អាកាសយានដ្ឋានអន្តរជាតិតេជោ ជានិមិត្តរូប សន្តិភាព និងការអភិវឌ្ឍកម្ពុជា

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ថ្លែងថា អាកាសយានដ្ឋានអន្តរជាតិតេជោ ជានិមិត្តរូប សន្តិភាព និងការអភិវឌ្ឍកម្ពុជា។ ការថ្លែងនេះ ធ្វើឡើង ក្នុងឱកាស សម្ដេចធិបតី អញ្ជើញត្រួតពិនិត្យ​​ការ​សាងសង់ អាកាសយានដ្ឋានអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃអង្គារ ទី១២ ខែមីនា ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា អាកាសយានដ្ឋានអន្តរជាតិតេជោ ជានិមិត្តរូប នៃការប្រែក្លាយប្រទេសមានសង្គ្រាម ការប្រយុទ្ធគ្នា ប្រទេសដែលកាលអំឡុងឆ្នាំ៧០ ព្រលានយន្តហោះភាគច្រើន ប្រើដើម្បីដឹកប្រជាពលរដ្ឋចេញទេ ទៅជាប្រទេសត្រូវបន្ថែមពង្រីកអាកាសយានដ្ឋានទទួលភ្ញៀវ។

សម្ដេចធិបតី ហ៊ុន ម៉ាណែត មានប្រសាសន៍បន្តថា៖ “ក្រោយមក យើង (កម្ពុជា) មានការអភិវឌ្ឍ ហើយព្រលានយន្តហោះនេះ (អាកាសយានដ្ឋានអន្តរជាតិតេជោ) ធ្វើថ្មី គឺដោយសារ កម្ពុជាមានសន្តិភាព បើប្រទេសគ្មានសន្តិភាព យើងមិនបាច់ធ្វើព្រលានយន្តហោះតម្លៃ ១ ៥០០ លានដុល្លារទេ សូម្បីក្រុមហ៊ុន មិនហ៊ានដាក់ទុនផង ស៊ូទុកលុយនៅក្រៅប្រទេស”។

សម្ដេចធិបតី មានប្រសាសន៍បន្ថែមថា ប៉ុន្តែវិនិយោគិនហ៊ានយកថវិកាដ៏ច្រើនមកវិនិយោគកសាងហេដ្ឋារចនាសម្ព័ន្ធ អាកាសយន្តដ្ឋាន គឺដោយសារបានមើលឃើញគិតវែងឆ្ងាយទៅអនាគតថា កម្ពុជាមានស្ថេរភាព និងសន្តិភាពទៅមុខទៀត ទើបហ៊ានវិនិយោគ ដែលនេះជានិមិត្តរូបដ៏ធំ។

គួរបញ្ជាក់ថា អាកាសយានដ្ឋានអន្តរជាតិតេជោជាប្រភេទ 4F គឺប្រភេទ អាកាសយានដ្ឋានធំ អាចស្រូបយក និង​ទទួលបានការហោះហើរពីឆ្ងាយឆ្លងទ្វីប ដែលអាចឱ្យប្រភេទយន្ត​ហោះ​ធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។ ក្រុមហ៊ុនវិនិយោគមានមហិច្ឆិតាអភិវឌ្ឍ​ព្រលានយន្តហោះថ្មីនេះ​ឱ្យធំ និងទំនើបជាងគេនៅតំបន់អាស៊ី។

គិតត្រឹមថ្ងៃទី២១ ខែកុម្ភៈ ឆ្នាំ២០២៤ ការសាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F ដំណាក់កាលទីមួយ សម្រេចបានប្រមាណ ៦៦ ភាគរយ និងបានចំណាយទឹកប្រាក់សរុប សម្រាប់ការ​សាង​សង់ចំនួន ៩៦១ លានដុល្លារអាមេរិក នៃគម្រោងទឹកប្រាក់វិនិយោគសរុបចំនួន ១ ៥០០ លាន​ដុល្លារ​អាមេរិក៕