ពិធីករ សុខ រ៉ាស៊ី អំពាវនាវឱ្យរួមគ្នាផ្សព្វផ្សាយពីផលវិបាក និងផលប៉ះពាល់នៃគ្រឿងញៀន ដើម្បីសង្គមជាតិ

លោកសុខ រ៉ាស៊ី ដែលជាពិធីករដ៏មានប្រជាប្រិយភាព បានចេញមុខអំពាវនាវដល់អាណាព្យាបាល ឬឪពុកម្តាយរួមទាំងបងប្អូនឱ្យរួមគ្នាផ្សព្វផ្សាយអំពីផលវិបាក និងផលប៉ះពាល់នៃគ្រឿងញៀនទាំងអស់គ្នា ដើម្បីសង្គមជាតិបានល្អសម្រាប់ទាំងអស់គ្នា។

លោក សុខ រ៉ាស៊ី លើកឡើងថា ក្នុងនាមលោកជាសិល្បករមួយរូប នៅក្នុងសមាជិកនៃសមាគមសិល្បករខ្មែរសូមធ្វើការអំពាវនាវក៏ដូចជាស្នើដល់មហាជនអ្នកគាំទ្រទាំងអស់គ្នាចូលរួមផ្សព្វផ្សាយជាមួយអាជ្ញាធរជាតិប្រយុទ្ធប្រឆាំងគ្រឿងញៀនដើម្បីចែករំលែកសារល្អដល់កូនចៅពីផលប៉ះពាល់របស់គ្រឿងញៀន។

លោក សុខ រ៉ាស៊ី បានបន្តថា បញ្ហាគ្រឿងញៀនមិនត្រឹមតែបំផ្លាញខ្លួនឯង និងក្រុមគ្រួសារទេគឺបំផ្លាញសង្គមជាតិ បំផ្លាញអាយុជីវិតនិងប្រទេសយើងផងដែរ ដូច្នេះមានតែការចូលរួមពីសំណាក់សាធារណជនខ្មែរ ដើម្បីផ្សព្វផ្សាយពីឥទ្ធិពលដ៏អាក្រក់ និងគ្រោះថ្នាក់នៃការប្រើប្រាស់គ្រឿងញៀនឱ្យបានទាំងអស់គ្នា។

គួររម្លឹកដែរថា កន្លងមកសមាគមសិល្បករខ្មែរបានចាត់ទុកថាសិល្បករសិល្បការិនីទាំងអស់ជាគំរូដ៏សំខាន់សម្រាប់អ្នកគាំទ្រ និងសាធារណជន ជាពិសេសគឺយុវវ័យបក្នុងបរិបទបច្ចុប្បន្នដែលអាចនាំសារអប់រំនឹងការយល់ដឹងអំពីផលប៉ះពាល់នៃឥទ្ធិពលគ្រឿងញៀន៕ ដោយ ៖ ចាន់រ៉ា