នាយ ប្រុញ សម្រេចដើរចេញពីក្រុម ទៅនៅស្រែវិញ ដោយសាររឿងហួសចិត្តមួយចំនួន

បន្ទាប់សាងប្រជាប្រិយភាព និងកេរ្តិ៍ឈ្មោះល្បីលើបណ្តាញសង្គម នាយ ប្រុញ កន្លងមកទទួលបានឱកាសកាសការងារជាបន្តបន្ទាប់រហូតលេចមុខកាន់តែខ្លាំង ធ្វើឱ្យឧកញ៉ា សម្បត្តិ បានសម្រេចហៅនាយ ប្រុញ មកសម្តែងនៅក្រុងភ្នំពេញដោយបង្កើតក្រុមកំប្លែងឱ្យពួកគេ ដើម្បីផ្តល់ឱកាសការងាថ្មី និងរកប្រាក់កម្រៃជួយគ្រួសារ។

ហេតុផលនេះបានធ្វើឱ្យអ្នកគាំទ្រគិតថា នេះជាឱកាសដែលធ្វើឱ្យនាយ ប្រុញ កាន់តែកែប្រែជីវភាពគ្រួសារបានយ៉ាងល្អ។ ប៉ុន្តែយ៉ាងណាមិញក្រោយពេលនាយ ប្រុញ លាដីស្រែលាពុកលាម៉ែពីស្រុកកំណើតមករស់នៅភ្នំពេញបានប្រមាណជាង ១ ឆ្នាំ ពេលនេះក៏ធ្លាយដំណឹងដ៏ភ្ញាក់ផ្អើល និងហួសចិត្តថា នាយ ប្រុញ បានសម្រេចចិត្តចាក់ចេញពីក្រុមកំប្លែង និងលោកឧកញ៉ា សម្បត្តិ ដោយមូលហេតុថតមិនបានប្រាក់កម្រៃ (ប្រាក់ខែ)។ ទើបចុងក្រោយ​នេះ ប្រុញ សុំតែរួចខ្លួនទៅនៅស្រុកវិញប៉ុណ្ណោះ។

ដំណឹង​នេះត្រូវបាន​បែកធ្លាយ​តាមរយៈ​សំណេរ​របស់លោក ពេជ្រ ស្រស់ ដែល​គេ​ស្គាល់​ថា លោកជាបុគ្គលធ្លាប់បានជួយយិតយោងនាយ ប្រុ​ញ តាំងពី​មុន​នាយ​ឡើងមក​រាជធានី​ភ្នំពេញរហូត​មានផ្ទះ​សម្បែងសមរម្យឱ្យឪពុកម្ដាយ រស់នៅ។ ម្យ៉ាងទៀតលោក​ ពេជ្រ ស្រស់ ក៏បានចំណាយពេលមួយរយៈដើម្បី​ស្វែងយល់​ពី​បញ្ហា​នេះ រហូត​តារា​កំប្លែង​វ័យក្មេង​រូបនេះ​ដាច់ចិត្ត​ទម្លាយ​ការពិត​មួយចំនួន​។​

យោងតាមលោក ពេជ្រ ស្រស់ បាន​បង្ហោះ​រូបថត​ជុំ​គ្នា​ជាមួយ​នាយ​ប្រុ​ញមួយ​សន្លឹក​នៅថ្ងៃទី២៣ ខែមេសា ឆ្នាំ២០២២ ដោយរៀបរាប់ថា៖ “ដើមឡើយខ្ញុំគិតថាមិននិយាយទេរឿងក្មួយប្រុញដែល​ចេញ​ថត​ព្រោងព្រាត ប៉ុន្តែ​គឺមិនដែល​ទទួល​បាន​ថវិកា​ពី​ការថត​នោះទេ ហើយ​ប្រាក់ខែ​ក្មួយ​វិញ​គឺ​បានតែ​ម្តងគត់។ នេះ​បើយោងតាមការរៀបរាប់របស់ក្មួយ និងម្តាយ។ ចំពោះ​ពាក្យ​ល្បី​ថា​ក្មួយ​ប្រុ​ញ​បាន​ឡាន​នោះ​ក៏​ក្មួយថាមិនបានដែរ ដោយសារ​មាន​ចំណែក​បីនាក់ ហើយក្មួយក៏​មិន​ទទួល​បានដែរ​ ពីព្រោះ​ក្មួយ​ឈប់​ថត​ក្នុង​ក្រុម​ទៀតហើយ មូលហេតុ​គឺ​ថត​មិន​ទទួលបាន​លុយ​ទាល់តែសោះ។

លោក ពេជ្រ ស្រស់ បន្តទៀតថា៖ “នៅមានរឿងច្រើនទៀតដែលក្មួយមិនទទួលបានលុយពីការថតស្ពតពាណិជ្ជកម្មផ្សេងៗ បើ​រឿង​ខាងលើ​គឺជា​រឿង​ពិត​មែននោះ ជីវិត​ក្មួយ​ពិតជា​កម្សត់​ពេក​ហើយត្រូវគេ​ប្រើ​ដោយ​គ្មាន​ក្តីមេត្តាទាំង​គ្រួសារ​ក្មួយ​ក្រខ្សត់​ថែមទៀត។ ព័ត៌មាន​ខាងលើ​គឺ​ខ្ញុំ​ស្តាប់​ក្រុមគ្រួសារ​ក្មួយ​ប្រុ​ញ និង​ក្មួយ​ប្រុ​ញ​រៀបរាប់​ប្រាប់​ខ្ញុំ​តែ​ម្ខាង​ប៉ុណ្ណោះ ដោយខ្ញុំមិនទាន់បានស្តាប់ភាគីពាក់ព័ន្ធនៅឡើយ​ទេ ហើយ​ឥឡូវ​ក្មួយ​ប្រុ​ញ​ត្រឡប់​ទៅ​នៅផ្ទះ​ធម្មតា​វិញ​ហើយ ព្រមទាំង​ឈប់​ថត ​VDO ​ទៀត​ដែរ”។

លោក ពេជ្រ ស្រស់ លើកឡើងបន្ថែម ថា ក្រុមគ្រួសារ​ក្មួយ​ ប្រុញ ជាពិសេស​ឪពុកម្តាយ​​ បានបញ្ជាក់ថា ជំនួយ​ដែល​ទទួល​បានជា​ដុំកំភួនឃើញលទ្ធផលជាក់ស្តែង​គឺ​ជំនួយ​តាមរយៈលោកផ្ទាល់ ដោយ​ទទួលបាន​ផ្ទះ​ពិត​ជាក់ស្តែង និង​សល់​លុយ​ថែម​ទៀត​។

ជុំវិញរឿងរ៉ាវខាងលើនេះ យើងមិនទាន់អាចស្វែងការបកស្រាយពីភាគីអ្នកគ្រប់គង និងដឹកនាំនាយ ប្រុយ បានទេនៅថ្ងៃទី២៤ ខែមេសា ឆ្នាំ២០២២នេះ៕

អត្ថបទ៖ ចាន់រ៉ា