សេដ្ឋកិច្ច

ចំណូលពន្ធគយ សម្រេចបានជាង ៣ ពាន់លានដុល្លារ កើនលើសផែនការ

បានផុស

៥ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

កម្ពុជាប្រមូលចំណូលពន្ធគយសម្រេចបានជាង ៣ ពាន់លានដុល្លារនៅឆ្នាំ ២០២៥ កើនឡើង ២១% ធៀបនឹងឆ្នាំ ២០២៤ ដោយសារកំណើននាំចូលយានយន្ត និងគ្រឿងចក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានលើកឡើងនៅក្នុងកិច្ចប្រជុំបូកសរុបលទ្ធផលការងាររបស់អគ្គនាយកដ្ឋានគយ និងរដ្ឋាករកម្ពុជា ឆ្នាំ២០២៥ និងលើកទិសដៅអនុវត្តន៍ឆ្នាំ២០២៦ នៅថ្ងៃទី ១២ ខែកុម្ភៈ ឆ្នាំ ២០២៦ថា ការប្រមូលចំណូលពន្ធពីការនាំចូលយានយន្ត និងគ្រឿងចក្រ មានរហូតដល់ ៤៤% ដែលជាប្រភពចំណូលសំខាន់បំផុត។

លោក គុណ ញឹម បញ្ជាក់ថា ចំណូលពន្ធគយដែលបានកើនឡើង ដោយសារកំណើននៃការនាំចូលរថយន្ត កើន ៦១% ដែលមានចំនួនប្រមាណ ៨ ម៉ឺន ៣ ពាន់គ្រឿង ខណៈការនាំចូលម៉ូតូ មានកំណើន ២១% ដែលមានជាង ៤២ ម៉ឺនគ្រឿង។

ក្រៅពីនេះ ចំណូលពន្ធបានពីការនាំចូលគ្រឿងសំណង់ ដែលមានកំណើនដល់ ៣៣% ឆ្លុះបញ្ចាំងពីកិច្ចខិតខំប្រឹងប្រែងរបស់មន្ត្រីពន្ធគយផង និងក្រុមទំនិញចម្រុះ ដែលជាចំណូលមានកំណើន ១៦%។

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគយនិងរដ្ឋាករគ្រប់ជាន់ថ្នាក់ក្នុងការសម្រេចបាននូវលទ្ធផលល្អប្រសើរលើការប្រមូលចំណូល និងលើការដ្ឋានការងារផ្សេងទៀត របស់អគ្គនាយកដ្ឋានគយ និងរដ្ឋាករកម្ពុជា ទោះបីជួបប្រទះនូវបញ្ហាប្រឈមមួយចំនួនរួមមាន ការបិទព្រំដែនគោករវាងកម្ពុជា-ថៃចាប់តាំងពីពាក់កណ្ដាលឆ្នាំ២០២៥, ភាពមិនប្រាកដប្រជាដ៏ស្រួចស្រាវនៃស្ថានភាពភូមិសាស្ត្រនយោបាយ និងភូមិសាស្ត្រសេដ្ឋកិច្ចជាសកល, ការប្រកាសដាក់ពន្ធបដិការដោយសហរដ្ឋអាម៉េរិកកាលពីដើមត្រីមាសទី២ ឆ្នាំ២០២៥, ការបន្តអូសបន្លាយនូវសង្គ្រាមរុស្សី-អ៊ុយក្រែន និងភាពតានតឹងនៃភូមិសាស្ត្រនយោបាយនានា៕