ក្រោយរាំងភ្លៀង យប់មិញរថយន្ដពីរគ្រឿងបើក​បុករបាំងថ្មចែកទ្រូងផ្លូវពីរគោលដៅផ្សេងគ្នា

បន្ទាប់ពីមានភ្លៀងបានធ្លាក់យ៉ាងជោគជាំនៅទូទាំងរាជធានីភ្នំពេញ កាលពីយប់ថ្ងៃទី២៥ឧសភា ធ្វើឲ្យផ្លូវមួយចំនួនមានភាពរអិលដែលជាហេតុងាយបង្កឲ្យកើតមានករណីគ្រោះថ្នាក់ចរាចរណ៍។ ស្ថានភាពផ្លូរអិលនេះបានធ្វើឲ្យរថយន្ដចំនួនពីរគ្រឿងបើកបុករបាំងថ្មពុះចែកទ្រូងផ្លូវពីរគោលដៅផ្សេងគ្នាត្រឹមរយៈពេលមួយម៉ោងប៉ុណ្ណោះ។

ករណីទី០១ កើតឡើងកាលពីវេលាម៉ោង ០៩និង០៥នាទីយប់ ក្នុងតំបន់កោះនរា ស្ថិតក្នុងខណ្ឌច្បារអំពៅ ដោយបុរសម្នាក់បានបេីករថយន្តម៉ាក ឡង់គ្រីស័រ ពណ៌ស ពាក់ស្លាកលេខ កម្ពុជា SIVENG77 បើកតាមបណ្ដោយផ្លូវ កោះនរា ក្នុងទិសដៅ ពីកេីតទៅលិច បានរអិលរេចង្កូតទៅបុកថ្មពុះចែកទ្រូងផ្លូវ បណ្ដាលឲ្យរថយន្តខូចខាតផ្នែកខាងមុខ។ និងករណីទី០២ នៅវេលាម៉ោង ១០និង៥០នាទី ក្នុងបរិវេណកោះពេជ្រ ក្នុងខណ្ឌចំការមន មានបុរសម្នាក់បេីករថយន្ត Mazda ពណ៌ ប្រផេះក្រម៉ៅ ពាក់ស្លាកលេខភ្នំពេញ 2BV-7455 តាមបណ្ដោយផ្លូវ កោះពេជ្រ ក្នុងទិសដៅពីជើងទៅត្បូង ខណៈមកដល់ចំណុចកើត រេចង្កូតបុកថ្មពុះចែកទ្រូងផ្លូវបណ្ដាលឲ្យរថយន្តខូចខាតផ្នែកខាងមុខ។

ក្រោយកេីតហេតុ ការិយាល័យចរាចរណ៍ផ្លូវគោកបានធ្វេីការវាស់វែងយករថយន្តទាំង០២គ្រឿង ទៅរក្សាទុក ដេីម្បីរងចាំដោះស្រាយ ពេលក្រោយ ។

សូមបញ្ជាក់ថា គ្រោះថ្នាក់ចរាចរណ៍តែងតែកើតឡើងក្រោមរូបភាពដូចជា មិនគោរពភ្លើងស្តុប បើកបរក្នុងស្ថានភាពស្រវឹង វ៉ាជែងគ្នា បើកបរខ្វះការប្រុងប្រយ័ត្នពេលមានភ្លៀង ជាពិសេសផ្លូវបំបែកជាបួនតែម្តង តែងកើតមានជារឿយៗ។ ដូច្នេះហើយ នៅពេលបងប្អូនប្រជាពលរដ្ឋធ្វើដំណើរទៅទីជិតឆ្ងាយ សូមបង្កើនការប្រុងប្រយ័ត្នអោយបានខ្ពស់ ព្រោះថាគ្រោះថ្នាក់ចរាចរណ៍ អាចកើតឡើងគ្រប់ពេល ប្រសិនធ្វេសប្រហែសតែមួយវិនាទី គឺប្រឈមនឹងបាត់បង់អាយុជីវិតជាក់ជាពុំខាន៕

អត្ថបទ៖ រដ្ឋា