ក្រសួងរៀបចំដែនដី កំពុងរៀបចំសេចក្តីព្រាងផែនការយុទ្ធសាស្រ្តអភិវឌ្ឍខេត្តនៅតំបន់ឆ្នេរសមុទ្រ

ក្រសួងរៀបចំដែនដី នគររូបនីយកម្ម និងសំណង់ កំពុងរៀបចំសេចក្តីព្រាងផែនការយុទ្ធសាស្ត្រចុះមូលដ្ឋានខេត្តព្រះសីហនុ ដែលជាការរំលីងនូវគោលនយោបាយអាទិភាព និងវិធានគន្លឹះរបស់រាជរដ្ឋាភិបាល គឺ ទឹក ផ្លូវ ភ្លើង មនុស្ស និងបច្ចេកវិទ្យា ហើយវានឹងក្លាយជាផែនការយុទ្ធសាស្រ្តគំរូសម្រាប់យកទៅអនុវត្តនៅខេត្តតំបន់ឆ្នេរផ្សេងទៀត។

រដ្ឋមន្រ្តីក្រសួងរៀបចំដែនដី នគររូបនីយកម្ម និងសំណង់ លោក សាយ សំអាល់ កាលពីថ្ងៃទី ០៣ ខែមេសា ឆ្នាំ ២០២៦ បានដឹកនាំកិច្ចប្រជុំពិគ្រោះយោបល់លើសេចក្តីព្រាងផែនការយុទ្ធសាស្ត្រចុះមូលដ្ឋានខេត្តព្រះសីហនុ ដើម្បីប្រមូលធាតុចូលបន្ថែមពីភាគីពាក់ព័ន្ធ។

ក្រសួងរៀបចំដែនដី បានបញ្ជាក់ថា ៖«ការចុះមូលដ្ឋាន គឺយើងត្រូវជួយលើកកម្ពស់ជីវភាពអ្នកមូលដ្ឋាន គិតគូរលើអ្វីដែលមានស្រាប់បង្កើតដង្ហើមសេដ្ឋកិច្ចឱ្យគាត់ និងពង្រឹងភាពជាកម្មាភិបាលរបស់មន្ត្រីរាជការយើង ហើយការចុះមូលដ្ឋាននៅតំបន់ឆ្នេរនេះទៀតសោត គួរផ្តោតលើការតភ្ជាប់ហេដ្ឋារចនាសម្ព័ន្ធ ឡូជិស្ទីក កំពង់ផែអន្តរជាតិពហុបំណង ការអភិវឌ្ឍផែសហគមន៍នេសាទ និងហេដ្ឋារចនាសម្ព័ន្ធទ្រទ្រង់ចាំបាច់ដូចជា ផ្លូវ ចំណតឡាន បន្ទប់ទឹកជាដើម ការចិញ្ចឹមសត្វ ការដាំដុះដំណាំបន្លែបង្កាដែលឆ្លើយតបតម្រូវការចាំបាច់ និងជំរុញកំណើនសេដ្ឋកិច្ចនៅកម្ពុជា»។

ជាមួយគ្នានេះ ក្រសួងក៏បានគិតគូរផ្តោតលើវិស័យអប់រំ និងសុខាភិបាល ដូចជាការរៀបចំសាលារៀនឱ្យជាសាលារៀនកម្ពុជា បណ្តុះធនធានមនុស្ស និងរៀបចំលំហសាធារណៈ បង្កលក្ខណៈអោយមនុស្សហាត់ប្រាណ ទទួលទានអាហារគ្រប់គ្រាន់ និងមានជីវជាតិ និងអប់រំផ្សព្វផ្សាយបញ្ចៀសពួកគាត់ពីការទទួលទានអាហារភេសជ្ជៈដែលបង្កជាជំងឺទូទៅ និងជំងឺរ៉ាំរ៉ៃដែលជាការខាតបង់របស់ជាតិ និងប្រជាជន។

គួរជម្រាបថា តំបន់ឆ្នេរសមុទ្រកម្ពុជា បានដើរតួនាទីយ៉ាងសំខាន់ក្នុង​ការទាក់ទាញវិនិយោគសម្រាប់ជំរុញកំណើនសេដ្ឋកិច្ចជាតិ និងត្រូវបានចាត់ទុកថា ជាគោលដៅទេសចរណ៍ធម្មជាតិ ដ៏មានភាពទាក់ទាញ និងប្រកបដោយភាពប្រកួតប្រជែងខ្ពស់នៅកម្ពុជា និងក្នុងតំបន់ព្រមទាំងជាគោលដៅ​ទេសចរណ៍ដ៏ធំ បន្ទាប់ពីតំបន់បេតិកភណ្ឌវប្បធម៌-ប្រវត្តិសាស្ត្រសៀមរាប-អង្គរ និងរាជធានីភ្នំពេញ៕