សម្ដេចតេជោ អំពាវនាវឱ្យចូលគ្រុបតេឡេក្រាម«មូលនិធិកសាងហេដ្ឋារចនាសម្ព័ន្ធព្រំដែនផ្តោតលើការកសាងផ្លូវក្រវាត់ព្រំដែន»

តាមរយៈ​ឆាណែលតេឡេក្រាមផ្លូវការ នារសៀលថ្ងៃអង្គារ៍ នេះ សម្ដេចតេជោ ហ៊ុន សែន ​ប្រធានព្រឹទ្ធសភាកម្ពុជា បានចេញសារសំឡេងអំពាវនាវឱ្យពលរដ្ឋចូលគ្រុបតេឡេក្រាម «មូលនិធិកសាងហេដ្ឋារចនាសម្ព័ន្ធព្រំដែនផ្តោតលើការកសាងផ្លូវក្រវាត់ព្រំដែន» ដើម្បីទទួលបានព័ត៌មានសំខាន់ៗ និងរបៀបចូលរួមមូលនិធិកសាងហេដ្ឋារចនាសម្ព័ន្ធព្រំដែនផ្តោតលើការកសាងផ្លូវក្រវាត់ព្រំដែន។

ការអំពាវនាវរបស់សម្ដេចតេជោ ហ៊ុន សែន នៅថ្ងៃនេះ គឺបន្ទាប់ពីប្រមុខរាជរដ្ឋាភិបាលកម្ពុជា​ សម្ដេចធិបតី ហ៊ុន ម៉ាណែត  ប្រកាសលេខទូរស័ព្ទ និងគណនីធនាគារចំនួន៦ ដើម្បីផ្តល់ភាពងាយស្រួលដល់សាធារណជន ចូលរួមបរិច្ចាគដល់ «មូលនិធិកសាងហេដ្ឋា​រចនាសម្ព័ន្ធតាមព្រំដែន»។

សម្ដេចតេជោ ថ្លែងអំពាវនាវនៅរសៀល ថ្ងៃទី២៧ ខែសីហា យ៉ាងដូច្នេះ ៖«សូមកូនៗ ចូលទៅក្នុងគ្រុបនេះ គ្រុបនេះហៅថាជាគ្រុប«មូលនិធិកសាងហេដ្ឋារចនាសម្ព័ន្ធព្រំដែន ផ្តោតលើការកសាងផ្លូវក្រវាត់ព្រំដែន»។ សូមកូនចូលទៅក្នុងហ្នឹងឱ្យបានច្រើន ដើម្បីឱ្យមានការជជែក មានការពន្យល់គ្នាពីរបៀបចូល(ចូលរួមបរិច្ចាគថវិកា) ហើយចលនាឱ្យបានផុលផុស»។

ជាមួយនឹងការអំពាវនាវតាមសារសម្លេងដែលមានរយៈពេលប្រមាណ៣៥ វិនាទី សម្ដេចតេជោ ហ៊ុន សែន ក៏បានភ្ជាប់នូវតំណលីងគ្រុប «មូលនិធិកសាងហេដ្ឋារចនាសម្ព័ន្ធព្រំដែនផ្តោតលើការកសាងផ្លូវក្រវាត់ព្រំដែន» ដើម្បីឱ្យពលរដ្ឋងាយស្រួលចូលទៅក្នុងគ្រុបមួយនេះទៀតផង។

ជាការកត់សម្គាល់  ត្រឹមរយៈពេលជាង៣០នាទី ក្រោយការអំពាវនាវរបស់សម្ដេចតេជោ  គ្រុបតេឡេក្រាម «មូលនិធិកសាងហេដ្ឋារចនាសម្ព័ន្ធព្រំដែនផ្តោតលើការកសាងផ្លូវក្រវាត់ព្រំដែន» មានអ្នកចូលជាសមាជិកជាង៧០០០នាក់។

នេះគឺជាតំណលីង នៃគ្រុបតេឡេក្រាម «មូលនិធិកសាងហេដ្ឋារចនាសម្ព័ន្ធព្រំដែន ផ្ដោតលើការកសាងផ្លូវក្រវាត់ព្រំដែន» ៖ https://t.me/+IFmrNix3gc41OTk1៕

ដោយ៖ ង៉ិល ណារ៉ាត់