៩ ខែ ឆ្នាំនេះ ទឹកជំនន់ បង្កឲ្យមនុស្សស្លាប់-របួស ១២ នាក់ ប៉ះពាល់ពលរដ្ឋជិត ៣ ម៉ឺនគ្រួសារ

នៅ​ក្នុង​រយៈពេល ៩ ខែ ឆ្នាំ ២០២៣ នេះ ទឹកជំនន់​ទន្លេ​មេគង្គ និង​ជំនន់​ទឹកភ្លៀង បាន​បណ្ដាល​ឲ្យ​មនុស្ស​ស្លាប់ និង​របួស ១២ នាក់ ប៉ះពាល់​ប្រជាពលរដ្ឋ​ជិត ៣ ម៉ឺន​គ្រួសារ ផ្ទះ​ជាង ១ ម៉ឺន ៥ ពាន់​ខ្នង ជម្លៀស​ប្រជាពលរដ្ឋ​ជាង ២ ពាន់​គ្រួសារ និង​ហេដ្ឋារចនាសម្ព័ន្ធ​មួយ​ចំនួន​ទៀត។

លោក សុទ្ធ គឹមកុលមុនី អ្នកនាំពាក្យ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​មាន​ប្រសាសន៍​នៅ​ព្រឹក​ថ្ងៃ​ទី ០៥ តុលា​នេះ​ថា រយៈពេល ៩ ខែ ឆ្នាំនេះ ទឹកជំនន់ និង​ជំនន់​ទឹកភ្លៀង ប៉ះពាល់​រាជធានី​ខេត្ត​ចំនួន ២០ ស្មើនឹង ៧៨ ស្រុក​ក្រុង ២៤៩ ឃុំ​សង្កាត់ ប៉ះពាល់​ប្រជាពលរដ្ឋ​ចំនួន ២៩៤៨៩ គ្រួសារ ជម្លៀស​ប្រជាពលរដ្ឋ ២០២៩ គ្រួសារ ស្លាប់​មនុស្ស ៦ នាក់ និង​របួស ៦ នាក់ ផ្ទះ ១៥៥៤៩ ខ្នង ខូចខាត ១០៦ ខ្នង សាលារៀន ៨៦ កន្លែង វត្ត​អារាម ២៤ កន្លែង ជម្លៀស​សត្វពាហណៈ ៦៨៧៨ ក្បាល ងាប់ ៦ ក្បាល សន្ទូង ២២៧១៣ ហិតា ខូចខាត ៤៥៨៣ ហិតា សំណាប ១៧៩ ហិតា ដំណាំ​រួមផ្សំ ៣០១៦ ហិកតា ខូចខាត ១២៩៧ ហិកតា ផ្លូវ​កៅស៊ូ និង​បេតុង ៥០៦៩ ម៉ែត្រ ផ្លូវលំ​ជនបទ ១៧៤៨៧៦ ម៉ែត្រ ស្ពាន ៥៣ កន្លែង ទំនប់ ២៤៥៨៦ ម៉ែត្រ និង​ច្រាំងទន្លេ ៣០០៥ ម៉ែត្រ។

លោក​បាន​បន្ត​ថា ថ្មីៗ​នេះ ជំនន់​ទឹកភ្លៀង​បាន​ប៉ះពាល់​ដល់​ខេត្ត​ចំនួន ៧ រួមមាន ខេត្ត​ពោធិ៍សាត់ បាត់ដំបង សៀមរាប កំពង់ធំ ព្រះវិហារ បន្ទាយមានជ័យ និង​ខេត្ត​កណ្តាល បណ្តាល​ឲ្យ​ប៉ះពាល់​ប្រជាពលរដ្ឋ​ចំនួន ២៨៧១៦ គ្រួសារ លិច​ផ្ទះ ១៥៣៩៣ ខ្នង ជម្លៀស​ប្រជាពលរដ្ឋ ១៨១០ គ្រួសារ ដំណាំ​ស្រូវ ២១៨៥០ ហិតា និង​ដំណាំ​រួមផ្សំ ៤១៧២ ហិកតា។

យោង​តាម​ក្រសួង​ធនធាន​ទឹក និង​ឧតុនិយម បាន​ឲ្យ​ដឹង​ថា ចាប់ពី​ថ្ងៃ​ទី ៤ ដល់ ថ្ងៃ​ទី ៦ ខែ​តុលា នេះ ប្រទេស​កម្ពុជា នឹង​អាច​មាន​ភ្លៀង​ធ្លាក់​គ្របដណ្ដប់ នៃ​បណ្ដា​ខេត្ត​ក្រុង​ទាំងអស់​នៅ​ក្នុង​កម្រិត​ពី​ខ្សោយ ទៅ​បង្គួរ ជាមួយ​នឹង​ទំហំ​ទឹកភ្លៀង​ធ្លាក់​គ្របដណ្ដប់​លើ​ផ្ទៃដី ពី ៤០ ទៅ ៦០%៕

អត្ថបទ ៖ សំអឿន