ត្រាំ គ្រោងប្ដឹងកាសែតញូវយ៉កថែមស៍ ពីបទបរិហាកេរ្តិ៍ ដោយទារសំណង ១៥ ប៊ីលាន​ដុល្លារ

ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​ឱ្យដឹងកាលពីថ្ងៃចន្ទថា លោកនឹងដាក់ពាក្យបណ្ដឹងពីបទបរិហារកេរ្តិ៍ និងសរសេរ ឬចុះផ្សាយព័ត៌មានក្លែងក្លាយដើម្បីបង្ខូចកេរ្តិ៍ឈ្មោះ (Libel Lawsuit) ប្រឆាំងកាសែតយក្សអាមេរិក ញូវយ៉កថែមស៍ (The New York Times) ដោយ​ទាមទារសំណង​ ១៥ ប៊ីលាន​ដុល្លារ។ ​នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក ត្រាំ បាន​សរសេរបង្ហោះនៅលើបណ្ដាញសង្គម Truth Social របស់លោកយ៉ាងដូច្នេះថា៖ «ថ្ងៃនេះខ្ញុំមានកិត្តិយសដ៏អស្ចារ្យក្នុងការ​ដាក់បណ្ដឹងបរិហារកេរ្តិ៍ ​និង Libel Lawsuit ១៥ ប៊ីលាន​ដុល្លារ ​ ប្រឆាំងនឹងកាសែតញូវយ៉កថែមស៍»។

ប្រធានាធិបតីដដែលថា ពាក្យបណ្ដឹងនឹង​ដាក់នៅរដ្ឋហ្វ្លរីដា ប៉ុន្តែមិនបាន​និយាយបញ្ជាក់លម្អិតជាបន្ថែមនោះទេ ខណៈកាសែតញូវយ៉កថែមស៍ឯណោះវិញ ក៏មិនទាន់បញ្ចេញប្រតិកម្មយ៉ាងណាដែរ ចំពោះការគំរាមចុងក្រោយ​ មកទល់ពេលនេះ (ព្រឹកថ្ងៃអង្គារនៅកម្ពុជា ពាក់កណ្ដាលយប់នៅទីក្រុងញូវយ៉ក)។

កន្លងមក លោក ត្រាំ បាន​ចោទប្រកាន់​កាសែតញូវយ៉កថែមស៍ ថាបាន​ផ្សាយកុហកអំពី​លោក​ ក៏ដូចជាគ្រួសារ និងអាជីវកម្មរបស់​លោក។

គួរគូសបញ្ជាក់ថា លោក ត្រាំ មាន​ប្រវត្តិ​វិវាទក្នុងអាជីពរបស់លោកជាយូរមកហើយ ដោយ​គំរាមប្ដឹងបុគ្គល និងស្ថាប័នព័ត៌មាន​ជាច្រើនរួមទាំង ញូវយ៉កថែម CNN និង CBS ប៉ុន្តែមិនបាន​ធ្វើតាមសម្ដីនោះទេ។ អ្នកវិភាគខ្លះលើកឡើងថា វាជាយុទ្ធសាស្រ្តគំរាមកំហែងផ្លូវច្បាប់របស់លោក ដើម្បី​បំភិតបំភ័យ​អ្នកសារព័ត៌មាន​។

កាលពីសប្ដាហ៍មុន ញូវយ៉កថែមស៍ ផ្សាយថា លោក ត្រាំ គ្រោងប្ដឹងស្ថាប័នខ្លួន ជុំវិញការផ្សព្វផ្សាយព័ត៌មាន​ថាលោកធ្លាប់មាន​ទំនាក់ទំនងជិតស្និទ្ធនឹង​បុគ្គលល្បីឈ្មោះ​ក្នុងករណីជួញដូរមនុស្ស និងឧក្រិដ្ឋកម្មផ្លូវភេទ រួមទាំងការជួញដូរផ្លូវភេទលើក្មេងៗ លោក Jeffrey Epstein។ ក្នុងការចោទប្រកាន់មួយ លោក ត្រាំ ​បាន​សរសេរ ឬចុះហត្ថលេខាលើ «សារ​​បែបផ្លូវភេទ» ​ក្នុងអំណោយជូនថ្ងៃខួបកំណើតរបស់លោក Jeffrey Epstein នៅឆ្នាំ ​២០០៣។ លោក ត្រាំ បាន​បដិសេធការណ៍នេះ៕