បាន​រៀនវគ្គ​បច្ចេកទេស កសិករ​ពីរ​នាក់​បង​ប្អូន​ អះអាង​ឆ្នាំនេះ មៀនប៉ៃលិន​មិន​ពិបាករឿង​ទីផ្សារ

ប្រជាកសិករដែលប្រកបរបរដាំដំណាំមៀនប៉ៃលិន “តាង៉ែន” ពីរ​នាក់​បង​ប្អូន​សម្តែងក្តីរីករាយ ខណៈ​ឆ្នាំនេះមៀនប៉ៃលិន​ដែលពួកគេ​ដាំដុះ អាចហុចផលបានច្រើនជាងឆ្នាំកន្លងទៅ ស្របតាមទីផ្សារក៏​ល្អប្រសើរផងដែរ។ នេះបើតាមកសិករឈ្មោះ យុឹម ប៊ុនថេន និងឈ្មោះ យុឹម ប៊ុនលៀង រស់នៅភូមិកណ្តាល ឃុំត្រាង ស្រុកំរៀង ខេត្តបាត់ដំបងជាម្ចាស់ចំការបានផ្តល់បទសម្ភាស់ជាមួយកម្ពុជាថ្មី។

កសិករទាំអ ២ នាក់បងប្អូនបានឲ្យដឹងថា ឆ្នាំនេះពួកលោកដាំលើដីជួលពីអ្នកភូមិបានប្រហែល ៤ ពាន់ដើម ហើយ​ទិន្នផល​អាចកើនជាងឆ្នាំមុន បើទោះបីឆ្នាំមុនជួបផលលំបាករឿងទីផ្សារបន្តិច​ក៏​ដោយ​។

កាលពី​ឆ្នាំមុន រាជរដ្ឋាភិបាលបានចុះ​ជួយទិញក៏ដោយចុះ តែ​ពួកលោកមានជំនឿយ៉ាងម៉ុតមាំថា នៅ​ឆ្នាំនេះតាមរយ:ការគិតគូរខ្ពស់ពីរាជរដ្ឋាភិបាល ដែល​បាន​ខិតខំរកទីផ្សារជូនដល់ប្រជាកសិករប្រកបរបរដាំដំណាំមួយនេះ ចៀសវាងដើរតាមគន្លងទីផ្សារកាលពី១ឆ្នាំកន្លងទៅ។

លោកយុឹម ប៊ុនលៀង បានអះអាងថា ទិន្នផលផ្លែមៀនប៉ៃលិនរបស់លោកទាំង២នាក់បងប្អូន​ឆ្នាំនេះ ល្អប្រសើរជាងឆ្នាំមុន​ហើយ​ទីផ្សារក៏មិនសូវបារម្មណ៍នោះដែរ អាចនាំត្រង់ទៅប្រទេសចិនបានតាមរយ:ក្រុមហ៊ុន។

កសិករ​រូប​នេះបន្ត​ថា កន្លងទៅ​មាន​រៀបចំ​វគ្គ​បណ្តុះបណ្តាលវគ្គខ្លី សម្រាប់ប្រកបរបរកសិកម្មមួយនេះឲ្យមានប្រសិទ្ធិភាពនិងស្តង់ដាល្អស្របតាមតម្រូវការទីផ្សារក្រៅប្រទេស តាមរយ:ម្ចាស់ចម្ការត្រូវមានវិញ្ញាបនបត្រទទួលស្គាល់ពីមន្ទីរស្ថាប័នជំនាញ។ ការសិក្សាវគ្គខ្លីនេះពិតជាមានប្រយោជន៍ខ្លាំងណាស់ សម្រាប់ប្រជាកសិករគ្រប់រូបដែលប្រកបមុខរបរកសិកម្ម ដើម្បីឲ្យបានទិន្នផលល្អស្របតាមតម្រូវការទីផ្សារក្រៅប្រទេស។

លោកបន្តថា វគ្គសិក្សានេះ​ជាឱកាសមាសប្រាក់ដែលទាមទារឲ្យប្រជាកសិករផ្សេងៗ គួរចូលរួម​ឲ្យបានទាំងអស់គ្នា បើមិនដូច្នោះទេក្រុមហ៊ុនមិនទទួលទិញនិងនាំចេញទៅទីផ្សារក្រៅ​ប្រទេស ហើយជាលទ្ធផល​ប្រាកដជាប្រជាកសិករជួបផលលំបាកសម្រាប់ទីផ្សារមិនខានឡើយ។

បើ​តាម​កសិករ​រូប​នេះ​ ឆ្នាំនេះមានក្រុមហ៊ុនរង់​ចាំទទួលជាស្រេច ហើយសម្រាប់ចម្ការរបស់លោកក្រុមហ៊ុនចិននឹងចុះពិនិត្យជាក់ស្តែងដល់ចម្ការ ដើម្បីធ្វើ​កុងត្រាកក់លុយតែម្តង ហើយរឿងបច្ចេកទេសវេចខ្ចប់នៅលើក្រុមហ៊ុនជាអ្នកអនុវត្តតាមស្តង់ដារបស់ក្រុមហ៊ុនក្នុងការនាំចេញទៅប្រទេសចិន។ ដំណឹងនេះធ្វើឲ្យពួកលោកទាំងពីរកាន់តែមានទឹកចិត្តក្នុងការប្រកបរបរមួយនេះ ដើម្បីទ្រទ្រង់សេដ្ឋកិច្ចគ្រួសារក្នុងស្រុកដោយមិនធ្វើសំណាកស្រុកទាំងប្រថុយប្រថាននោះទេ។

ស្របជាមួយការលើកឡើងរបស់ប្រជាកសិករខាងលើនេះ លោក ឈឹម វិច្ឆរ៉ា ប្រធានមន្ទីរ​កសិកម្មខេត្តបានឲ្យកម្ពុជាថ្មីដឹងយ៉ាងដូច្នេះដែរថា ពាក់ព័ន្ធនិងការវេចខ្ចប់ វាពិតជាមានតម្លៃធំណាស់ ក្នុងការនាំចេញទៅលើទីផ្សារក្រៅប្រទេស។ ចឹងហើយការ​វេចខ្ចប់ ទាមទាឲ្យមានអនាម័យល្អកុំឲ្យមានមេរោគឬសត្វល្អិតគឺជាការចាំបាច់ណាស់សម្រាប់នាំចេញទៅប្រទេសចិន។

ប្រធានមន្ទីរកសិកម្ម​រូបនេះ​បាន​បន្ត​ថា កន្លងទៅអគ្គរដ្ឋបាលគយសាធារណរដ្ឋចិន ក៏ដូចជាស្ថានទូតចិនប្រចាំកម្ពុជាបានចុះពិនិត្យជាក់ស្តែងក្នុងខេត្តប៉ៃលិន និងខេត្តបាត់ដំបងក្នុងស្រុកបាណន់ ហើយខាងភាគីក្រុមហ៊ុនចិនក៏គាំទ្រនិងផ្តល់យោបល់ពាក់ព័ន្ធបច្ចេកទេសសាងសង់កន្លែងស្តុក និងវេចខ្ចប់ប្រកបដោយអនាម័យល្អដើម្បីនាំចេញទៅប្រទេស​ចិន​។

ការលើកឡើងពីលោកប្រធានមន្ទីរកសិកម្មខេត្ត ស្របពេលកន្លងទៅលោក សុខ លូ អភិបាលខេត្តបាត់ដំបងបានលើកឡើងក្នុងកិច្ចប្រជុំមួយថា ខេត្តបាត់ដំបងពិតជាមានផលិតផលនានាយ៉ាងសំបូរបែប ប៉ុន្តែការវេចខ្ចប់​នៅមានកម្រិតនៅ​ឡើយ ត្រូវតែពង្រឹងផ្នែកបច្ចេកទេសបន្ថែមទៀតដើម្បីនាំចេញទៅទីផ្សារក្រៅប្រទេសឲ្យមានទំហំធំ។

ពាក់ព័ន្ធដំណាំមៀនប៉ៃលិន”តាង៉ែន”ដែលប្រជាកសិករដាំដុះក្នុងខេត្តបាត់ដំបងសម្រាប់ឆ្នាំ២០២២នេះ លោក ហេង សិទ្ធ នាយការិយាល័យផែនការនៃមន្ទីរកសិកម្មខេត្តប្រាប់ថា នៅមិនទាន់ដឹងចំនួននៅឡើយនោះទេថា តើប្រជាកសិករ ក្នុងខេត្ត បាត់ដំបង នាពេលបច្ចុប្បន្ននេះ បានដាំដំណាំមៀនប៉ៃលិន”តាង៉ែន”លើទំហំដី បានប៉ុន្មានហិកតា បើធៀបឆ្នាំកន្លងទៅគិតត្រឹមពេលនេះ៕

អត្ថបទ៖ សៅ សារិទ្ធ