ពីស្ដ្រីមេផ្ទះ ក្លាយជាម្ចាស់សិប្បកម្មផលិតប្រហិតដ៏ល្បីឈ្មោះ

ផ្ដើមចេញពីស្ដ្រីមេផ្ទះម្នាក់ អ្នកស្រី គីរី សុវណ្ណវតី បានផ្លាស់ប្ដូរខ្លួនក្លាយជាម្ចាស់សិប្បកម្មផលិតប្រហិតដ៏ល្បីឈ្មោះមួយ នៅក្នុងរាជធានីភ្នំពេញ។

អ្នកស្រី គីរី សុវណ្ណវតី អាយុ ២៦ឆ្នាំ ម្ចាស់សិប្បកម្មផលិតប្រហិតផ្ទះវីឡា បានប្រាប់ កម្ពុជាថ្មី ថា ដំបូងឡើយ អ្នកស្រី ត្រឹមតែជាស្រ្ដីមេផ្ទះម្នាក់ ដែលមានតួនាទី​មើលថែទាំកូន នៅក្នុងគ្រួសារតែប៉ុណ្ណោះ។

ក្រោយមកចូលមកដល់ឆ្នាំ ២០១៨ ទើបអ្នកស្រី និងស្វាមី បានរួមគ្នាបង្កើតសិប្បកម្មផលិតប្រហិត ដែលជារៀងរាល់ថ្ងៃ អ្នកស្រី​ សុវណ្ណវតី បានជួយទិញសាច់ពីកសិករចិញ្ចឹមគោ និងមាន់ ចន្លោះប្រមាណ ៤០០ ទៅ ៥០០គីឡូក្រាម ក្នុងមួយថ្ងៃ។

អ្នកស្រី សុវណ្ណវតី បានប្រាប់ឱ្យដឹងទៀតថា មូលហេតុដែលអ្នកស្រី បើកសិប្បកម្មផលិតប្រហិតនេះឡើង ដោយសារតែក្ដីស្រមៃតាំងពីតូចមកទាក់ទងនឹងការផលិតប្រហិត និងម៉្យាងទៀត អ្នកស្រី​ ចង់ផលិតប្រហិតដែលជាស្នាដៃរបស់កូនខ្មែរ ដោយមិនចាំបាច់នាំចូលពីក្រៅប្រទេស ផងដែរ។

ម្ចាស់សិប្បកម្មរូបនេះ បានបញ្ជាក់ទៀតថា សម្រាប់ពេលបច្ចុប្បន្ន សិប្បកម្មផលិតប្រហិតផ្ទះវីឡា របស់អ្នកស្រី អាចមានសមត្ថភាពផលិតប្រហិតគោ និងសាច់មាន់ ក្នុងមួយថ្ងៃ ចន្លោះពី ៨០០ ទៅ៩០០គីឡូក្រាម ដើម្បីផ្គត់ផ្គង់ទៅកាន់តម្រូវការទីផ្សារក្នុងស្រុក ពិសេសក្នុងរាជធានីភ្នំពេញ និងបណ្ដាខេត្តមួយចំនួនទៀត។

សម្រាប់ទស្សនវិស័យទៅថ្ងៃអនាគត អ្នកស្រី សុវណ្ណវតី ក៏បានគំ​និតចង់ពង្រីកសិប្បកម្មផលិតប្រហិត ឱ្យកាន់តែធំជាងនេះទៀត ដើម្បីឆ្លើយតបនឹងតម្រូវការលើទីផ្សារ ធ្វើយ៉ាងណាផលិតប្រហិតមានគុណភាព និងស្ដង់ដា បានកាន់តែច្រើន សម្រាប់ប្រជាជនខ្មែរ ដែលនិយមចូលចិត្តបរិភោគប្រហិត ដែលជារបស់ខ្មែរពិតៗ។

ក្រៅពីការបើកសិប្បកម្មផលិតប្រហិត ដើម្បីរកប្រាក់ចំណូលចូលក្នុងគ្រួសារ អ្នកស្រី សុវណ្ណវតី ក៏បានចូលរួមចំណែកជួយបង្កើតការងារឱ្យពលរដ្ឋខ្មែរមានការងារធ្វើ ដោយមិនចាំបាច់ទៅចំណាកស្រុកនៅប្រទេសជិតខាង។ ជាក់ស្ដែង សិប្បកម្មរបស់ សុវណ្ណវតី បច្ចុប្បន្នមានបុគ្គលិកបម្រើការក្នុងសង្វាក់ផលិតកម្មខ្នាតតូចនេះ ជាង១០នាក់ ដែលពួកគាត់គ្រប់រូប សុទ្ធសឹងតែទទួលបានប្រាក់ខែសមរម្យ ផងដែរ៕

អត្ថបទ ៖ សួស សិត