សេដ្ឋកិច្ច

តម្លៃ និងទិន្នផលផ្លែមៀនប៉ៃលិនមានភាពល្អប្រសើរនាឆ្នាំនេះ

បានផុស

២ years មុន

នៅ

ថ្ងៃចន្ទ ២៨ តុលា ២០២៤

ដោយ

កសិករដាំមៀនមៀនប៉ៃលិន និងមន្ត្រីកសិកម្ម បានលើកឡើងថា នៅរដូវប្រមូលផលផ្លែមៀនប៉ៃលិនក្នុងខែតុលា ឆ្នាំ ២០២៤ នេះ តម្លៃ និងទិន្នផលផ្លែមៀនប៉ៃលិនមានភាពល្អប្រសើរ ដោយសារការថែទាំដិតដល់ និងអាកាសធាតុអំណោយផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សួន ជុំ អនុប្រធានសមាគមមៀនប៉ៃលិន ប្រាប់កម្ពុជាថី្មថា កសិករបានចាប់ផ្ដើមប្រមូលផលបណ្ដើរៗ នាដើមរដូវនេះ ដែលទទួលបានទិន្នផលល្អប្រសើរ ដោយសារបទពិសោធន៍របស់កសិករ និងមានភ្លៀងធ្លាក់ច្រើនដែលអំណោយផលដល់ដំណាំមៀន។ កសិករមួយចំនួនបានលើកឡើងថា ទំហំផ្ទៃដីដាំផ្លែមៀនមួយហិកតា អាចទទួលបានទិន្នផលមៀនប្រមាណ ៣ តោន។

លោក ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្ម មានប្រសាសន៍នៅថ្ងៃទី ២៥ ខែតុលា ឆ្នាំ ២០២៤ថា ទិន្នផលផ្លែមៀនប៉ៃលិន និងតម្លៃមានលក្ខណៈល្អប្រសើរ មិនមានបញ្ហាចោទជាឧសគ្គច្រើននោះទេ ខណៈប្រជាកសិករដែលទទួលបានការចុះបញ្ជី អនុវត្តកសិកម្មល្អ (GAP) ក៏គាត់បានអនុវត្តបានត្រឹមត្រូវ ហើយការនាំចេញទៅចិនបានដោយរលូន។

ក្រុមហ៊ុន ឆាយណា ជីនវ័រយាន និងតំណាងសហគមន៍ផ្លែមៀនប៉ៃលិនបានចុះកិច្ចសន្យាទិញផ្លែមៀនប៉ៃលិនក្នុងតម្លៃ ៣០០០ រៀល ក្នុងមួយគីឡូក្រាម សម្រាប់រដូវកាលថ្មី ឆ្នាំ ២០២៤ ពោលគឺមានតម្លៃទាបជាងឆ្នាំមុនបន្តិច។

លោក សួន ជុំ អនុប្រធានសមាគមមៀនប៉ៃលិនយល់ឃើញថា តម្លៃ ៣០០០ រៀល ក្នុងមួយគីឡូក្រាម អាចទទួលយកបាន ប្រសិនបើកសិករចេះថែទាំមៀនត្រូវតាមក្បួនខ្នាតបច្ចេកទេសនោះគឺកសិករនឹងអាចចំណេញ។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ គិតត្រឹមឆមាសទី១ ឆ្នាំ ២០២៤ ការនាំចេញផ្លែមៀនស្រស់របស់កម្ពុជាទៅទីផ្សារអន្តរជាតិ សម្រេចបានជាង ១ ៤០០០ តោន កើនឡើងជាង ១២០ ភាគរយ គិតជាទឹកប្រាក់ប្រមាណ ២២ លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។

នៅក្នុងឆ្នាំ២០២៣ កម្ពុជាបាននាំចេញផ្លែមៀនស្រស់មានបរិមាណសរុបជាង ១៧ ៤៩៧ តោន គិតជាទឹកប្រាក់សរុបចំនួន ២៤,៧៥ លានដុល្លារ៕

អត្ថបទ៖ ឡេង ដេត