាផលិតផល​ជាដើម។ ការធ្វើបែបនេះធានាបានថាផលិតផលមានគុណភាពខ្ពស់ និងដំណើរការ បានកាន់តែប្រសើរ។

៥. កាត់បន្ថយការខូចខាត (Reduction Error)៖ ដោយហេតុថាបច្ចេកវិទ្យា 3D Printing ពង្រឹងនូវ គុណភាព និងភាពស៊ីសង្វាក់គ្នាក្នុងខ្សែច្រវាក់ផលិតកម្ម ដូចនេះបានធ្វើឱ្យអាជីវកម្មអាចកាត់បន្ថយ ហានិភ័យនៅក្នុងផលិត​កម្មរបស់ខ្លួន។ បច្ចេកវិទ្យា 3D Printing អនុញ្ញាតឱ្យអ្នករចនាធ្វើការផ្ទៀងផ្ទាត់គំរូជាមុន ដើម្បីស្វែងរកនូវកំហុស និងការខូចខាតណាមួយទាក់ទងនឹងផលិតផល មុននឹងឈានដល់ដំណាក់កាលនៃការផលិត។

៦. និរន្តរភាព (Sustainability)៖ ខណៈពេលដែលការប្រើប្រាស់នូវវិធីសាស្ត្របែបប្រពៃណីក្នុងដំណើរការ ផលិតត្រូវបានគេមើលឃើញថាមានភាពខ្ជះខ្ជាយនៃវត្ថុធាតុដើម និងពុំអាចធ្វើឱ្យប្រើឡើងវិញឡើយ ខណៈដែល​បច្ចេកវិទ្យា 3D Printing ត្រូវបានអ្នកជំនាញមើលឃើញថាជាជម្រើសល្អជាងការផលិតបែបប្រពៃណី ក្រោមហេតុផលថាបច្ចេកវិទ្យានេះធ្វើការប្រើប្រាស់ជាច្រើនសារ និងអាចកែច្នៃឡើងវិញ។ ហើយកាកសំណល គឺមានភាពតិចតួច និងមានផលប៉ះពាល់ដល់បរិស្ថានក្នុងកម្រិតតិចតួចបំផុត។ ជាឧទហរណ៍ វត្ថុធាតុដើមដូចជា Thermoplastic ជាដើមអាចធ្វើការរំលាយបានម្តងហើយម្តងទៀត។

សូមបញ្ជាក់ឱ្យដឹងផងថា 3D printing សំដៅដល់បច្ចេកវិទ្យាផលិតកម្មដែលបំប្លែងការរចនា CAD (Computer-Aided Design) ឬកម្មវិធី Software ផ្សេងៗ ទៅជា Three-Dimensional Solid ដោយដាក់ជាស្រទាប់​ស្តើងៗនៃវត្ថុធាតុនីមួយៗជាបន្តបន្ទាប់ ឬនិយាយយ៉ាងសាមញ្ញថា 3D Printing ជាបច្ចេកវិទ្យាបំប្លែងការរចនានិម្មិត​ទៅជាវត្ថុរូបវន្ត។ នេះជាការសង្ខេបដកស្រង់ចេញពីករណីសិក្សាក្នុងប្រទេសកម្ពុជា, តំបន់អាស៊ាននិងសហរដ្ឋអាម៉េរិក របស់មជ្ឃមណ្ឌុលកម្ពុជា ៤.០៕

អត្ថបទ៖ ផល ធារិត