សេដ្ឋកិច្ច

តម្លៃប្រេងបន្តធ្លាក់ចុះ ដោយសារប្រាក់ដុល្លារអាមេរិកថ្លៃ

បានផុស

៩ ខែ មុន

នៅ

ថ្ងៃចន្ទ ២៤ មិថុនា ២០២៤

ដោយ

តម្លៃប្រេងបានបន្តធ្លាក់ចុះនៅលើទីផ្សារជួញដូរអាស៊ីនាព្រឹកព្រលឹមថ្ងៃចន្ទនេះ ដោយសារតែតម្លៃប្រាក់ដុល្លារអាមេរិករឹងមាំ ក្រោយមានក្ដីបារម្ភអំពីអត្រាការប្រាក់ខ្ពស់សម្រាប់រយៈពេលវែងសារជាថ្មី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៤០ សេន ឬ ០,៥ ភាគរយ មកត្រឹម ៨៤,៨៤ ដុល្លារ/បារ៉ែល បន្ទាប់ពីបានធ្លាក់ចុះ ០,៦ ភាគរយកាលពីថ្ងៃសុក្រ។ ប្រេងឆៅរបស់អាមេរិក ម៉ាក West Texas Intermediate វិញ ជួញដូរនៅតម្លៃ ៨០,០៤ ដុល្លារ/បារ៉ែល ដោយធ្លាក់ចុះ ៣៩ សេន ឬ ០,៥ ភាគរយ។

អ្នកវិភាគសេដ្ឋកិច្ចនិយាយថា ប្រាក់ដុល្លារបង្ហាញពីតម្លៃខ្ពស់រឹងមាំ ក្រោយទិន្នន័យសន្ទស្សន៍អ្នកគ្រប់គ្រងការទិញ (PMI) របស់សហរដ្ឋអាមេរិក បង្ហាញពីភាពកាន់តែប្រសើរ ទន្ទឹមនឹងកង្វល់នយោបាយមុនការបោះឆ្នោតនៅបារាំង។ តម្លៃប្រាក់ដុល្លាររឹងមាំ ធ្វើឱ្យទំនិញដែលជួញដូរដោយលុយដុល្លារ មិនសូវជាទាក់ទាញសម្រាប់ការវិនិយោគពីអ្នកកាន់រូបិយប័ណ្ណផ្សេងៗទៀត។

យ៉ាងណាមិញ គួរកត់សម្គាល់ថា ការបន្តធ្លាក់ចុះនាថ្ងៃចន្ទនេះ កើតឡើងក្រោយតម្លៃប្រេងទាំង២បានកើនឡើងជាង ៣ ភាគរយកាលពីសប្ដាហ៍កន្លងទៅ ដោយសារមានសញ្ញាស្ដីពីកំណើតតម្រូវការខ្ពស់នៅសហរដ្ឋអាមេរិក ហើយវិធានការកាត់បន្ថយទិន្នផលប្រេងរបស់អង្គការនៃប្រទេសនាំចេញប្រេង និងសម្ព័ន្ធមិត្ត (OPEC+) បានជួយទប់លំនឹងផ្គត់ផ្គង់។

កំណើនតម្លៃប្រេងនាពេលថ្មីនេះ ក៏ត្រូវបានអ្នកវិភាគបានភ្ជាប់ផងដែរ ទៅនឹងការធ្លាក់ចុះនៃស្ដុកប្រេងឆៅ និងកំណើនតម្រូវការប្រេងសាំងនៅសហរដ្ឋអាមេរិក ហានិភ័យភូមិសាស្ត្រនយោបាយនៅមជ្ឈិមបូព៌ាជុំវិញវិបត្តិនៅហ្គាហ្សា និងការកើនឡើងនៃការវាយប្រហារដោយដ្រូនរបស់អ៊ុយក្រែនលើរោងចក្រចម្រាញ់ប្រេងរបស់រុស្ស៊ីជាដើម៕

Related Topics: