មីយ៉ាន់ម៉ា បន្តទម្លាក់គ្រាប់បែកលើតំបន់ជាប់ព្រំដែនថៃ ស្លាប់អ្នកភូមិ២នាក់នៅខាងមីយ៉ាន់ម៉ា

យន្តហោះមីយ៉ាន់ម៉ាបានទម្លាក់គ្រាប់បែកលើទីតាំង៣កន្លែងនៅតំបន់ព្រំដែន Demozow នៃរដ្ឋ Kayah ដែលស្ថិតនៅជាប់ខេត្ត Mae Hong Son នៃប្រទេសថៃ ដែលជាលទ្ធផលបណ្តាលឲ្យអ្នកភូមិមីយ៉ាន់ម៉ា២នាក់ បាត់បង់ជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងនារសៀលម៉ោង១២:៥៥នាទី, ១:០៣នាទីនិង១:២០នាទី ថ្ងៃចន្ទទី១៤ខែកក្កដាឆ្នាំ២០២៥ ហើយវាក៏ធ្វើឲ្យពលរដ្ឋនៅខាងប្រទេសថៃឯណោះ ភិតភ័យផងដែរ។

ពលរដ្ឋថៃនៅតាមព្រំដែនជាពិសេសក្នុងខេត្ត Tak គឺរស់នៅមិនបានសុខស្រួលឡើយ ព្រោះសារតែការប្រយុទ្ធគ្នានៅមីយ៉ាន់ម៉ា រឹតតែខ្លាំង ដោយកងទ័ពមីយ៉ាន់ម៉ា កំពុងបង្កើនការវាយប្រហារលើកងកម្លាំងការ៉ែន (KNLA) ក្នុងរដ្ឋការ៉ែន ហើយលើកនេះគឺជាការប្រយុទ្ធទ្រង់ទ្រាយធំ ឈានដល់ការប្រើដ្រូនអត្តឃាត Kamikaze ចំនួន៤គ្រឿង ដើម្បីទម្លាក់គ្រាប់បែក។

ជុំវិញស្ថានការណ៍កាន់តែធ្ងន់ធ្ងរទៅនេះ មេបញ្ជាការកងកម្លាំងថៃ និយាយថា ខ្លួនកំពុងតាមដានស្ថានការណ៍ប្រយុទ្ធនៅព្រំដែនមីយ៉ាន់ម៉ា ខណៈទាហានមកពីកងពល Naresuan នៅតែបន្តចុះល្បាតនិងត្រួតពិនិត្យ ព្រមទាំងប្រុងជើងការជាប់ជានិច្ច។

សូមជម្រាបថា ការទម្លាក់គ្រាប់បែកតាមអាកាសរបស់យន្តហោះមីយ៉ាន់ម៉ានៅតំបន់ Demozow រដ្ឋ Kayah គឺជាផ្នែកមួយនៃយុទ្ធសាស្រ្តយោធារបស់របបសឹកមីយ៉ាន់ម៉ា ដើម្បីបង្ក្រាបក្រុមប្រឆាំង ហើយវាបានបង្កផលប៉ះពាល់យ៉ាងធ្ងន់ធ្ងរដល់ជនស៊ីវិល និងធ្វើឲ្យមានការព្រួយបារម្ភយ៉ាងខ្លាំងចំពោះសន្តិសុខនៅតាមតំបន់ព្រំដែនជាមួយប្រទេសថៃ៕

អត្ថបទ៖ សុខ សុវណ្ណ

ចុចអាន៖ ការប្រយុទ្ធគ្នានៅមីយ៉ាន់ម៉ា រឹតតែខ្លាំង ធ្វើឲ្យពលរដ្ឋថៃនៅជាប់ព្រំដែន រស់នៅទាំងភ័យខ្លាច