ស្អែករដ្ឋមន្ត្រីទេសចរណ៍ នឹងទៅទទួលនាវា Westerdam នៅកំពង់ផែព្រះសីហនុ

 នៅព្រឹកស្អែក ថ្ងៃទី២៨ ខែធ្នូ ឆ្នាំ២០២៣ តាមការគ្រោងទុកនាវា Westerdam នឹងចូលចតនៅកំពង់ផែស្វយ័តក្រុងព្រះសីហនុជាថ្មីម្ដងទៀត បន្ទាប់ពីនាវានេះ ត្រូវបានសម្ដេចតេជោ ហ៊ុន សែន បើកបេះដូងមនុស្សធម៌អនុញ្ញាតឱ្យចូលចតនៅកម្ពុជាដោយមិនខ្លាចឆ្លងមេរោគកូវីដ១៩។ ជុំវិញការមកដល់កម្ពុជាជាថ្មីម្ដងទៀតនេះ រដ្ឋមន្ត្រីក្រសួងទេសចរណ៍ លោក សុខ សូកេន នឹងទៅទទួលនាវាទេសចរណ៍ Westerdam ដោយផ្ទាល់។  នេះបើតាមគម្រោងនៃកម្មវិធីដែលចេញដោយរដ្ឋបាលខេត្តព្រះសីហនុ។

បើគ្មានការប្រែប្រួលទេ នាវា Westerdam នឹងចូលចតនៅកំពង់ផែស្វយ័តក្រុងព្រះសីហនុ(ផែចាស់) នៅពេលវេលាម៉ោង៨៖០០ នាទីព្រឹក។ ក្រោយចូលចតដោយសុវត្ថិភាព ភ្ញៀវទេសចរណ៍ នឹងចុះចេញពីនាវា ក្នុងពេលចុះពីនាវានោះ គណប្រតិភូកម្ពុជា នឹងទទួលស្វាគមន៍ថែមទាំងបំពាក់ក្រមារបស់ខ្មែរជូនភ្ញៀវទេសចរណ៍ទាំងនោះ។ បន្ថែមពីនេះ ក្រុមសិល្បៈ ក៏សម្ដែងរបាំជូនពរជូនភ្ញៀវអន្តរជាតិទាំងនោះទស្សនា។ លើសពីនេះ គណប្រតិភូកម្ពុជា នឹងប្រគល់ជូន បាច់ផ្កាមួយបាច់ជូនអ្នកគ្រប់គ្រងនាវា។​ ប្រគល់ជូនថាសរូបព្រះថោងនាងនាគជូនដល់ម្ចាស់នាវា និងប្រគល់ជូនថាសរូបតោពីរជូនអ្នកគ្រប់គ្រងនាវា។

ជាមួយគ្នានេះ នៅព្រឹកដដែល លោក គួច ចំរើន អភិបាលខេត្តព្រះសីហនុ និងលោក សុខ សូកេន​ រដ្ឋមន្ត្រីក្រសួងទេសចរណ៍ នឹងអញ្ជើញសំណេះសំណាលជាមួយភ្ញៀវទេសចរណ៍ ថែមទាំងអញ្ជើញថតរូបអនុស្សាវរីយ៍ជាមួយថ្នាក់ដឹកនាំនាវ Westerdam ។ បន្ទាប់ពីនេះ ភ្ញៀវទេសចរណ៍ទាំងនោះ នឹងធ្វើដំណើរទស្សនកិច្ចនៅក្នុងខេត្តព្រះសីហនុ។

ដោយឡែកសម្រាប់ពេលល្ងាច រដ្ឋបាលខេត្តព្រះសីហនុរៀបចំកម្មវិធីជូនភ្ញៀវទេសចរណ៍អន្តរជាតិទាំងនោះ ដោយផ្ដល់ជូននូវភេសជ្ជៈ និងមានការប្រគំតន្ត្រី ការសម្ដែងរបាំជូនពរ របាំនេសាទ របាំគោះត្រឡោក និងរបាំសហម័យ។ ក្នុងពិធីនាពេលល្ងាច លោក គួច ចំរើន អភិបាលខេត្តព្រះសីហនុ នឹងអត្ថាធិប្បាយពីប្រវត្តិនៃនាវា Westerdam ដែលចូលចតកម្ពុជាកាលពី៣ឆ្នាំមុន ជូនភ្ញៀវទេសចរណ៍ឱ្យបានជ្រាប មុននឹងនាវា ​ Westerdam ចាកចេញពីកម្ពុជានៅម៉ោង៩៖០០នាទីយប់ដដែល។

គួររំលឹកឡើងវិញថា កាលពីឆ្នាំ២០២០ ក្នុងពេលដែលវិបត្តិកូវីដ១៩ រាតត្បាតជាសកល នាវា Westerdam កំពុងរសាត់អណ្ដែតនៅលើផ្ទៃសមុទ្រ បានព្យាយាមសុំចូលចតក្នុងដែនសមុទ្ររបស់ប្រទេសជាច្រើន ក៏ប៉ុន្តែត្រូវបានថ្នាក់ដឹកនាំប្រទេសជាច្រើនទាំងនោះបដិសេដមិនឱ្យចូលចតឡើយ។ ខុសពីថ្នាក់ដឹកនាំប្រទេសដទៃ ថ្នាក់ដឹកនាំកម្ពុជា គឺសម្ដេចតេជោ បានបើកបេះដូងមនុស្សធម៌ សណ្ដោសប្រណីឱ្យនាវា Westerdam ចូលចតដោយមិនខ្លាចឆ្លងមេរោគកូវីដ១៩ឡើយ ហើយពេលនោះសម្ដេចតេជោ ក៏បានអញ្ជើញទទួលនាវា Westerdam ដោយផ្ទាល់។​

ការត្រឡប់មកកម្ពុជានាពេលនេះ គឺមានភ្ញៀវទេសចរណ៍អន្តរជាតិចំនួន១ ៥០០នាក់ ក្នុងនោះ៦០០នាក់នឹងធ្វើដំណើរកម្សាន្តក្នុងប្រទេសកម្ពុជា៕​