ព័ត៌មានអន្ដរជាតិ

លោក បៃដិន៖ អ៊ីស្រាអែល កំពុងបាត់ការគាំទ្រជាសកល ដោយសារប្រតិបត្តិការទម្លាក់គ្រាប់បែកនៅ ហ្គាហ្សា

បានផុស

២ years មុន

នៅ

ថ្ងៃពុធ ១៣ ធ្នូ ២០២៣

ដោយ

ប្រធានាធិបតីអាមេរិក លោក ចូ បៃដិន និយាយថា អ៊ីស្រាអែល ចាប់ផ្តើមបាត់បង់ការគាំទ្រជាសកលហើយ ដោយសារតែការទម្លាក់គ្រាប់បែកមិនរើសមុខ នៅតំបន់ហ្គាហ្សា។

ប្រធានាធិបតីអាមេរិក លោក ចូ បៃដិន (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់គាត់ធ្វើឡើងចំពោះម្ចាស់ជំនួយ ក្នុងព្រឹត្តិការណ៍រៃអង្គាសប្រាក់កាលពីថ្ងៃអង្គារទី១២ខែធ្នូ ហើយនេះត្រូវបានគេមើលឃើញថា ជាការរិះគន់ខ្លាំងបំផុតរបស់គាត់ ចំពោះថ្នាក់ដឹកនាំអ៊ីស្រាអែល។

លោក បៃដិន បានផ្តល់ការគាំទ្រជាសាធារណៈឥតងាករេដល់អ៊ីស្រាអែល ចាប់តាំងពីក្រុមហាម៉ាស បើកការវាយប្រហាររបស់ខ្លួនកាលពីថ្ងៃទី៧ខែតុលា ហើយថ្វីបើគាត់តែងតែរំលឹកថា អ៊ីស្រាអែលអាចពឹងផ្អែកលើការគាំទ្ររបស់សហរដ្ឋអាមេរិកក៏ដោយ ប៉ុន្តែពេលនេះ គាត់ស្រាប់តែចេញការព្រមានដោយផ្ទាល់ទៅកាន់រដ្ឋាភិបាលទីក្រុងហ្ស៊េរុយសាឡិម តែម្តង។

លោកបានប្រាប់ម្ចាស់ជំនួយចំពោះយុទ្ធនាការឃោសនាបោះឆ្នោតអាណត្តិទី២ឆ្នាំ២០២៤ថា “សន្តិសុខរបស់អ៊ីស្រាអែល អាចពឹងផ្អែកលើសហរដ្ឋអាមេរិក ប៉ុន្តែឥឡូវនេះពួកគេខ្លាំងសហរដ្ឋអាមេរិកទៅទៀត ប៉ុន្តែពួកគេចាប់ផ្តើមបាត់បង់ការគាំទ្រជាសកលហើយ ដោយសារការទម្លាក់គ្រាប់បែកមិនរើសមុខដែលកំពុងកើតឡើង”។

តំបន់ហ្គាហ្សា រងការទម្លាក់គ្រាប់បែក (រូបថត៖ Getty)

ទោះបីជាយ៉ាងណាក៏ដោយ លោក បៃដិន បន្ថែមថា មិនបាច់សួរអំពីតម្រូវការដើម្បីកម្ចាត់ក្រុមហាម៉ាសទេ ហើយអ៊ីស្រាអែលមានសិទ្ធិគ្រប់យ៉ាងក្នុងការធ្វើដូច្នេះ។

មុននេះ នាយករដ្ឋមន្ត្រីអ៊ីស្រាអែលលោក Benjamin Netanyahu ក៏និយាយដែរថា ភាគីទាំងពីរ ខ្វែងគំនិតគ្នាលើវិធីគ្រប់គ្រងស្ថានភាពតំបន់ហ្គាហ្សា ក្រោយចប់សង្គ្រាម។

លោក Netanyahu និយាយក្នុងវីដេអូមួយកាលពីថ្ងៃអង្គារទី១២ខែធ្នូថា “ពិតណាស់ មានការខ្វែងគំនិតគ្នាមែន រវាងសហរដ្ឋអាមេរិកនិងអ៊ីស្រាអែល អំពីសម័យក្រោយអស់ក្រុមហាម៉ាស។ ខ្ញុំចង់បង្ហាញជំហររបស់ខ្ញុំឲ្យបានច្បាស់ ខ្ញុំនឹងមិនអនុញ្ញាតឲ្យអ៊ីស្រាអែល សាងកំហុសដូចកិច្ចព្រមព្រៀងសន្តិភាពទីក្រុង អូស្លូ ទេ”។

តំបន់ហ្គាហ្សា រងការទម្លាក់គ្រាប់បែក (រូបថត៖ Anadolu)

យ៉ាងណាក្តី លោក Netanyahu មិនបានបញ្ជាក់ថាតើនោះជាកំហុសអ្វីទេ។ ទីក្រុងអូស្លូ នៃប្រទេសន័រវែស គឺជាកន្លែងភាគីទាំង២ ចុះហត្ថលេខាលើកិច្ចព្រមព្រៀងឆ្នាំ១៩៩៣ ដោយមានសហរដ្ឋអាមេរិកជាអ្នកសម្រុះសម្រួល ដែលក្នុងនោះ អ៊ីស្រាអែល ទទួលយកអង្គការរំដោះប៉ាឡេស្ទីន (PLO) ជាអ្នកតំណាងប្រជាជនប៉ាឡេស្ទីន។

កាលនោះ ភាគីទាំងពីរបានព្រមព្រៀងគ្នាថា អាជ្ញាធរប៉ាឡេស្ទីននឹងគ្រប់គ្រងតំបន់ វេសប៊េង និង ហ្គាហ្សាស្រ្ទីប ដោយនាំក្តីសង្ឃឹមសម្រាប់គោលការណ៍ដើម្បីសម្រេចបាននូវគំរូរដ្ឋពីរ៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក Netanyahu ទម្លាយមូលហេតុដែលអ៊ីស្រាអែលនិងអាមេរិក ខ្វែងគំនិតគ្នា

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា