​ចិន​ទម្លាក់អត្រាការប្រាក់សំខាន់ៗ ដើម្បីជំរុញសេដ្ឋកិច្ចក្នុងបរិបទ​ពន្ធ

ធនាគារកណ្ដាលនៃប្រទេសចិន​នាថ្ងៃអង្គារនេះ បាន​ប្រកាសកាត់អត្រាការប្រាក់សំខាន់ ដើម្បីជំរុញសេដ្ឋកិច្ច ដែលកំពុងរងនូវការគំរាមកំហែងពីសង្រ្គាមពាណិជ្ជកម្មជាមួយសហរដ្ឋអាមេរិក បន្ថែមពីលើបញ្ហាដែលមាន​ស្រាប់។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការកាត់បន្ថយអត្រាការប្រាក់​ ដែលធ្វើលើកដំបូងរាប់តាំងពីខែតុលាឆ្នាំមុននេះ ​មានបំណងដើម្បីជំរុញការប្រើប្រាស់ និង​បង្កើន​ការផ្ដល់ប្រាក់កម្ចី​ក្នុងសេដ្ឋកិច្ច​ផុយស្រួយ ខណៈ​ការពារប្រាក់ចំណេញដែលកំពុងធ្លាក់ចុះ របស់ធនាគារ​ផ្ដល់ប្រាក់កម្ចីពាណិជ្ជ ។

ធនាគារប្រជាជនចិន (PBOC) ដែល​ជា​ធនាគារ​កណ្ដាល​របស់​ប្រទេស​ បាន​ប្រកាស​ថា​ ​អត្រាការប្រាក់​សម្រាប់​កម្ចីរយៈពេលមួយឆ្នាំ(LPR) ត្រូវ​បាន​បញ្ចុះ​ប្រមាណ​ ១០ ពិន្ទុ ពី​ ៣,១០​ ភាគរយ​ មក​នៅត្រឹម​ ៣​ភាគរយ។ ចំណែក​ឯ​អត្រាការប្រាក់​សម្រាប់​កម្ចីរយៈពេល៥​ឆ្នាំវិញ ត្រូវ​បានបញ្ចុះ​ ១០ ពិន្ទុ ដូចគ្នា មកនៅត្រឹម ៣,៥ ភាគរយ។ ​

ការប្រកាសចុងក្រោយរបស់ PBOC ធ្វើឡើងបន្ទាប់ពីធនាគារឧស្សាហកម្ម និងពាណិជ្ជកម្មនៃប្រទេសចិន ធនាគារកសិកម្មនៃប្រទេសចិន ធនាគារសំណង់ចិន និងធនាគារនៃប្រទេសចិន បានកាត់បន្ថយអត្រាប្រាក់បញ្ញើពី ៥-២៥ ពិន្ទុ (០,០៥ ភាគរយ-០,២៥ ភាគរយ) ​សម្រាប់​រយៈពេលពេលដាក់ប្រាក់​ជាក់លាក់។ នេះបើយោងតាមអត្រាដែលបានបង្ហាញនៅលើកម្មវិធីទូរស័ព្ទរបស់ធនាគារ។

ការកាត់បន្ថយអត្រាការប្រាក់នេះ គឺជាផ្នែកមួយនៃកញ្ចប់វិធានការរបស់ទេសាភិបាល PBOC ​និងនិយតករហិរញ្ញវត្ថុផ្សេងទៀត មុនពេល​កិច្ចចរចាពន្ធរវាងចិន និងសហរដ្ឋអាមេរិក ​ធ្វើឡើងនៅដើមខែនេះ ដែល​នាំឱ្យមាន​ការបន្ធូរបន្ថយភាពតានតឹងនៃសង្រ្គាមពាណិជ្ជកម្ម។ ​

ធនាគារវិនិយោគសកល កំពុងបង្កើនការព្យាករ​របស់​ពីកំណើនសេដ្ឋកិច្ចចិនសម្រាប់ឆ្នាំនេះជាថ្មី ក្រោយ​ចិន​ និងអាមេរិក យល់ព្រមគ្នាលើការផ្អាកអនុវត្តពន្ធខ្ពស់កប់ពពករយៈពេល ៩០ ថ្ងៃ ទោះបីជាភាពមិនប្រាកដប្រជានៃការចរចានៅតែបន្តក៏ដោយ។ ​

គេមើលឃើញថា កន្លងមកចិន​បាន​ប្ដេជ្ញាជំរុញការវិនិយោគ និងការប្រើប្រាស់ក្នុងស្រុក ចំពេលដែលសេដ្ឋកិច្ចរបស់ខ្លួនទ្រុឌទ្រោមដោយកម្សោយតម្រូវការ និងវិបត្តិអចលនទ្រព្យ៕