ព័ត៌មានជាតិ

គយ នឹងដាក់ឱ្យអនុវត្តមុខងារគ្រប់គ្រងការរាយការណ៍ទំនិញនាំចេញក្នុងប្រព័ន្ធគ្រប់គ្រងសន្និធិគយបណ្តោះអាសន្ន

បានផុស

៤ ខែ មុន

នៅ

ថ្ងៃសុក្រ ២៨ មីនា ២០២៥

ដោយ

អគ្គនាយកដ្ឋានគយ និងរដ្ឋាករកម្ពុជា នឹងដាក់ឱ្យអនុវត្តមុខងារគ្រប់គ្រងការរាយការណ៍អំពីទំនិញនាំចេញ ក្នុងប្រព័ន្ធគ្រប់គ្រងសន្និធិគយបណ្តោះអាសន្ន (CTSM) នៅសាខាគយ និងរដ្ឋាករកំពង់ផែអន្តរជាតិភ្នំពេញ ដើម្បីបង្កើនប្រសិទ្ធភាពការងារនិងកាន់តែរហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមអគ្គនាយកដ្ឋានគយ បានគូសបញ្ជាក់ឱ្យដឹងថា ការសម្រេចដាក់ឱ្យអនុវត្តមុខងារ គ្រប់គ្រងការរាយការណ៍អំពីទំនិញនាំចេញតាមផ្លូវទឹក ក្នុងប្រព័ន្ធគ្រប់គ្រងសន្និធិគយបណ្ដោះអាសន្ន (CTSM) នេះ ដើម្បីចូលរួមលើកកម្ពស់ និងជំរុញកិច្ចសម្រួល ពាណិជ្ជកម្មតាមផ្លូវទឹកក្នុងការរាយការណ៍អំពីទំនិញ និងការពិនិត្យផ្ទៀងផ្ទាត់ទិន្នន័យទំនិញនាំចេញតាមនាវា ឱ្យកាន់តែមានប្រសិទ្ធភាពនិងឆាប់រហ័ស អគ្គនាយកដ្ឋានគយ និងរដ្ឋាករកម្ពុជា។

ជាក់ស្តែង មុខងារគ្រប់គ្រងការរាយការណ៍អំពីទំនិញនាំចេញ ក្នុងប្រព័ន្ធគ្រប់គ្រងសន្និធិគយបណ្តោះអាសន្ន (CTSM) នេះនឹងដាក់ឱ្យអនុវត្តជាផ្លូវការ នៅសាខាគយនិងរដ្ឋាករកំពង់ផែអន្តរជាតិភ្នំពេញ ចាប់ពីថ្ងៃទី១ ខែមេសា ឆ្នាំ២០២៥ តទៅ។

នីតិវិធីលម្អិតនៃការអនុវត្តមុខងារនេះ មាននៅក្នុងសៀវភៅមគ្គុទេសក៍មុខងាររាយការណ៍ទំនិញ សម្រាប់បែបបទនាវាចេញ ដែលអាចរកបានក្នុងគេហទំព័រផ្លូវការរបស់អគ្គនាយកដ្ឋានគយនិងរដ្ឋាករកម្ពុជា៕