ដឹងអត់! ខកខានចាក់វ៉ាក់សាំងដូសទី២ នាំឱ្យប្រសិទ្ធភាពថ្នាំមិនពេញលេញ ហើយការពារបានតិច

អ្នកជំនាញសុខាភិបាលស្នើឱ្យចាក់វ៉ាក់សាំងគ្រប់ចំនួន២ដូសតាមការកំណត់ ទើបវ៉ាក់សាំងហុចផលបានល្អ ក៏ដូចជាមានប្រសិទ្ធភាពពេញលេញ។

យោងតាមស្ថិតិចេញផ្សាយដោយមជ្ឈមណ្ឌលបង្ការនិងគ្រប់គ្រងជំងឺ (CDC) បានឱ្យដឹងថា ជនជាតិអាមេរិកជាង៥លាននាក់បានខកខានចាក់វ៉ាក់សាំង Pfizer ឬ Moderna ដូសទី២ គិតត្រឹមខែមេសា ឆ្នាំ២០២១។ ផ្អែកតាមស្ថិតិនេះ ក្រុមអ្នកជំនាញព្រួយបារម្ភយ៉ាងខ្លាំងអំពីសុខភាពមនុស្សរាប់លាននាក់ដែលនឹងមិនទទួលបានការការពារពេញលេញ ព្រោះតែអាក់ខានចាក់ដូសបន្ទាប់របស់ខ្លួន។

យោងតាមការចុះផ្សាយពីកាសែត The New York Times រាយការណ៍ថា មនុស្សមួយចំនួនដែលមិនបានចាក់វ៉ាក់សាំងគ្រប់ចំនួនដូសជឿជាក់ថា ការចាក់តែមួយដងគឺអាចការពារបានគ្រប់គ្រាន់ប្រឆាំងនឹងវីរុសបានហើយ ​ស្របពេលអ្នកខ្លះ បានបង្ខំចិត្តឱ្យលុបចោលការចាក់ដូសទី ២ ពីព្រោះពួកគេមិនមានថ្នាំផ្គត់ផ្គង់គ្រប់គ្រាន់។

ដូច្នេះ តើមានអ្វីកើតឡើង ប្រសិនបើអ្នកខកខានការចាក់លើកទី ២?

ការចាក់វ៉ាក់សាំង Pfizer ឬ Moderna មួយដងអាចជួយអ្នកពីការឆ្លងមេរោគបានមួយអន្លើ ប៉ុន្តែលើសពីនេះទៀត ហានិភ័យក្រោយចាក់ថ្នាំបង្ការជំងឺកូវីដ-១៩នឹងធ្លាក់ចុះទាបបំផុត ប្រសិនបើចាក់គ្រប់ទាំងពីរដូស។ CDC បានបញ្ជាក់ថា ចាក់បានពីរដងល្អជាងចាក់តែមួយដង ដោយផ្អែកតាមការសិក្សារកឃើញថា វ៉ាក់សាំង Pfizer ឬ Moderna មួយដូសផ្តល់ការពារ ៨០% និងចាក់២ដូស ការពារបាន ៩០% ។

មួយវិញទៀត ប្រសិនបើអ្នកចាក់តែ១ដូស ការការពារមិនមានរយៈពេលយូរនិងពេញលេញនោះទេ ដរាបណាចាក់គ្រប់ទាំងពីរដូសតាមការកំណត់ ទើបសរីរាង្គអាចប្រឆាំងនឹងវីរុសបានល្អប្រសើរ។ លោក Ahmad Kamal, MD, MSc អនុប្រធានផ្នែកវេជ្ជសាស្ត្រនៅឯមជ្ឈមណ្ឌលវេជ្ជសាស្រ្ត Santa Clara Valley រដ្ឋកាលីហ្វ័រញ៉ា និយាយថា “នេះដោយសារតែការឆ្លើយតបនឹងប្រព័ន្ធភាពស៊ាំត្រូវបានរំញោចក្រោយចាក់លើកទី ២” ។

ចុះបើសិនចង់ចាក់តែ១ដូស គួរធ្វើយ៉ាងម៉េច? វ៉ាក់សាំងទាំងអស់ដែលដាក់ឱ្យប្រើប្រាស់សព្វថ្ងៃ សុទ្ធតែតម្រូវឱ្យចាក់២ដូស ប៉ុន្តែបើសិនចង់ចាក់តែ១ដូស លុះណារង់ចាំចាក់វ៉ាក់សាំង Johnson & Johnson ដោយសារកន្លងមកក្រុមហ៊ុននេះអះអាងថា វ៉ាក់សាំងរបស់ខ្លួនមានប្រសិទ្ធភាពត្រឹមចាក់១ដូសប៉ុណ្ណោះ៕

ប្រែសម្រួល៖ សន្យា

ប្រភព៖ Health

ចុចអាន៖ ពិសេសណាស់! មនុស្សចាស់អាយុលើសពី ៦០ ឆ្នាំចាក់មួយដូសដំបូងរបស់វ៉ាក់សាំង AstraZeneca មានប្រសិទ្ធភាពការពារកូវីដ ដល់ ៨៧ ភាគរយ

ចុចអាន៖ ច្រឡំចាក់វ៉ាក់សាំងកូវីដ-១៩ប្រភេទផ្សេងគ្នា អាចបង្កគ្រោះថ្នាក់ដែរអត់?