ព័ត៌មានអន្ដរជាតិ

ប្រតិបត្តិករទេសចរណ៍ថៃ សុំបន្ថយរយៈពេលស្នាក់នៅនៃគម្រោងលើកលែងទិដ្ឋាការ សម្រាប់ភ្ញៀវចិន

បានផុស

១ year មុន

នៅ

ថ្ងៃអង្គារ ២១ មករា ២០២៥

ដោយ

ប្រតិបត្តិករទេសចរណ៍ថៃ បានស្នើសុំឱ្យរដ្ឋាភិបាលកាត់បន្ថយរយៈពេលស្នាក់នៅក្រោមគោលនយោបាយលើកលែងទិដ្ឋាការ សម្រាប់ភ្ញៀវទេសចរចិន ដើម្បីដោះស្រាយកង្វល់លើសកម្មភាពខុសច្បាប់កើតចេញពីគម្រោងនេះ ខណៈក្រុមប្រឹក្សាទេសចរណ៍ថៃ (TCT) បានជំរុញឱ្យរដ្ឋាភិបាលដោះស្រាយបញ្ហាឧក្រិដ្ឋកម្មឆ្លងដែន និងការបោកប្រាស់។ នេះបើតាមការចុះផ្សាយរបស់កាសែតបាងកកប៉ុស្តិ៍នាថ្ងៃអង្គារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវបែបនេះ ធ្វើឡើងក្រោយវិស័យទេសចរណ៍ថៃ បានរងផលប៉ះពាល់ពីករណីជួញដូរមនុស្ស ដែលពាក់ព័ន្ធនឹងការបាត់ខ្លួនតួសម្ដែង និងតារាម៉ូដែលចិន កាលដើមខែមករាកន្លងទៅ មុនត្រូវបានរកឃើញ និងជួយសង្រ្គោះវិញក្នុងប្រទេសមីយ៉ាន់ម៉ា។ ជនរងគ្រោះទាំងនោះ បានធ្វើដំណើរមកប្រទេសថៃ ហើយត្រូវបានឧក្រិដ្ឋជនបោកបញ្ឆោតឆ្លងដែន យកទៅធ្វើការនៅកន្លែងប្រតិបត្តិការឆបោកអនឡាញក្នុងប្រទេសមីយ៉ាន់ម៉ា។ ករណីនេះ បានបណ្ដាលឱ្យភ្ញៀវទេសចរចិន លុបចោលដំណើរកម្សាន្តរបស់ខ្លួនមកថៃទ្រង់ទ្រាយធំ។

អភិបាលនៃអាជ្ញាធរទេសចរណ៍ថៃ (TAT) លោកស្រី Thapanee Kiatphaibool បាននិយាយកាលពីថ្ងៃចន្ទថា ករណីរបស់តារាសម្តែងចិន Wang Xing ដែលត្រូវបានគេបោកបញ្ឆោតទៅមីយ៉ាន់ម៉ាតាមព្រំដែនថៃ បានធ្វើឱ្យប្រតិបត្តិករទេសចរណ៍ក្នុងស្រុកមានការព្រួយបារម្ភកាន់តែខ្លាំង ចំពោះអ្នកបោកប្រាស់បរទេស ដែលឆ្លៀតឱកាសប្រើគម្រោងលើកលែងទិដ្ឋាការដើម្បីប្រព្រឹត្តសកម្មភាពខុសច្បាប់របស់ខ្លួន។ បច្ចុប្បន្ន គម្រោងលើកលែងទិដ្ឋាការថៃ ដែលមានបំណងជំរុញទេសចរណ៍ និងសេដ្ឋកិច្ចថៃ ផ្តល់ជូនការស្នាក់នៅក្នុងប្រទេសនេះ រយៈពេល ៦០ ថ្ងៃ។

លោកស្រីបាននិយាយថា វិស័យឯកជនចង់ឱ្យរដ្ឋាភិបាលថៃពិចារណាកាត់បន្ថយរយៈពេលស្នាក់នៅពី ៦០ ថ្ងៃ មកត្រឹម ១៥ ថ្ងៃ ដែលសាកសមនឹងរយៈពេលស្នាក់នៅជាមធ្យមជាក់ស្តែង សម្រាប់ភ្ញៀវទេសចរពីទីផ្សារប្រទេសចិន។ លោកស្រី Thapanee បានបន្តថា ប្រសិនបើរដ្ឋាភិបាលយល់ព្រមនឹងសំណើនេះ ទីផ្សារចិនជាទូទៅអាចនឹងមិនរងផលប៉ះពាល់ទេ ដោយសារទេសចរចិនភាគច្រើន មានទំនោរធ្វើដំណើរកម្សាន្តចន្លោះពី ៧ – ១០ ថ្ងៃ ជាជាងយូរជាងនេះ។

មិនមែនតែប្រតិបត្តិករទេសចរណ៍ទេ ដែលសម្ដែងការព្រួយបារម្ភពីបញ្ហានេះ។ កាសែតបាងកកប៉ុស្តិ៍បានរាយការណ៍ផងដែរថា ព្រឹទ្ធសភាថៃបានអំពាវនាវឱ្យរដ្ឋាភិបាលពិនិត្យឡើងវិញឱ្យហ្មត់ចត់នូវគោលនយោបាយលើកលែងទិដ្ឋាការរបស់ខ្លួនសម្រាប់ជនជាតិចិន ដោយលើកឡើងពីហានិភ័យដែលប្រទេសថៃក្លាយជាមជ្ឈមណ្ឌលសម្រាប់សកម្មភាពឧក្រិដ្ឋកម្ម ក្រោមភាពទាក់ទាញអវិជ្ជមាននៃគោលនយោបាយនេះ។

គួរគូសបញ្ជាក់ថា ក្រសួងទេសចរណ៍ថៃកំណត់គោលដៅភ្ញៀវទេសចរចិន ចន្លោះពី ៨,៨-៩ លាននាក់ នៅឆ្នាំនេះ ក្នុងចំណោមគោលដៅភ្ញៀវទេសចរបរទេសពី ៣៩-៤០ លាននាក់។

ដោយសារតែករណីបាត់ខ្លួនតួសម្ដែងចិន សមាគមសណ្ឋាគារថៃ (THA) បានឱ្យដឹងថា ភ្ញៀវទេសចរចិនបានលុបចោលការកក់បន្ទប់ចំនួន ៤ ៥៧២ យប់ តាមសណ្ឋាគារនានាទូទាំងប្រទេសថៃនាខែមករា ដោយក្នុងនោះ ការកក់បន្ទប់ចំនួន ២ ០០១ យប់ ត្រូវបានលុបចោលនៅក្រុងបាងកក។

ក្ដីបារម្ភអំពីសុវត្ថិភាពក្នុងប្រទេសថៃ ក៏បានជះឥទ្ធិពលដល់ទីផ្សារភ្ញៀវទេសចរបរទេសផ្សេងទៀតក្រៅពីចិនផងដែរ ដោយការកក់បន្ទប់ចំនួន ៧ ៨៥៦ យប់ ត្រូវបានលប់ចោល។ អ្នកជំនាញលើកឡើងថា ក្ដីបារម្ភសុវត្ថិភាពចុងក្រោយគឺជាបញ្ហារស៊ើបខ្លាំងសម្រាប់អ្នកដំណើរនៅអាស៊ី ជាជាងភ្ញៀវពីប្រទេសលោកខាងលិច៕

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា