Skype បិទដំណើរការជាផ្លូវការកាលពីម្សិលមិញ

​វេទិកាទំនាក់ទំនងអនឡាញ Skype ដែលធ្លាប់តែល្បីខាងវិដេអូខល ឬការហៅជាសំឡេងពីមុននោះ បាន​បិទដំណើការជាផ្លូវការហើយកាលពីថ្ងៃចន្ទ ក្រោយប្រតិបត្តិការទំនាក់ទំនងសម្រាប់មនុស្សរាប់លាននាក់ជុំវិញពិភព​លោក​អស់រយៈពេលជិត ២២ ឆ្នាំមកនេះ។ នេះបើតាមការចុះផ្សាយរបស់បណ្ដាញព័ត៌មាន​ Al Jazeera។

បើកដំណើរការក្នុងឆ្នាំ ២០០៣ វេទិកា Skype បានក្លាយជា​បដិវត្តន៍​បច្ចេកវិទ្យា​ដ៏ល្បី​យ៉ាងឆាប់រហ័សសម្រាប់ការហៅជាសំឡេង និងវិដេអូដោយឥតគិតថ្លៃតាមអ៊ិនធឺណិត ដែលប្រមូលផ្តុំអ្នកប្រើប្រាស់ប្រចាំខែច្រើនជាង ៣០០ លាននាក់ នៅពេលវាពេញនិយមខ្លាំងនៅពាក់កណ្ដាល​ទសវត្សរ៍ឆ្នាំ ២០១០ ។

Skype បាន​ផ្លាស់ប្ដូរពីរបៀបដែលមនុស្សជុំវិញពិភពលោក​ ធ្វើការទំនាក់ទំនងគ្នា មុនពេល Zoom ​ឬ FaceTime មាន​វត្តមាន។

ក្នុងឆ្នាំ ២០១១ ក្រុមហ៊ុនបច្ចេកវិទ្យា Microsoft បានទិញ Skype ក្នុងតម្លៃ ៨,៥ ប៊ីលានដុល្លារ ក្នុង​បំណងធ្វើឱ្យវាក្លាយជា​ស្នូលនៃយុទ្ធសាស្រ្តទំនាក់ទំនងរបស់​ក្រុមហ៊ុន​។ ​យ៉ាងណាមិញ ខណៈគូប្រជែងថ្មីៗដូចជាវេទិកា WhatsApp, Zoom និង​ Microsoft Teams កាន់តែវាយលុក ​ប្រជាប្រិយភាពរបស់ Skype ​ក៏កាន់តែថយចុះ។

ទីបំផុត នៅថ្ងៃទី ២៨ ខែកុម្ភៈ ​ក្រុមហ៊ុន Microsoft ​បាន​ប្រកាសបិទ Skype នៅថ្ងៃទី ៥ ខែឧសភា ដើម្បី​ផ្ដោតលើប្រតិបត្តិការវេទិកា Microsoft Teams សម្រាប់ការទំនាក់ទំនង និងសហប្រតិបត្តិការផ្សេងៗ។ ការបិទ​នេះ នឹង​ប៉ះពាល់ដល់អ្នកប្រើប្រាស់ Skype ឥតគិតថ្លៃ និងបង់ប្រាក់ ដោយតម្រូវឱ្យពួកគេ ផ្ទេរទិន្នន័យទៅ Microsoft Teams វិញ៕