រដ្ឋាភិបាលឯកឧត្តម ហ៊ុន ម៉ាណែត នឹងធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលស្អាតស្អំ

រាជរដ្ឋាភិបាល អាណត្តិទី៧ នឹងអនុវត្តតាមយុទ្ធសាស្ត្របញ្ចកោណ ដំណាក់កាលទី១ ដែលស្នូលនៃយុទ្ធសាស្ត្រនេះ គឺការកែទម្រង់ និងការពង្រឹងអភិបាលកិច្ច ដើម្បីធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈទំនើប និងស្អាតស្អំ។

ក្នុងសម័យប្រជុំពេញអង្គគណៈរដ្ឋមន្ត្រី ជាលើកដំបូង នៅថ្ងៃទី២៤ ខែសីហា ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា ស្នូលនៃយុទ្ធសាស្ត្របញ្ចកោណនេះ គឺផ្តោតលើអភិបាលកិច្ច និងការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ។

បើតាមឯកឧត្តមបណ្ឌិត ហ៊ុន ម៉ាណែត ការធ្វើទំនើបកម្មស្ថាប័នរដ្ឋនេះ ត្រូវធ្វើឡើងតាមរយៈការអនុវត្តសិទ្ធិអំណាចរដ្ឋខាងផ្នែកនយោបាយ សេដ្ឋកិច្ច និងរដ្ឋបាល ក្នុងការដឹកនាំ គ្រប់គ្រង និងចាត់ចែងកិច្ចការជាតិ ជាពិសេសការធានានិរន្តរភាពនៃតួនាទី និងដំណើរការរដ្ឋបាលសាធារណៈ ដោយយកចិត្តទុកដាក់លើប្រយោជន៍ប្រជាជន ក៏ដូចជា ការពង្រឹងនីតិរដ្ឋ។

ក្នុងន័យនេះ រាជរដ្ឋាភិបាល អាណត្តិទី៧ ក្រោមការដឹកនាំរបស់ឯកឧត្តមបណ្ឌិត ហ៊ុន ម៉ាណែត នឹងបន្តផ្តោតជាសំខាន់លើការពង្រឹង និងការកែទម្រង់ស្ថាប័ន ដោយកសាងរដ្ឋបាលសាធារណៈឱ្យមានសមត្ថភាពខ្ពស់ ខ្លាំង វៃឆ្លាត និងស្អាតស្អំ ដើម្បីបម្រើផលប្រយោជន៍ប្រជាជន។ ក្នុងនោះ រាជរដ្ឋាភិបាល នឹងខិតខំលើកកម្ពស់ និងពង្រឹងភាពស្អាតស្អំ ភាពសុចរិត និងជំនឿទុកចិត្តចំពោះរដ្ឋបាលសាធារណៈ ដើម្បីរួមចំណែកដល់ការអភិវឌ្ឍសង្គម-សេដ្ឋកិច្ច ប្រកបដោយប្រសិទ្ធភាព បរិយាប័ន្ន និងចីរភាព។

លើសពីនេះ រាជរដ្ឋាភិបាល ក៏នឹងបន្តការលើកកម្ពស់ និងការពង្រឹងប្រសិទ្ធភាពនៃច្បាប់ និងប្រព័ន្ធយុត្តិធម៌ឱ្យកាន់ខ្លាំងក្លាថែមទៀត ដែលមានគោលដៅយុទ្ធសាស្ត្រផ្តោតលើការពង្រឹងគោលការណ៍នីតិរដ្ឋ ការពង្រឹងការប្រយុទ្ធប្រឆាំងអំពើបំពាន ដោយអយុត្តិធម៌ក្នុងសង្គម ដើម្បីទាញជំនឿទុកចិត្តពីសាធារណជនមកលើវិស័យយុត្តិធម៌។

ការធ្វើទំនើបកម្មស្ថាប័នឱ្យមានភាពស្អាតស្អំនេះទៀតសោត រាជរដ្ឋាភិបាល ក៏នឹងផ្ដោតលើការលើកកម្ពស់សមត្ថភាពធនធានមនុស្ស និងការពង្រឹងប្រសិទ្ធភាពនៃការអនុវត្តការងារផងដែរ ដោយកសាងធនធានមនុស្សឱ្យមានសមត្ថភាពខ្ពស់ ប្រកបដោយជំនាញ ឆន្ទៈ ម្ចាស់ការ និងក្រមសីលធម៌វិជ្ជាជីវៈ ស្របតាមតួនាទី និងការទទួលខុសត្រូវ៕