ឥណ្ឌូណេស៊ី​ ជាក្រុម​ជោគជ័យជាងគេក្នុងពានអាស៊ានលំដាប់ទី១ SEA V. League

ការប្រកួតពានបាល់ទះលំដាប់ទី ១ ក្នុងតំបន់ អាស៊ាន SEA V League ឆ្នាំ​ ២០២៥ ​នឹងចាប់ផ្តើមឡើងពីថ្ងៃទី ១១ ដល់ថ្ងៃទី ២០ ខែ កក្កដា ឆ្នាំ ២០២៥ ដែល​មាន​ក្រុម​បាល់ទះ​ជម្រើស​ជាតិ​លំដាប់​កំពួល​ទាំង​ ៥​ ​​ប្រចាំ​តំបន់​អាស៊ាន។

បើក្រឡេកមើលអំពីប្រវត្តិនៃការកកើតពាននេះ គឺត្រូវបានផ្តួចផ្តើមឡើងតាំងពីឆ្នាំ ២០១៧ ប៉ុន្តែការប្រកួតបានចាប់ផ្តើមដំណើការជាផ្លូវការនៅឆ្នាំ ២០២៣ ដែលគិតមកដល់ពេលនេះ រៀបចំបាន ២ ឆ្នាំរួចហើយ។ យ៉ាងណា នៅក្នុងពានរង្វាន់នេះ ក្រុមបាល់ទះជម្រើសជាតិ កម្ពុជា គឺមិនដែលបានចូលរួមប្រកួត​ទេពីមុន ដោយនៅឆ្នាំ ២០២៥ នេះ គឺជាលើកដំបូងសម្រាប់ កម្ពុជា ដែលទទួលបានកៅអីបានចូលរួម បន្ទាប់ពីឈ្នះជើងឯក SEA V League Challenge កាលពីឆ្នាំ ២០២៤។

ជុំវិញការរៀបចំ ២ ឆ្នាំកន្លងមកនេះ ក្រុមជម្រើសជាតិ ឥណ្ឌូណេស៊ី​ បានក្លាយជាក្រុម ដែលជោគជ័យជាងគេ ដោយពួកគេបានឈ្នះមេដាយសរុបចំនួន ៤ គ្រឿង ក្នុងនោះមានមេដាយមាស ២ និងប្រាក់ ២។ បន្ទាប់មកក្រុមជម្រើសជាតិ ថៃ គឺជាក្រុម ដែលជោគជ័យទី ២ ដោយពួកគេបានឈ្នះមេដាយសរុបចំនួន ៤ គ្រឿងដូចគ្នា ក្នុងនោះមានមេដាយមាស ២ គ្រឿង ប្រាក់ ១ គ្រឿង និងសំរឹទ្ធ ១ គ្រឿង។

ចំណែក វៀតណាម ធ្លាប់ឈ្នះមេដាយសរុប ២ គ្រឿង ក្នុងនោះប្រាក់ ១ និងសំរឹទ្ធ ១ ហើយចុងក្រោយ ក្រុម ហ្វីលីពីន ធ្លាប់ឈ្នះមេដាយសរុប ២ គ្រឿង ក្នុងនោះ សំរឹទ្ធទាំង ២ គ្រឿង។

គួរបញ្ជាក់ថា ការប្រកួត SEA V League គឺត្រូវបានបែងចែកជា ២ ជុំ ដោយជុំទី ១ ធ្វើនៅប្រទេស ហ្វីលីពីន និងជុំទី ២ ធ្វើនៅប្រទេស ឥណ្ឌូណេស៊ី។

ជុំ​ទី១ នៅ​ប្រទេស​ហ្វីលីពីន របស់​ក្រុម​ជម្រើស​ជាតិ​កម្ពុជា

• កម្ពុជា ប៉ះ វៀតណាម ថ្ងៃ​ទី១០ កក្កដា
• កម្ពុជា ប៉ះ ឥណ្ឌូណេស៊ី ថ្ងៃ​ទី​១១ កក្កដា
• កម្ពុជា ប៉ះ ហ្វីលីពីន ថ្ងៃ​ទី​១២ កក្កដា
• កម្ពុជា ប៉ះ ថៃ​ ថ្ងៃ​ទី១៣ កក្កដា

ជុំ​ទី២ នៅ​ប្រទេស​ឥណ្ឌូណេស៊ី  របស់​ក្រុម​ជម្រើស​ជាតិ​កម្ពុជា

• កម្ពុជា ប៉ះ វៀតណាម ថ្ងៃ​ទី​១៦ កក្កដា
• កម្ពុជា ប៉ះ ថៃ ថ្ងៃ​ទី​១៧ កក្កដា
• កម្ពុជា ប៉ ហ្វីលីពីន ថ្ងៃ​ទី​១៨ កក្កដា
• កម្ពុជា ប៉ះ ឥណ្ឌូណេស៊ី ថ្ងៃ​ទី​១៩ កក្កដា

អត្ថបទ៖ សេម កុសល