រូបភាពរបស់អតីតវីរៈសិល្បករល្បីៗ ត្រូវបានរំលេចក្នុងគម្រោងសួនសិល្ប:របស់ខេត្តបាត់ដំបង

នាពេលខាងមុខឆាប់ៗនេះ នៅទឹកដីបាត់ដំបងដែលជាខេត្តនៃសិល្ប:-វប្បធម៌ដ៏សំបូរបែប គឺសួនសិល្ប:មួយនឹងលេចរូបរាងឡើងនៅទីនោះ។ នេះបើយោងតាមការបញ្ជាក់ឲ្យដឹងពីលោក សុខ លូ អភិបាលនៃគណៈអភិបាលខេត្តបាត់ដំបង។

លោក សុខ លូ អភិបាលខេត្តបាត់ដំបង បានសរសេរបង្ហោះភ្ជាប់រូបភាពរបស់អតីតសិល្បករល្បីៗ កាលពីជំនាន់ដើមដូច្នេះថា ជាក់ស្តែងក្រុមការងារបានជ្រើសរើសអតីតសិល្បករ កវីនិពន្ធ រួមទាំងអ្នកចម្រៀងជំនាន់ពីដើមដែលមានកេរ្តិ៍ឈ្មោះល្បីល្បាញហើយមានដើមកំណើតនៅខេត្តបាត់ដំបង ដើម្បីដាក់បង្ហាញនៅក្នុងសួននេះ។

លោកអភិបាលខេត្ត បានឲ្យដឹងទៀតថា ក្នុងនោះក្រុមការងារក៏បានសម្រេចដាក់រូបសំណាកអធិរាជសំឡេងមាស​
លោក ស៊ីន សុីសាមុត មួយផងដែរ បើទោះបីលោកមិនមានដើមកំណើតនៅបាត់ដំបងក្តីតែលោកបានច្រៀងចម្រៀងពីបាត់ដំបងយ៉ាងច្រើនដែលរួមចំណែកច្រើនក្នុងភាពល្បីល្បាញរបស់ខេត្តបាត់ដំបង។

ជាមួយការលើកឡើងខាងលើនេះក៏មានការបង្ហាញទស្សន:គាំទ្រជាច្រើន ចំពោះការបង្កើតឱ្យមានសួនសិល្ប:នេះឡើង ក៏មានសំណូមពរឱ្យបន្ថែមរូបសំណាកអ្នកនិពន្ធអក្សរសិល្បិ៍ខ្មែរដើមកំណើតខេត្តបាត់ដំបងផ្សេងទៀតផងដែរ។ តែយ៉ាងណា ក្នុងចំណោមនោះ ក៏មានចោទជាសំណួរផងដែរ ទាក់ទងនឹងសាវតារបស់សិល្បករជើងចាស់ទាំងនេះ ខណៈមានការរិះគន់កែតម្រូវខ្លះៗផងដែរទាក់ទងនឹងសាវតា ក៏ដូចជាឈ្មោះរបស់ពួកគាត់។

សូមជម្រាបដែរថា ខេត្តបាត់ដំបងមានអំណោយផលច្រើន គឺទាំងតំបន់ទេសចរណ៍ការរស់នៅរបស់ប្រជាជន សិល្បៈ វប្បធម៌ ប្រពៃណី និងម្ហូបអាហារជាដើម៕ ចាន់រ៉ា