នាយកដ្ឋានបុរាណវិទ្យា ទទួលបាន ឧបករណ៍ Scanner ពីស្ថាប័នទីភ្នាក់ងារថាមពលបរមាណូអន្តរជាតិ

នាយកដ្ឋានបុរាណវិទ្យា និងបុរេប្រវត្តិវិទ្យា ទទួលបានឧបករណ៍ Leica ScanStation P40 / P30 3D Laser Scanner ពីស្ថាប័នទីភ្នាក់ងារថាមពលបរមាណូអន្តរជាតិ (IAEA) និងទទួលការបណ្ដុះបណ្ដាលក្នុងការប្រេីប្រាស់ ពីអ្នកជំនាញមកពីក្រុមហ៊ុន Leica។

នេះបើតាមការផ្ដល់ព័ត៌មានពីក្រសួងវប្បធម៌ និងវិចិត្រសិល្បៈ នៅព្រឹកថ្ងៃទី១៥ ខែសីហា ឆ្នាំ២០២៣នេះ។

ក្រសួងបានឱ្យដឹងថា នៅថ្ងៃទី១៤ ខែសីហា ឆ្នាំ២០២៣ នាយកដ្ឋានបុរាណវិទ្យា និងបុរេប្រវត្តិវិទ្យា បានទទួលឧបករណ៍ Leica ScanStation P40 / P30 3D Laser ពីស្ថាប័នទីភ្នាក់ងារថាមពលបរមាណូអន្តរជាតិ (IAEA) និងមានមន្រ្តីចំនួន ៦រូប ទទួលបានការបណ្ដុះបណ្ដាល ប្រេីប្រាស់ឧបករណ៍នេះ ពីអ្នកជំនាញមកពីក្រុមហ៊ុន Leica។

ការបណ្តុះបណ្តាល នេះមានរយៈពេល ១ថ្ងៃពេញ ដោយបានធ្វេីការណែនាំ ការអនុវត្តប្រេីប្រាស់នៅទីតាំងសារមន្ទីរជាតិ និងធ្វើការបំប្លែង កែសម្រួលទិន្នន័យនៅ ទីស្តីការក្រសួងវប្បធម៌ និងវិចិត្រសិល្បៈ។

គួរបញ្ជាក់ថា អគ្គនាយកដ្ឋានបេតិកភណ្ឌ នៃក្រសួងវប្បធម៌ និងវិចិត្រសិល្បៈ ទទួលបានគម្រោង TC Project: KAM1002 ស្តីពី ការគាំពារ និងអភិរក្សសម្បត្តិវប្បធម៌ ពីស្ថាប័នទីភ្នាក់ងារថាមពលបរមាណូអន្តរជាតិ (IAEA) រយៈពេល ៤ឆ្នាំ គឺចាប់ពីឆ្នាំ២០២០ ដល់២០២៤ ដែលមាន លោក ឡេង វិទូ ប្រធានស្តីទី នាយកដ្ឋានបុរាណវិទ្យា និងបុរេប្រវត្តិវិទ្យា ជាមន្រ្តីអនុវត្តគម្រោង។

គម្រោងនេះផ្តោតសំខាន់ទៅលើការបណ្តុះបណ្តាលមន្ត្រី ឱ្យមានលទ្ធភាពប្រើប្រាស់បច្ចេកវិទ្យាបរមាណូសម្រាប់ការអភិរក្សគាំពារសម្បត្តិវប្បធម៌ តាមរយៈការបញ្ជូនទៅទទួលបណ្តុះបណ្តាល និងទស្សនៈកិច្ចសិក្សារយៈពេលខ្លីនៅក្រៅប្រទេស ជាពិសេសទទួលបានឧបករណ៍មួយចំនួនសម្រាប់ប្រើក្នុងការវិភាគ ជួសជុល និងអភិរក្សបេតិកភណ្ឌវប្បធម៌ជាតិ៕