Man Utd តែង​តាំង​លោក Ruud van Nistelrooy ជា​គ្រូជំនួយ

អតីតខ្សែប្រយុទ្ធក្លិប Manchester United លោក Ruud van Nistelrooy ត្រូវបានតែងតាំងជា​ជំនួយ​ការគ្រូ​បង្វឹកថ្មីរបស់លោក Erik ten Hag។

អតីតខ្សែប្រយុទ្ធរបស់ក្លិបបិសាចក្រហម Manchester United បានវិលត្រឡប់ទៅកាន់កីឡដ្ឋាន Old Trafford ជាថ្មី ក្នុងនាមជាគ្រូ​ជំនួយ​។ នេះបើតាមការ​បញ្ជាក់របស់លោក Wesley Sneijder។ លោក Nistelrooy នឹងចុះហត្ថលេខាលើកិច្ចសន្យារយៈពេល២ឆ្នាំនៅ Manchester United សម្រាប់​ការងារ​ថ្មី។

លោក Van Nistelrooy មានជម្រើសជាច្រើនមុនពេលត្រឡប់​ទៅក្លិបចាស់របស់​ខ្លួន​។ ក្នុងនោះក្លិប Burnley និង Club Brugge ក៏បានចាប់អារម្មណ៍ក្នុងការតែងតាំងរូបលោកជាគ្រូបង្វឹក​ដែរ​។ ជាមួយគ្នានេះ​ក៏​មានក្លិបក្នុងប្រទេសអេស្ប៉ាញ និង​អាល្លឺម៉ង់ក៏​ចង់​បាន​លោក​ដែរ។

ក្លិប Manchester United បាននាំយកលោក René Hake ធ្វើជាគ្រូជំនួយថ្មីម្នាក់ទៀត និងនាំយកលោក Jelle ten Rouwelaar ជាគ្រូបង្វឹកអ្នកចាំទីរបស់ក្លិប Ajax។

អតីតខ្សែប្រយុទ្ធរបស់បិសាចក្រហម លោក Van Nistelrooy មានប្រវត្តិដ៏អស្ចារ្យជាមួយក្លិប Man Utd ក្នុងឆ្នាំ​២០០១​ និង២០០៦ ដោយស៊ុតបញ្ចូលទីបាន១៥០គ្រាប់ ក្នុងការបង្ហាញខ្លួន២១៩ប្រកួត ក្រោមការដឹកនាំរបស់លោក Sir Alex Ferguson៕

ប្រែសម្រួល៖ ផា រតនា