ក្រសួងរៀបចំដែនដី រកចំណូលចូលថវិកា​ជាតិប្រមាណ ១៥០លានដុល្លារ ក្នុងមួយឆ្នាំ

ក្នុងមួយឆ្នាំៗ ក្រសួងរៀបចំដែនដី នគររូបនីយកម្ម និងសំណង់ បានជួយរកចំណូលចូលថវិកាជាតិ បានប្រមាណជា ១៥០លានដុល្លារ។ នេះបើតាមការលើកឡើងរបស់លោក សេង ឡូត អគ្គនាយកនៃអគ្គនាយកដ្ឋានរដ្ឋបាល នៃក្រសួងរៀបចំដែនដី។

ថ្លែងនៅក្នុងសន្និសីទសារព័ត៌មាន ថ្ងៃទី ២៤ ខែ សីហា លោក សេង ឡូត បានឱ្យដឹងដូច្នេះថា «តាមរយៈការផ្តល់សេវា​សាធារណៈ មិនមែនពន្ធរបស់ក្រសួងរៀបចំដែនដី បើគិតជាលេខមូល ក្រសួងប្រមូលថវិកាចូលរដ្ឋបានជាង ៣០ លានដុល្លារក្នុងមួយឆ្នាំ ហើយចំណូលដែលប្រមូលដោយអង្គភាពពន្ធដារ ប្រតិបត្តិការទាំងអស់ ដោយក្រសួងដែនដី ដែលហៅថាពន្ធប្រថាប់ត្រា គឺប្រមូលបាន ១២០លានដុល្លារ។ សរុបសេចក្តីមក ក្រសួងរៀបចំដែនដី បានរួមចំ​ណែករក​ចំណូលចូលថវិកាជាតិបានប្រមាណ ១៥០ លានដុល្លារ»។

ជាមួយនឹងការប្រមូលចំណូលនេះ ចំពោះសេវាសាធាណៈ ក្រសួងរៀបចំដែនដី បានបង្កលក្ខណៈឱ្យមានភាពកាន់តែ​សាមញ្ញរួមជាមួយនឹងការកាត់បន្ថយរយៈពេលឱ្យបានខ្លីនៅក្នុងការចុះបញ្ជីដីធ្លី ពី ៣០ថ្ងៃ មកត្រឹម ១៥ថ្ងៃ ដើម្បីឆ្លើយតប​សំណូមពររបស់ប្រជាពលរដ្ឋ ទទួលបានសេវាប្រកបដោយសេចក្តីពេញចិត្ត។ នេះជាការបន្ថែមរបស់លោក សេង ឡូត។

សូមបញ្ជាក់ថា រយៈពេល ៥ឆ្នាំ ពោលចាប់ពីឆ្នាំ ២០១៨ រហូតដល់ពាក់កណ្តាលឆ្នាំ ២០២២នេះ ក្រសួងរៀបចំដែនដី ប្រមូលថវិកាបានចំនួន ៥៥៣លានដុល្លារ ដែលបានមកពីសេវាសូរិយោដី សេវាសំណង់ ការជួលអចលនវត្ថុ និងពន្ធលើការផ្ទេរ អចលនវត្ថុ ជាដើម៕

អត្ថបទ៖ នាង រតនៈ