សម្ដេច ហ៊ុន ម៉ាណែត ប្រកាសសផ្អាកការផ្ដល់សេវារដ្ឋបាលមួយចំនួន របស់រដ្ឋបាលក្រុង ស្រុក ខណ្ឌ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានប្រកាសផ្អាកការផ្ដល់សេវារដ្ឋបាលមួយ របស់រដ្ឋបាលក្រុងស្រុក ខណ្ឌ។ ខណៈដែលការសម្រេចនេះ គឺធ្វើឡើងក្នុងគោលបំណង ដើម្បីជួយសម្រួលបន្ទុក ការចំណាយរបស់អាជីវករតូចតាចនៅក្នុងសេដ្ឋកិច្ចក្រៅប្រព័ន្ធ។

បើតាមសេចក្ដីសម្រេចនេះ ប្រជាពលរដ្ឋដែលប្រកបអាជីវកម្មតូចតាចដូចមានចែងក្នុង សេចក្ដីសម្រេច គឺមិនចាំបាច់សុំច្បាប់អនុញ្ញាតពីរដ្ឋបាល ក្រុង ស្រុក​ ខណ្ឌ ទៀតឡើយ។

ជាមួយគ្នានេះ សម្ដេចធិបតី​ ហ៊ុន ម៉ាណែត បានបញ្ជាក់នៅលើគណនីហ្វេសប៊ុក របស់សម្ដេចថា “រាជរដ្ឋាភិបាលផ្តល់អាទិភាពខ្ពស់បំផុត ក្នុងការបង្កលក្ខណៈងាយស្រួល ព្រមទាំងផ្តល់ប្រយោជន៍ ថែបំប៉ន និងលើកកម្ពស់ការយល់ដឹង ដល់អ្នកប្រកបអាជីវកម្ម មុខរបរ និងការងារ ដែលស្ថិតនៅក្នុងសេដ្ឋកិច្ចក្រៅប្រព័ន្ធ”។

 ក្នុងគោលដៅនេះ រាជរដ្ឋាភិបាលបាននិងកំពុងរៀបចំ យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ ២០២៣-២០២៨ ដែលនឹងត្រូវឱ្យអនុវត្តក្នុងពេលឆាប់ៗខាងមុខ៕