ចរាចរណ៍

ឡិចស៊ីស 470 មួយគ្រឿង បោះពួយលឿនបែកកង់ជ្រុលបុកបង្គោលភ្លើងរលំ ០២ ដើម

បានផុស

២ years មុន

នៅ

ថ្ងៃអាទិត្យ ២៩ កញ្ញា ២០២៤

ដោយ

រថយន្តឡិចស៊ីស 470 មួយគ្រឿង បានបោះពួយលឿនបែកកង់ខាងស្តាំ រ៉េចង្កូតបុកបង្គោលភ្លើងនៅខាងផ្លូវ បណ្តាលឲ្យរលំបង្គោលភ្លើង ០២ ដើម ដោយ ០១ ដើម រលំសង្កត់លើរថយន្តជាប់ទៅមុខលែងរួច រីឯ ០១ ដើមទៀត ត្រូវខ្សែភ្លើងទាញរលំដល់ដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកាលពីវេលាម៉ោង ០៣ រសៀល ថ្ងៃទី ២៩ ខែកញ្ញា ឆ្នាំ ២០២៤ នៅលើកំណាត់ផ្លូវ ទ្រុងមាន់ ជិតស្តុប ណតប្រ៊ីតដ៍ ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

បើតាមបុរសជាងកាត់សក់ម្នាក់ នៅទីតាំងកើតហេតុ បានឲ្យដឹងថា គេបានឃើញរថយន្តម៉ាកឡិចស៊ីស 470 មួយគ្រឿង ពណ៌ទឹកមាស ពាក់ស្លាកលេខភ្នំពេញ 2K-8797 បើកបរដោយបុរសម្នាក់ និងមានក្មេងប្រុសម្នាក់នៅក្នុងរថយន្ត បើកតាមបណ្ដោយផ្លូវទ្រុងមាន់ (ណតប្រ៊ីតដ៍) ទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុ បានផ្ទុះបែកកង់មុខខាងស្តាំ រួចរ៉េចង្កូតទៅខាងស្តាំដៃ ឡើងចិញ្ចឹមផ្លូវ បុកបង្គោលភ្លើង ០១ ដើម មានជាប់ត្រង់ហ្វូ មកសង្កត់ក្បាលរថយន្តជាប់ទៅមុខលែងរួច។ រីឯបង្គោលភ្លើងមួយដើមទៀត ចម្ងាយពីកន្លែងកើតហេតុប្រហែល ៥០ ម៉ែត្រ ត្រូវបានខ្សែភ្លើងទាញ ក៏បណ្ដាលឲ្យបាក់ ០១ ដើមទៀតផងដែរ សរុបចំនួន ០២ ដើម។ សំណាងល្អ មនុស្សនៅក្នុងរថយន្តពុំមានរងរបួសអ្វីនោះទេ។

ប្រភពបានបន្តថា ក្រោយកើតហេតុមួយសន្ទុះ សមត្ថកិច្ចបានយកអ្នកបើកបរទៅសួរនាំ និងបានរាយការណ៍ទៅខាងអគ្គិសនីឲ្យបិទបណ្ដាញភ្លើងផងដែរ។

ក្រោយកើតហេតុ សមត្ថកិច្ចចរាចរណ៍ សហការជាមួយមន្ត្រីជំនាញអគ្គិសនី (EDC ចុះមកពិនិត្យ និងវាស់វែងស្ទូចយករថយន្តទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយតាមនីតិវិធីច្បាប់៕

អត្ថបទ ៖ សំណាង